قوستانايدا وبلىستىق جاستار رەسۋرسى ورتالىعى مەن وبلىستىق جاستار ساياساتى جونىندەگى باسقارمانىڭ ۇيىمداستىرۋىمەن وبلىس اكىمىنىڭ كۋبوگى ءۇشىن جايدارمانشىلار ويىنى بولىپ ءوتتى.
جايدارمان كوڭىلدى تاپقىرلار كومانداسىنىڭ قوستاناي وبلىسىنا «جاقىندىعى» بار. قالاي دەرسىز؟ 2010 جىلدان وبلىستا جايدارمان كتك-ءنىڭ رەسمي اشىق ليگاسى ىرعاقتى وتكىزىلىپ, ول رەسپۋبليكالىق تەلەليگاسىنىڭ سوڭعى ساتىسىنا دەيىن جەتىپ, ونى كورەرمەندەر Qazaqstan تەلەارناسىنان جاقسى بىلەتىن. كوپتەگەن كوماندالارداعى ازىلكەشتەر قوستاناي ءازىل مەكتەبىنىڭ تۇلەكتەرى دەسە بولادى. جايدارمان ليگاسى قۇرىلعالى جەتى جىلدا وعان 100 كوماندا قاتىسىپ, ولاردىڭ اراسىنان 15 كوماندانىڭ اسىعى الشىسىنان تۇرىپ, تەلەۆيزيالىق ويىنعا شاقىرىلدى. سولاردىڭ كوپشىلىگى, مىسالى, ارقالىق قالاسىنان «ارۋ KZ», قوستاناي ينجەنەرلىك-ەكونوميكالىق ۋنيۆەرسيتەتىنىڭ «جاڭا عاسىر», ى.التىنسارين مەكتەبىنەن «دارىن قۇراماسى», ءىىم قوستاناي اكادەمياسىنان «ىشكى ىستەر قۇراماسى» بۇگىنگە دەيىن رەسپۋبليكالىق كتك ساحناسىندا وبلىس ابىرويىن اسىرىپ ءجۇر. قوستاناي وبلىسى اكىمىنىڭ كۋبوگى ءۇشىن وتكەن ويىنعا وسى اتالعان كوماندالارمەن قاتار اقتوبەدەن «فەميدا», استانادان «تۇران» جانە پەتروپاۆلدان «بەس جاڭالىق» قاتىستى. ونى قازاقستانداعى كوڭىلدى تاپقىرلار كوماندالارى وداعىنىڭ پرەزيدەنتى ەسەن ەلەۋكەن جۇرگىزدى. ساحناداعى كوماندالاردىڭ ءبارى دە ۇتىمدى ازىلىمەن قوستانايلىق كورەرمەندەردى ريزا ەتتى, ولار بەدەلدى قازىلار القاسى مەن كورەرمەنگە ۇناۋ ءۇشىن بارىن سالدى دەۋگە بولادى. دەگەنمەن, جارىستىڭ اتى – جارىس. جەڭىس اقتوبەلىك «فەميدانىڭ» قانجىعاسىندا كەتتى. ولارعا وبلىس اكىمىنىڭ ورىنباسارى مارات جۇندىباەۆ 300 000 تەڭگەنىڭ سەرتيفيكاتى مەن قوستاناي وبلىسى اكىمىنىڭ كۋبوگىن تاپسىردى. «دارىن قۇراماسى» كومانداسىنىڭ مۇشەسى تاڭشولپان تەمىرلان ەڭ ۇزدىك اكتريسا دەپ تانىلدى. ول 50 000 تەڭگەنىڭ سەرتيفيكاتىن الدى.
ءنازيرا جارىمبەت, «ەگەمەن قازاقستان»
قوستاناي