تاۋەلسىزدىك كۇنىنە ارنالعان ءاربىر سالتاناتتى جيىن ازاتتىقتىڭ اق تاڭىنداي نۇرلى, قاستەرلى. ارينە, ارقا ءتورى ول مەرەكەنى ارقاشان ءوز بيىگىندە قارسى الادى. مەرەكە مەزەتىندە ايماق باسشىسى ەرلان قوشانوۆ قاتىسقان كەنشىلەر مادەنيەت سارايىنداعى ءراسىمدى جيىن سونىڭ ايعاعى. وندا ەلىمىزدىڭ وركەندەۋىنە ەلەۋلى ۇلەس قوسقان ازاماتتار قۇرمەتكە بولەندى.
جيىندى اشىپ بەرگەن وبلىس اكىمى مەيرامنىڭ ماڭىزدىلىعىنا ءمان بەردى.
– تاۋەلسىزدىك كۇنى – ەلىمىزدىڭ ەڭ ۇلى مەرەكەسى. ارمانداعان ازاتتىق تاڭىن قارسى الدىق. پرەزيدەنت نۇرسۇلتان نازارباەۆ ءتاڭىردىڭ ۇلى سىيى – تاۋەلسىزدىك ەكەنىن ايتتى. ەگەمەندىك جىلدارىندا قازاقستان ەڭسەلى بيىكتەردى باعىندىردى. ارينە, ءبىر جەڭنەن قول, ءبىر جاعادان باس شىعارعان بىرلىكتىڭ ارقاسى. قاراعاندى جەرى ىنتىماقتىڭ ولكەسىنە اينالدى. ىنتىماق بار وڭىردەن ىرىس اينالمايدى. دوستىعىمىز جاراسا بەرسىن, – دەدى ءوڭىر باسشىسى.
جيىن بارىسىندا ەلباسى جارلىعىنا سايكەس, ايماقتىڭ ساياسي جانە قوعامدىق ومىرىنە بەلسەنە ارالاسىپ, ەلدىڭ الەۋمەتتىك-ەكونوميكالىق جانە مادەني دامۋىنا ەلەۋلى ەڭبەك سىڭىرگەن, ۇلتتار اراسىنداعى دوستىق پەن ىنتىماقتاستىقتى نىعايتۋعا قوسقان سۇبەلى ۇلەسى ءۇشىن بىرقاتار ازاماتتار مەملەكەتتىك ماراپاتتارعا يە بولدى.
قاراعاندى مەملەكەتتىك ۋنيۆەرسيتەتىنىڭ رەكتورى ەركىن كوبەەۆ, نۇرا اۋدانىنداعى «جاراسپاي» جشس ديرەكتورى سەيىلحان قوڭىرباەۆ «پاراسات» وردەنىن وڭىرىنە تاقتى. سونداي-اق «قۇرمەت» وردەنىنە تەمىرتاۋ قالاسىنىڭ اكىمى عالىم ءاشىموۆ, وبلىستىق تۋبەركۋلەزگە قارسى ديسپانسەر ديرەكتورى نويان بيدايباەۆ, قاراعاندى وبلىسىنىڭ قۇرمەتتى ازاماتى نيكولاي دريجد, اباي اۋدانىنداعى «شانس» شارۋا قوجالىعىنىڭ جەتەكشىسى يگور جابياك, «قازاقمىس ەنەردجي» جشس اتقارۋشى ديرەكتورى احات كالەندارەۆ, جەزقازعاندىق ەڭبەك ارداگەرى ساعىندىق قوجامسەيىتوۆ, قاراعاندىداعى «شىعىس» شارۋا قوجالىعىنىڭ جەتەكشىسى شاميل وسين, وبلىستىق ءماسليحات دەپۋتاتى ايمان تۇكباەۆا, جەزقازعان قالاسىنىڭ وكىلى, ەڭبەك ارداگەرى جاقسىلىق شوقتاەۆ يە بولدى. ال «شاپاعات» مەدالىنە قول جەتكىزگەندەر قاتارىندا وبلىستىق ءماسليحات دەپۋتاتى بەكزات التىنبەكوۆ, قالالىق باستاۋىش مەديتسينالىق-سانيتارلىق كومەك ورتالىعىنىڭ ديرەكتورى تاتيانا