ماڭعىستاۋ وبلىستىق ءماسليحاتىنىڭ كەزەكتى 15-سەسسياسىندا 2018-2020 جىلدارعا ارنالعان ءوڭىر بيۋدجەتىنىڭ جوباسى بەكىتىلدى. بۇل تۋرالى رەداكتسيا تىلشىسىنە ماڭعىستاۋ وبلىسى اكىمىنىڭ ءباسپاسوز قىزمەتى حابارلادى.
- وسى جىلعى بيۋدجەت تۇسىمدەرىنىڭ ورىندالىسى 127 ملرد.تەڭگەنى قۇرادى. وسىعان وراي, 2018 جىلعا وبلىس بيۋدجەتىنىڭ كىرىستەرى 7% وسىممەن 137,2 ملرد. تەڭگە كولەمىندە بولجاندى. بۇل قاراجاتقا 15 ملرد. تەڭگە كولەمىندە رەسپۋبليكالىق بيۋدجەتتەن بەرىلەتىن نىسانالى ترانسفەرتتەر مەن بيۋدجەتتىك كرەديتتەر ەسەپكە الىندى, دەدى وبلىس اكىمىنىڭ ورىنباسارى شولپان ىلمۇحانبەتوۆا.
وسىلايشا, 2018 جىلعا ارنالعان وبلىس بيۋدجەتىنىڭ جالپى كولەمى 152,2 ملرد. تەڭگەنى قۇرايتىن بولادى. اتالعان قاراجات كەلەسى سالالارعا بولىنبەك.
مەملەكەتتىك قىزمەتكەرلەرگە ەڭبەكاقى تولەۋدىڭ جاڭا جۇيەسىن ەنگىزۋ بويىنشا پيلوتتىق جوبانى ىسكە اسىرۋعا 2,5 ملرد. تەڭگە قارالىپ وتىر. قازىرگى تاڭدا, مەملەكەتتىك قىزمەت ىستەرى اگەنتتىگى «100 ناقتى قادام» ۇلت جوسپارى اياسىندا, مەملەكەتتىك قىزمەتشىلەردىڭ ەڭبەكاقىسىن فاكتورلىق-بالدىق شكالا بويىنشا تولەۋگە ءوتۋ جونىندەگى جۇمىستار جۇرگىزۋدە. جالپى, سيپاتتاعى مەملەكەتتىك قىزمەت ءۇشىن بولجانعان قارجى كولەمى 4,6 ملرد. تەنگە.
قوعامدىق ءتارتىپ پەن قاۋىپسىزدىكتى قامتاماسىز ەتۋگە 5,3 ملرد. تەڭگە جوسپارلانىپ وتىر. ونىڭ ىشىندە, ىشكى ىستەر ورگاندارى قىزمەتكەرلەرىنىڭ بىلىكتىلىگى ءۇشىن ۇستەمەاقى مولشەرلەرىن ۇلعايتۋعا جانە لاۋازىمدىق جالاقىلارىن كوتەرۋگە رەسپۋبليكالىق بيۋدجەتتەن 426 ملن. تەڭگە قاراستىرىلدى.
ءبىلىم بەرۋگە دە ايتارلىقتاي باسىمدىق بەرىلمەك. سالاداعى ءىس-شارالاردى ورىنداۋعا 59,7 ملرد. تەڭگە جوسپارلانعان. بالالاردى مەكتەپكە دەيىنگى تاربيەلەۋمەن تولىق قامتۋدى قامتاماسىز ەتۋ ماقساتىندا «بالاپان» سالالىق باعدارلاماسى بويىنشا قولداۋ جالعاسپاق. وبلىس بويىنشا بوبەكجاي سانى 117 بىرلىكتەن 258 بىرلىككە دەيىن ارتىپ, قامتۋ كورسەتكىشى 50%-دان 93%-عا ءوستى. وسىعان بايلانىستى, بالاباقشالاردىڭ جۇمىسىن قامتاماسىز ەتۋگە 10,4 ملرد. تەڭگە قارالعان. ال, ورتا ءبىلىم بەرۋگە 40 ملرد. تەڭگە قارالدى. اتالعان قاراجات نەگىزىنەن ءۇش اۋىسىمدى وقۋدى بولدىرماۋ ماقساتىندا جۇمسالماق.
دەنساۋلىق ساقتاۋ سالاسىنا 2,8 ملرد. تەڭگە قارالىپ وتىر. دامۋ بيۋدجەتى بويىنشا 150 ورىندىق انا مەن بالانى قورعاۋ ورتالىعىنىڭ قۇرىلىسىن اياقتاۋعا 942 ملن. تەڭگە جانە مۇنايلى اۋدانىندا 150 ورىندىق ورتالىق اۋرۋحانا قۇرىلىسىنىڭ جوبالىق-سمەتالىق قۇجاتتاماسىن تۇزەتۋگە 10 ملن. تەڭگە قاراستىرىلدى.
مادەنيەت, سپورت جانە تۋريزمگە جوسپارلانعان قارجى 7,8 ملرد. تەڭگەنى قۇرايدى. ونىڭ ىشىندە مەملەكەتتىك-جەكەمەنشىك ارىپتەستىگى مەحانيزمى بويىنشا اقتاۋ قالاسىنداعى مۇز سارايىنىڭ قۇرىلىسىن قوسا قارجىلاندىرۋعا - 1,2 ملرد. تەڭگە قارالعان.
