ەۋروپالىق سوت Uber كومپانياسىن تسيفرلى قىزمەت كورسەتۋشى ەمەس, كولىك كومپانياسى بولاتىنى تۋرالى شەشىم قابىلدادى.
ال Uber وكىلدەرى سوت الدىندا تاكسيستىك كومپانيا ەمەس, جۇرتتىڭ ءبىر-بىرىمەن ەلەكتروندى تۇردە بايلانىسۋىنا كومەكتەسەتىندىكتەن اقپاراتتىق قاۋىپسىزدىكتى قامتاماسىز ەتۋ بويىنشا قىزمەت كورسەتۋ مارتەبەسىن قورعاپ قالماق بولعان.
سوت ءىسىنىڭ جۇرگىزىلۋىنە بارسەلونا بيلىك ورگاندارىنىڭ شەشىمى تۇرتكى بولدى. ياعني كاتالونيا بيلىگى Uber-گە قالالىق تاكسي قىزمەتىنە قاتىستى بارلىق ەرەجەنى ساقتاۋدى مىندەتتەدى.
ءوز كەزەگىندە Uber باسشىلىعى سوت شەشىمى كومپانيانىڭ ەۋروپاداعى جۇمىسىنا كەدەرگى كەلتىرمەيتىنىن مالىمدەدى, ال ساراپشىلاردىڭ پىكىرى بويىنشا بۇل ءىس كومپانيانىڭ بوس ۋاقىتىن ۇنەمدەۋىنە كەرى اسەرىن تيگىزەدى.
«بۇل شەشىم كولىك زاڭدارىنا سايكەس كەلەتىندىكتەن ەو ەلدەرىنىڭ باسىم بولىگىندەگى جۇمىسىمىزعا كەرى اسەرىن تيگىزبەيدى. دەگەنمەن, ەۋروپانىڭ ميلليونداعان تۇرعىنى Uber قوسىمشاسىن پايدالانا الماي وتىر. جاڭا باسشىمىز ايتقانداي Uber سەكىلدى قىزمەت تۇرلەرىنىڭ جۇمىسىن رەتتەۋ دۇرىس جاسالعان قادام. سوندىقتان ءبىز ەۋروپاداعى قالالاردىڭ بيلىك وكىلدەرىمەن ديالوگ ورناتۋدى جالعاستىرامىز. وسى ءىستىڭ ناتيجەسىندە تۇرعىنداردىڭ ءبىر عانا باتىرمانى باسۋ ارقىلى سەنىمدى ساپارعا شىعۋىن قامتاماسىز ەتۋگە تىرىسامىز», – دەدى Uber وكىلى.
سوت شەشىمى بويىنشا ەو زاڭىنا سايكەس كومپانيانىڭ بىلىكتى جۇرگىزۋشىلەرى بولۋى قاجەت.
بريتاندىق ترەد-يۋنيون كونگرەسىنىڭ باس حاتشىسى فرەنسيس و’گرەيديدىڭ ايتۋىنشا سوت Uber-ءدىڭ وزگەلەر سياقتى ەرەجەمەن ءجۇرۋ كەرەكتىگىن باستى نازاردا ۇستادى.
«ولاردىڭ جۇرگىزۋشىلەرى تاۋار ەمەس. جۇرت قاتارلى ايلىق الىپ, اقىسى تولەنەتىن ەڭبەك دەمالىسىن الۋعا قۇقىعى بار. تەحنولوگيالىق ىلگەرىلەۋ جۇرگىزۋشىلەردىڭ دە ەڭبەك شارتىن جاقسارتۋى ءتيىس», – دەيدى فرەنسيس و’گرەيدي.
ال Uber-گە قارسى شىققان لوندون مەرى ساديك حاننىڭ ايتۋىنشا ۇلىبريتانيا استاناسىندا كومپانيانىڭ جۇمىس ىستەۋ ليتسەنزياسىن ۇزارتۋعا ءبىراز ۋاقىت كەتۋى مۇمكىن.
Uber قىزمەتى جايلى كوپشىلىك تەرىس پىكىردە. بىرقاتار قالادا تاكسي قىزمەتكەرلەرى نارازىلىعىن ءبىلدىرىپ جاتادى. ولاردىڭ ايتۋىنشا Uber ولاردى ءبىر جاعىنان كليەنتسىز قالدىرىپ جاتسا, ەكىنشى جاعىنان كۇندەلىكتى اقىسىنان ايىرىپ وتىر.
دەگەنمەن, جاڭا تەحنولوگيالار سالاسىنداعى كاسىپكەر, دەۆيد كامەروننىڭ بۇرىنعى كەڭەسشىسى رونان سيلۆا مۇنداي پىكىرمەن كەلىسپەيدى. ونىڭ ايتۋىنشا Uber-ءدىڭ ارقاسىندا باسەكەلەس كومپانيالار دا قىزمەت ساپاسىن جوعارىلاتتى.
«قازىر جولاقىسىن بانك كارتاسى ارقىلى تولەۋگە بولادى. مۇنداي قىزمەت ءتۇرىن ەنگىزە الماي كەلگەنىمىزگە قانشاما جىل ءوتتى. مىنە, وسىعان قاراپ باسەكەلەس كومپانيالار دا قىزمەت ساپاسىن ارتتىرىپ جاتىر», – دەيدى رونان سيلۆا.
دايىنداعان ايان ءابدۋالي, «ەگەمەن قازاقستان»