تەمىر جولمەن جارىسا سوزىلىپ جاتقان قارا جولعا كوز تىگىپ ۇزاق قارادىڭ. مىنا پويىزدىڭ ءىش پىستىرار ىرعاعىنان مەزى بولا باستاعانىڭ با, تۇسە سالىپ جۇگىرە جونەلگىڭ كەلدى. بىراق ول جولدىڭ بۇدان دا قيىن, بۇدان دا ۇزاق بولارىن سەزىپ, كوڭىل تۇكپىرىنەن قىلت ەتكەن قىسىراق-قيالدىڭ تىزگىنىن تەز تارتا قويدىڭ.
الايدا قىسىراق-قيال دا قىرسىق; بۇلقىنىپ, جۇلقىنىپ, ساعان دەس بەرگىسى كەلمەي, قارا جولعا قاراي ەنتەلەيدى.
بۇدان جاستاۋ كەزىڭدە سەن دە وسى قارا جولدارمەن سان رەت ساپارعا شىققانسىڭ. سوندا: «تەمىر جولعا جاقىن جەردىڭ وي-شۇقىرى كوپ بولادى», دەۋشى ەدى جانىڭداعى جىگىتتەر.
سىمداي تارتىلعان قوس رەلستىڭ ۇستىمەن جۇيتكىگەن پويىزداردى كورگەندە قارا جولدىڭ قوتىر-شوتىرى شىنىندا دا كوبەيىپ كەتەتىن شىعار, كىم ءبىلسىن. سول كەزدە سەن ويلاۋشى ەڭ: «شىركىن-اي, اناۋ جۇمساق تا جايلى ۆاگوندا تەربەلىپ بارا جاتقان جولاۋشىلاردا ارمان جوق!», دەپ.
ەندى مىنە, ءوزىڭ دە ەسەيىپ, كىسى بولعان شاعىڭدا سول ۆاگونداردىڭ بىرىندە تەربەتىلىپ كەلە جاتىپ ءباز-باياعى قارا جولعا قىزىعىپ قارايسىڭ. سەنىڭشە ءبىزدىڭ قازاقى مىنەزىمىز, ەجەلگى تۇرمىس-سالتىمىز تەمىر جولدان گورى قارا جولعا جاقىن. سەبەبى سول باياعى سوقپاق جول, سