16 جەلتوقسان – قازاقستان رەسپۋبليكاسىنىڭ تاۋەلسىزدىك كۇنى قارساڭىندا شىمكەنت قالاسىنىڭ «اباي» ساياباعىندا ەلىمىزدە العاش رەت مەديتسينا قىزمەتكەرلەرىنىڭ اللەياسى پايدالانۋعا بەرىلدى.
بۇل اللەيا ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا وبلىستىق دەنساۋلىق ساقتاۋ باسقارماسىنىڭ قولداۋىمەن «وڭتۇستىك» مەديتسينا قىزمەتكەرلەرىنىڭ قوعامدىق بىرلەستىگىنىڭ» باستاماسىمەن بوي كوتەردى.
اللەيا ءۇش بولىكتەن تۇرادى. ءبىرىنشى تاستا قازاقستان رەسپۋبليكاسى دارىگەرلەرىنىڭ انتىنان ءۇزىندى كەلتىرىلگەن. ەكىنشى ۇلكەن تاستا قازاقتىڭ العاشقى شيپاگەرى 95 جىل عۇمىر كەشكەن, وسىدان 525 جىل بۇرىن ومىردەن وتكەن, حالقىمىزعا وشپەس مۇرا قالدىرعان, دەنساۋلىق سالاسىندا ءوز زامانىنىڭ تارلانى بولعان وتەيبويداق تىلەۋقابىل ۇلىنىڭ ءمۇسىنى ورناتىلعان. ال ءۇشىنشى تاس بەلگى وزگەنى قۇتقارامىن دەپ ءوز جانىن پيدا ەتكەن مەديتسينا قىزمەتكەرلەرىنە ارنالعان.
وتكەندى جاڭعىرتىپ, ەسكە الاتىن ەسكەرتكىشتىڭ اشىلۋىنا وبلىس اكىمى ج.تۇيمەباەۆ, وبلىستىق ءماسليحاتتىڭ حاتشىسى ق.بالابيەۆ, ارداگەرلەر كەڭەسىنىڭ توراعاسى ج.ماۋلەنقۇلوۆ, «نۇر وتان» پارتياسىنىڭ وبلىستىق فيليالىنىڭ ءبىرىنشى ورىنباسارى ن.جولداسوۆ, وبلىستىق ءماسليحات دەپۋتاتتارى مەن مەديتسينا قىزمەتكەرلەرىنىڭ ارداگەرلەرى, وبلىستىق, قالالىق جانە اۋداندىق اۋرۋحانالاردىڭ باس دارىگەرلەرى, مەديتسينالىق جوعارى جانە ورتا ءبىلىمدى وقۋ ورىندارىنىڭ قىزمەتكەرلەرى مەن ستۋدەنتتەرى قاتىستى.
بۇل ەسكەرتكىش بۇكىل وڭتۇستىك ءوڭىرىنىڭ مەديتسينا قىزمەتكەرلەرىنىڭ ىنتىماعى مەن بىرلىگىن ايعاقتايتىن «سيمۆول» ەكەنىن ايتقان ايماق باسشىسى ەسكەرتكىشتى ورناتۋعا ۇلەس قوسقان بارشا ازاماتتارعا العىسىن ءبىلدىردى.
دەمەۋشىلەردىڭ ەسەبىنەن سالىنعان بۇل اللەياعا تانىمال ساۋلەتشى اسقار مامىرباەۆ, ءمۇسىنشى ابدىكارىم احمەتوۆ جانە قۇرىلىسشى رۋسلان يسكاكوۆتىڭ ەڭبەكتەرى ءسىڭدى.