ءوڭىر ەكونوميكاسى دامۋىنىڭ ماڭىزدى باعىتتارىنىڭ ءبىرى – اۋىل شارۋاشىلىعى, قورشاعان ورتانى قورعاۋ جانە جەر قاتىناستارى. كەلەسى جىلعا جوسپارلانعان قارجى كولەمى 3 ملرد. تەنگە. ونىڭ ىشىندە اگروونەركاسىپ كەشەنىن سۋبسيديالاۋعا 1 ملرد.تەڭگە جانە قورشاعان ورتانى قورعاۋ بويىنشا iس-شارالارعا 287 ملن.تەڭگە. «ارۋانا» اسىل تۇقىمدى تۇيە ساتىپ الۋ جوباسىن جالعاستىرۋعا 77 ملن. تەڭگە جوسپارلانىپ وتىر.ءبىزدىڭ وڭىردە اۋىلدىق ەلدى مەكەندەردى اۋىز سۋمەن قامتۋ ەڭ وزەكتى ماسەلە ەكەنى بەلگىلى. سوندىقتان «اق بۇلاق» باعدارلاماسى اياسىندا جوبالاردى قارجىلاندىرۋعا 4 ملرد. تەڭگە كوزدەلگەن. ونىڭ ىشىندە 2,3 ملرد. تەڭگە رەسپۋبليكالىق بيۋدجەت ترانسفەرتتەرى. بۇل قاراجاتقا كەلەسى جىلى 5 اۋدانداعى 10-نان استام اۋىلدى سۋمەن قامتۋ جوسپارلانىپ وتىر. سونىمەن قاتار, جاڭاوزەن كالاسىنداعى سۋ تازارتۋ يماراتىنىڭ, «قازبا-اقشىمىراۋ» جانە «باسقۇدىق-بەكى» ماگيسترالدى سۋ قۇبىرلارى قۇرىلىسىن قارجىلاندىرۋ دا جوسپارلانعان. بيۋدجەت زاڭناماسىنا ەنگىزىلگەن جاڭا وزگەرىستەردىڭ ەڭ ماڭىزدىسى - بيۋدجەتتىڭ 4-ءشى دەڭگەيىنىڭ ەنگىزىلۋى. 2018 جىلدىڭ 1 قاڭتارىنان باستاپ حالىق سانى 2 مىڭنان اساتىن ەلدى مەكەندەردىڭ ءوز دەربەس بيۋدجەتى بولادى. وبلىستا دەربەس بيۋدجەت 30 اۋىلدا جانە 1 قالادا ەنگىزىلمەك. دەربەس بيۋدجەتكە 11 كىرىس پەن 19 شىعىس تۇرلەرى بەرىلەدى. سونىمەن بىرگە, پرەمەر-مينيستر ساپارى اياسىندا ماڭعىستاۋ وبلىسىنىڭ وزەكتى ماسەلەلەرىنىڭ كەشەندى جوسپارى جاساقتالعان بولاتىن. جوسپارعا جالپى قۇنى 97 ملرد. تەڭگە بولاتىن 67 جوبا ەنگىزىلىپ, ورتالىق قۇزىرلى ورگاندارمەن كەلىسىلدى. جيىندا ءسوز العان ايماق باسشىسى رەسپۋبليكالىق بيۋدجەتتەن بولىنەتىن 97 ملرد.تەڭگەنىڭ اۋقىمدى قاراجات ەكەنىن ايتتى. «9 اي ىشىندە 1360 تاپسىرما بەردىم. ونىڭ قازىرگى تاڭدا 460-سى ورىندالدى. حالىققا قاجەتتى الەۋمەتتىك نىساندار سالىنىپ, تۇرعىنداردىڭ قاجەتتىلىگىنە وراي ۇسىنىستار ورىندالدى. اتالعان سومانى ەندى وسىنداي ماڭىزدى جوبالاردى جۇزەگە اسىرۋعا قاراستىرۋ كەرەك. اسىرەسە, بىزدە دامۋى ءتيىس اۋىلشارۋاشىلىعى سالاسىنا كوڭىل ءبولۋ كەرەك دەپ سانايمىن»,-دەدى.
سەسسيادا دەپۋتاتتار دا ءوز ۇسىنىستارىن جەتكىزدى. ماسەلەن, جاڭاوزەندە قوعامدىق كولىكتەر سانىن ارتتىرىپ, وبلىستا مارشرۋتتار باعىتىن كوبەيتۋ كەرەك. اسىرەسە, «اقتاۋ-بەينەۋ-اتىراۋ» باعىتىنا اۆتوبۋستاردى جۇرگىزۋدى جولعا قويۋ قاجەت. سونىمەن بىرگە, ايماقتاعى ماڭىزى بار تاسجولداردىڭ كەشەندى جوباسىن جاساقتاۋ كەرەك.
وبلىس اكىمى ەرالى توعجانوۆ ورىنباسارلارى مەن باسقارما باسشىلارىنا اتالعان ۇسىنىستاردى مۇقيات قاراپ, ءتيىستى شارالار قابىلداۋدى تاپسىردى.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى