دۇنيەجۇزىلىك بانك ۆاشينگتونداعى شتاب-پاتەرىنىڭ ءماجىلىس زالىن قازاقستاننان شىققان قىزمەتكەرى الما ورازالينوۆانىڭ ەسىمىمەن اتادى. بۇل قازاق قىزىنىڭ بانكتىڭ دامۋىنا قوسقان اۋقىمدى ۇلەسىن ماڭگى ەستە ساقتاۋ ءۇشىن جاسالعان قادام, دەپ حابارلايدى «حابار» ارناسى.
ۆاشينگتونداعى بۇكىلالەمدىك بانكتىڭ شتاب پاتەرىنە كىرۋ وڭاي ەمەس. ستراتەگيالىق ماڭىزدى نىسان بولعاندىقتان باق وكىلدەرى ءۇشىن جابىق. مىنە وسى ورىندا قازاق قىزىنىڭ ەڭبەگى ەرەكشە باعالانىپ, دارىپتەلىپ كەلەدى. سەبەبى قانداسىمىز بانكتىڭ دامۋىنا زور ۇلەس قوسقان.
ول ماسكەۋ مەملەكەتتىك ۋنيۆەرسيتەتى مەن ماسساچۋسەتس تەحنولوگيالىق ينستيتۋتىن بىتىرگەن. وتانداسىمىز وزىنە جۇكتەلگەن كەز كەلگەن تاپسىرمانى تاپ-تۇيناقتاي ورىنداپ, ۇجىمىندا زور ابىروي-بەدەلگە يە بولدى. الايدا, اۋىر دەرتكە شالدىققان الما بۇدان ەكى جىل بۇرىن قايتىس بولدى.
– الما ءالى دە ارامىزدا جۇرگەن سەكىلدى, ورنى ويسىراپ تۇر. ونىڭ ەرەن ەڭبەگى ەسكەرىلىپ, ءماجىلىس زالىنا ەسىمى بەرىلىپ وتىر. ول بۇكىلالەمدىك بانكتە سينديكاتسيا جانە يسلامدىق قارجىلاندىرۋ پروتسەسى بويىنشا قاجىرلى جۇمىس ىستەدى. سونداي-اق, مۇندا قىزمەت ەتكەن العاشقى قازاق قىزى بولدى, – دەپ ەسكە الدى الما ورازالينوۆانىڭ بۇرىنعى ارىپتەسى دجەين كلەمەنت.
– المامەن سەگىز جىل قىزمەتتەس بولدىم. ونىڭ كاسىبيلىگى بارىمىزگە بەلگىلى. وسىنداي ىسكەرلىگىنىڭ ارقاسىندا ءبىراز نارسەنى ۇيرەتىپ كەتتى. وعان دەگەن قۇرمەتىم شەكسىز, – دەدى يانگ دجين.
ال بۇكىلالەمدىك بانكتىڭ رەسۋرستاردى باسقارۋ جونىندەگى مامانى زاۋرە شۆەيد وتانداسىمىزدىڭ ورنىن ەشكىم باسا المايتىنىن ايتتى.
– الما ساندارعا, ەسەپكە جۇيرىك ەدى. ءتىپتى, ءومىرىنىڭ سوڭعى كۇندەرىندە دە ماتەماتيكالىق فورمۋلالاردى الدىرتىپ, شىعاراتىن. ول ءوز ءىسىنىڭ كاسىبي مامانى بولدى. ەسەپ شىعارىپ وتىرىپ, جانى جاي تاباتىن. وسى ارقىلى سىرقاتىن ءبىر ساتكە ۇمىتۋعا تىرىساتىن, – دەيدى زاۋرە شۆەيد.
الما دامۋشى ەلدەر ءۇشىن كوپتەگەن ماڭىزدى جوبالاردى جۇزەگە اسىرا ءبىلدى. ونىڭ يگى باستامالارى ءالى كۇنگە دەيىن جالعاسىن تاۋىپ كەلەدى. ەندى المانىڭ اتىنداعى اۋديتوريادا جاعدايى تومەن جاندارعا كومەك كورسەتۋدى كوزدەگەن ماڭىزدى شەشىمدەر قابىلدانىپ ءجۇر.