پرەزيدەنتىمىز نۇرسۇلتان نازارباەۆتىڭ «تاۋەلسىزدىك ءداۋىرى» اتتى كىتابىنا قازاقستاننىڭ ازاتتىق جىلدارىندا ءجۇرىپ وتكەن جولى انىق كورسەتىلگەن. بۇل – تاۋەلسىزدىكتىڭ تاعدىرى تۋرالى كىتاپ, تاۋەلسىز مەملەكەت بولۋدىڭ تاجىريبەسى بولماعان قازاقستاندا تاۋەلسىز مەملەكەت ورناتۋدىڭ تاجىريبەسى تۋرالى كىتاپ. مۇندا ءبىزدىڭ وتكەن ءومىرىمىز, تاۋەلسىزدىگىمىزدىڭ العاشقى كۇنىنەن باستالعان وتكەلدەرىمىز انىق كورسەتىلگەن.
ءبىز ەندى وسىناۋ وقيعالاردىڭ بەل ورتاسىندا بولعان ادامدارمىز. ءبارى دە تايعا تاڭبا باسقانداي كوكىرەگىمىزدە سايراپ تۇر. كەڭەس وداعى دەگەن يمپەريا قۇلاپ, تاس-تالقان بولىپ جاتقان كەزدە رەسپۋبليكالاردىڭ ارقايسىسى جەكە شاڭىراق كوتەرىپ, ەل بولىپ جاتتى. ءبىز دە قۇدايعا تاۋبە دەپ, 1991 جىلى بۇكىل حالىق بولىپ ەلباسىمىزدى سايلادىق. سول كەزدە سايلاۋدىڭ شتابىن باسقارعانىم ەسىمدە. 98,8 پايىزدىق داۋىسپەن نۇرسۇلتان نازارباەۆ پرەزيدەنت بولىپ سايلانعان ەدى.
16 جەلتوقساندا قازاقستاننىڭ تاۋەلسىزدىگى جاريالاندى. سودان بەرى قاراي ەلباسى قولىنا مەملەكەتىمىزدىڭ تىزگىنىن الىپ, قيراندىدان, بىت-شىت بولىپ تامتىعى قالماعان, رەسپۋبليكا دەگەن اتى بار, زاتى جوق مەملەكەتتەن تاۋەلسىز قازاقستاندى ورناتتى. ەل پرەزيدەنتى قازاقستاندىق جولدى ايقىنداپ, دامۋ كەزەڭى باستالعاننان كەيىن قازاقستاندى الەم تانىپ, مويىندادى.
مەن كوپتەگەن وقيعالاردىڭ ىشىندە بولعان اداممىن. ەلباسىمەن بىرگە وتىرىپ, سول كىسىنىڭ قاسىندا ءجۇرىپ, قازاقستاندا تۇڭعىش قۇرىلتاي وتكىزدىك. 1991 جىلى جەلتوقساننىڭ 10-ى كۇنى تۇڭعىش پرەزيدەنتتى تاققا وتىرعىزۋ ءراسىمىن وتكىزدىك. سول ءراسىمدى باسقارۋ مەنىڭ پەشەنەمە جازىلعان ەدى. مىنە, وسى ساتتەردىڭ بارلىعى كىتاپتا جازىلعان.
كىتاپ ۇلكەن ءتورت بولىمنەن تۇرادى. سول ءتورت بولىمدە ەلباسى باسىنان اياعىنا دەيىن مارجانداي قىلىپ, ءبىزدىڭ ءۇش رۋحاني جاڭعىرۋىمىزدى كورسەتە ءبىلدى. ءبىز تاۋەلسىزدىك العاننان بەرى جاڭعىرىپ كەلە جاتقان ەلمىز. سوندىقتان بۇل كىتاپ جاس بالالاردان باستاپ, ەڭكەيگەن كارىلەرگە دەيىن قولىنان تۇسپەيتىن كىتاپ بولار دەگەن سەنىمدەمىن.
مىرزاتاي جولداسبەكوۆ, مەملەكەت جانە قوعام قايراتكەرى