باشيروۆا, قاراجال قالالىق ورتالىق اۋرۋحاناسىنىڭ پەرزەنتحانا ءبولىمىنىڭ اكۋشەرى گۇلنار جاقىپبەكوۆا, بۇقار جىراۋ اۋداندىق ورتالىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى مەرەكە جۇماقاەۆ, جەزقازعان قالالىق ورتالىق اۋرۋحاناسى ەندوسكوپيا بولىمشەسىنىڭ مەڭگەرۋشىسى بەيسەن كولباەۆ, وبلىستىق تۋبەركۋلەزگە قارسى ديسپانسەر جەزقازعان بولىمشەسىنىڭ فتيزياتر-دارىگەرى مارياش ورازبەكوۆا بولدى. «قازاقستاننىڭ ەڭبەك سىڭىرگەن قايراتكەرى» اتاعى قاراعاندى قالاسىنىڭ قۇرمەتتى ازاماتى رىمبالا وماربەكوۆا جانە ەڭبەك ارداگەرى جاعىپار الىمحانوۆقا تابىستالدى.جيىندا ءىىى دارەجەلى «ەڭبەك داڭقى» وردەنى, «ەرەن ەڭبەگى ءۇشىن» مەدالى جانە قۇرمەت گراموتالارى تاپسىرىلدى.سالتاناتتى جيىننىڭ ەڭ ەلەۋلى ساتتەرىنىڭ ءبىرى, ارينە ول قاراعاندى وبلىسىنىڭ قۇرمەتتى ازاماتى اتانعان ازاماتتاردىڭ ەسىمىن ايتاتىن مەزەت. اۋەلى ايماق باسشىسى قازىنالى ولكەنىڭ تۋماسى, مەملەكەت جانە قوعام قايراتكەرى, ۇلى وتان سوعىسىنىڭ ارداگەرى كامالي دۇيسەمبەكوۆ اعامىزعا «قۇرمەتتى ازامات» اتاعىن تاپسىرۋ ءۇشىن ساحنادان ءتۇستى. سونىمەن قاتار «حالىق قاhارمانى», ارميا گەنەرالى مۇحتار التىنباەۆ اعامىزعا وبلىستىڭ قۇرمەتتى ازاماتى اتاعى بەرىلدى. گەنەرالدىڭ ۇلكەن ومىرگە ساپارى كومىرلى ولكەدەن باستالعانى بەلگىلى.
– جەرلەستەرىمە مىڭ العىس. بۇل قۇرمەت – ماعان كورسەتىلگەن زور سەنىم دەپ بىلەمىن. مەن العاش وسى جەردەن كوككە كوتەرىلدىم. سىيدىڭ ۇلكەنىن قاراعاندى جۇرتىنان كورگەنىمە ريزامىن, – دەدى گەنەرال. سونىمەن قاتار بۇل اتاققا الاشتىڭ تۋىن اسپانداتىپ جۇرگەن اتپال ازامات, چەمپيون گەننادي گولوۆكين دە يە بولدى.
– بۇگىن ءۇش باتىر قاراعاندى وبلىسىنىڭ قۇرمەتتى ازاماتى اتاندى. ءبىرى – وزدەرىڭىز بىلەتىن سىيلى اعامىز كامالي جۇماتاي ۇلى. حالىق قاھارمانى, گەنەرال مۇحتار التىنباەۆتىڭ ورنى ءبىر بولەك. جانە الەم تانيتىن گەننادي گولوۆكينگە قۇرمەتتى ازامات اتاعىن بەرۋدىڭ ورايى كەلىپ تۇر. جۇرت بىلەتىندەي, گەننادي كەزەكتى جەكپە-جەگىنە دايىندالۋ ءۇشىن جاتتىعۋ جيىنىندا ءجۇر. بۇيىرتسا, قاراعاندىعا كەلەدى دەپ ويلايمىن. سالتاناتتى راسىمدە اتاقتى تاپسىرامىز, – دەدى وبلىس اكىمى.
توپتامانى دايىنداعان ميراس اسان, «ەگەمەن قازاقستان»
قاراعاندى وبلىسى
سۋرەتتەردى تۇسىرگەن دميتري كۋزميچەۆ