قوستانايدا ىسكە قوسىلعان قاراقۇمىق وڭدەۋ زاۋىتى تاۋەلسىزدىك كۇنى مەرەكەسىنە تارتۋ بولدى.
جوبانىڭ قۇنى 700 ميلليون تەڭگەنى قۇرايدى. ونىڭ جارتىسىن «سبەربانك» سالسا, جارتىسىن وسى زاۋىتتى اشىپ وتىرعان «ميبەكو» كاسىپورنىنىڭ ء وزى قوستى. «دامۋ» كاسىپكەرلىكتى دامىتۋ قورى كاسىپورىن نەسيەسىنىڭ جارتىسىن جابۋعا 180 ميلليون تەڭگە ءبولىپ وتىر. وبلىس اكىمى ارحيمەد مۇحامبەتوۆ زاۋىتتى سالتاناتتى تۇردە ىسكە قوستى.
«زاۋىتتىڭ ىرعاقتى جۇمىس ىستەيتىنىنە سەنىم بىلدىرەمىن. ەڭ باستىسى زاۋىت بىلىكتى ماماندارمەن قامتاماسىز ەتىلگەن. قۋاتى دا جاقسى. ەندى كاسىپورىننىڭ ەكسپورتتىڭ الەۋەتى ارتاتىن بولادى» دەدى ارحيمەد بەگەجان ۇلى.
«ميبەكو» جشس ديرەكتورى حاليم قادىروۆ زاۋىت ءبىر جىلدا 16 مىڭ توننا ءونىم شىعاراتىنىن ايتتى. بۇل قازاقستاننىڭ سولتۇستىك وبلىستارىنداعى قاراقۇمىق, جاسىمىق, ارپا, بۇرشاق, تاعى باسقا دا ءدان وڭدەيتىن ءبىرىنشى زاۋىت بولىپ وتىرعانىمەن دە ەرەكشە. وعان جابدىقتار رەسەيدەن, ۋكراينادان, گوللانديادان اكەلىندى.
زاۋىتتا 32 جۇمىس ورنى اشىلدى. زاۋىت شىعارعان قاراقۇمىق جارماسى تەك قازاقستان نارىعىنا عانا ەمەس, ازەربايجان, تۇرىكمەنستان, تاجىكستان, قىرعىزستانعا ارتىلادى, سونىمەن قاتار الداعى ۋاقىتتا اۋعانستان نارىعىنا شىعۋ دا جوسپاردا بار.
ءنازيرا جارىمبەت, «ەگەمەن قازاقستان»
قوستاناي