دۇنيەجۇزىلىك ساۋدا ۇيىمى (دسۇ) مينيسترلەر كونفەرەنتسياسىنىڭ بۋەنوس-ايرەستە (ارگەنتينا) وتكەن پلەنارلىق وتىرىسىندا قازاقستاندىق دەلەگاتسيانىڭ باسشىسى, ەلىمىزدىڭ جەنەۆاداعى بۇۇ بولىمشەسىنىڭ جانە باسقا دا حالىقارالىق ۇيىمدار جانىنداعى تۇراقتى وكىلى, ەلشى جانار ايتجانوۆا پرەزيدەنت نۇرسۇلتان نازارباەۆتىڭ باسشىلىعىمەن جۇرگىزىلىپ وتىرعان ساياساتقا سايكەس, ەلىمىزدىڭ جاھاندىق ساۋداعا ودان ءارى ينتەگراتسيالانۋدى ۇستاناتىنىن اتاپ ءوتتى.
بۇدان بۇرىن نايروبيدە وتكەن مينيسترلەر كونفەرەنتسياسىندا قازاقستان ەكسپورتتىق باسەكەلەستىك تۋرالى تاريحي شەشىم قابىلدانعانىن قولداپ, قازىرگى تاڭدا ونىڭ دسۇ-عا مۇشە ەلدەر تاراپىنان ۋاقتىلى جۇزەگە اسىرىلاتىنىنا ءۇمىت ارتقان بولاتىن. تۇراقتى وكىل بۇل ماسەلە قازاقستان ءۇشىن ۇلكەن قىزىعۋشىلىق تۋدىراتىنىن جەتكىزدى. ويتكەنى دسۇ-عا قوسىلۋ بارىسىندا ەلىمىزدىڭ تەڭىزگە شىعۋ مۇمكىندىگى جوق ەكەنىنە قاراماستان, قازاقستان ەكسپورتتىق سۋبسيديالاردان باس تارتۋعا ءماجبۇر بولدى. وسى ورايدا قازاقستان باسقا ەلدەردى دسۇ-نىڭ جاڭا مۇشەلەرىنە قاتىستى بىركەلكى باسەكەلەستىك الاڭىن قۇرۋعا شاقىرادى.
ج.ايتجانوۆا دوحا راۋندى شەڭبەرىندەگى ۇزاققا سوزىلىپ كەتكەن ساۋدا كەلىسسوزدەرى بويىنشا كونسەنسۋستىڭ بولماۋىنا قاراماستان, دسۇ-عا مۇشە ەلدەر قازىرگى سىندارعا جاۋاپ ىزدەۋدى باستاۋ قاجەتتىگىن باسىپ ايتتى. بۇل تەز وزگەرەتىن ەكونوميكالى ورتادا ەرەكشە ماڭىزعا يە بولىپ وتىر, ويتكەنى ەلەكتروندى ساۋدا, ينۆەستيتسيالارعا قولداۋ كورسەتۋ, شاعىن جانە ورتا كاسiپورىنداردىڭ حالىقارالىق ساۋداعا ينتەگراتسيالانۋى, سونداي-اق اشىقتىققا قويىلاتىن تالاپتاردى كۇشەيتۋ سياقتى جاڭا تاقىرىپتار بويىنشا تالقىلاۋلاردى كەيىنگە قالدىرۋ قازىرگى قالىپتاسىپ وتىرعان جاعدايدا دسۇ-نى ناقتىلىعى مەن وزەكتىلىگى تومەن ۇيىمعا اينالۋىنا اكەلۋى مۇمكىن. قازاقستاندىق ديپلومات ەلىمىزدىڭ قىزمەت كورسەتۋ سالاسىندا ىشكى رەتتەۋ ەرەجەلەرىن ازىرلەۋ بويىنشا كوپجاقتى كەلىسسوزدەردىڭ قايتا باستالۋىن قۇپتايتىنىن دا ءسوز ەتتى. بۇل قازاقستاننىڭ ۇلتتىق ەكونوميكالىق مۇددەلەرىنە تولىق سايكەس كەلەدى.
سونىمەن قاتار وتاندىق دەلەگاتسيا باسشىسى قازىرگى تاڭدا قازاقستان ەكونوميكاسىنىڭ بارلىق سالالارىن جانە الەۋمەتتىك ءومىردىڭ ءارتۇرلى اسپەكتىلەرىن قامتيتىن تسيفرلاندىرۋ باعدارلاماسىن جۇزەگە اسىرىپ جاتقانىن حابارلادى. وسىعان بايلانىستى ءبىزدىڭ ەل دسۇ-نىڭ ەلەكتروندى ساۋدانى دامىتۋ ءۇشىن اشىق, كەمسىتپەيتىن جانە بولجامدى عالامدىق ەرەجەلەردى ىلگەرىلەتۋدەگى ماڭىزدى ءرولىن مويىندايدى.
مينيسترلەر كونفەرەنتسياسى دسۇ-نىڭ ەكى جىلدا ءبىر مارتە وتكىزىلەتىن جوعارى باسقارۋشى ورگانى بولىپ تابىلادى. ونىڭ قۇزىرەتىنە مينيسترلەردىڭ ۇيىم قىزمەتىنىڭ باسىم باعىتتارى بويىنشا شەشىمدەر قابىلداۋ كىرەدى. ادەتتە كونفەرەنتسيانىڭ نەگىزگى ماقساتى دسۇ-عا مۇشە ەلدەردىڭ حالىقارالىق ساۋدانىڭ جاڭا رەتتەۋشى نورمالارى مەن ەرەجەلەرى بويىنشا كەلىسىمدەرگە قول جەتكىزۋ, سونداي-اق ۇيىمنىڭ بولاشاق جۇمىسىنىڭ جالپى باعىتىن كەلىسۋ بولىپ تابىلادى.
«ەگەمەن-اقپارات»