وڭتۇستىك قازاقستان وبلىسى تابيعي ءوسىم, ياعني بالا تۋ كورسەتكىشى بويىنشا ەلىمىزدە كوش باستاپ تۇر. ياعني, بالاباقشا, مەكتەپ كوپتەپ سالىنۋى ءتيىس.
مەكتەپكە دەيىنگى مەكەمەلەرگە سۇرانىس اۋدانداردا دا بارشىلىق. دەگەنمەن, سوڭعى جىلدارى مەملەكەتتىك-جەكەمەنشىك ارىپتەستىك اياسىندا اشىلعان بالاباقشالار ەسەبىنەن دە تۇرعىندار سۇرانىسىن قامتاماسىز ەتۋ ماسەلەسى شەشىمىن تابۋدا.
ماسەلەن, مەملەكەتتىك «بالاپان» باعدارلاماسى اياسىندا وسى ۋاقىتقا دەيىن تۇلكىباس اۋدانىندا 37 بالاباقشا اشىلعان. قازىرگى تاڭدا اۋدانداعى 3-6 جاستاعى بالالاردى مەكتەپكە دەيىنگى تاربيەمەن جانە وقىتۋىمەن قامتۋ 92,6 پايىزدى قۇراپ وتىر. الداعى ۋاقىتتا مەملەكەتتىك-جەكەمەنشىك ارىپتەستىك بويىنشا سالىناتىن بالاباقشالاردى كوبەيتىپ, كورسەتكىشتى 100 پايىزعا جەتكىزۋ كوزدەلۋدە.
تۇلكىباس اۋدانىنا ءىس-ساپارمەن بارعان وڭتۇستىك قازاقستان وبلىسىنىڭ اكىمى جانسەيىت تۇيمەباەۆ اقبيىك اۋىلىنداعى مەملەكەتتىك-جەكەمەنشىك ارىپتەستىك رەتىندە سالىنعان 100 ورىندىق بالاباقشانىڭ اشىلۋىنا قاتىستى. اۋىل تۇرعىندارىن جاڭا نىساننىڭ اشىلۋىمەن قۇتتىقتادى. جاڭا اشىلعان مەكەمەدە اۋىلدىڭ 31 تۇرعىنى جۇمىسپەن قامتىلعان. «روپروەكت» جشس مەردىگەر مەكەمەسى قۇرىلىسىن جۇرگىزگەن نىساننىڭ جالپى سمەتالىق قۇنى - 231 ملن. تەڭگەگە جۋىق.
سونداي-اق, وبلىس باسشىسى كەمەرباستاۋ اۋىلىنداعى كۇردەلى جوندەۋدەن وتكەن مادەنيەت ءۇيىنىڭ جۇمىسىمەن تانىستى. نىساندى كۇردەلى جوندەۋدەن وتكىزۋ ءۇشىن جەرگىلىكتى بيۋدجەتتەن 57 ملن. تەڭگەگە جۋىق قارجى جۇمسالعان. جوندەۋ جۇمىستارىن مەردىگەر «بيميرقۇرىلىس» جشس-ءى جۇرگىزىپتى. قازىرگى تاڭدا 300 ورىندىق مادەنيەت ۇيىندە 2 قىزمەتكەر جۇمىس ىستەيدى.
عالىمجان ەلشىباي, «ەگەمەن قازاقستان»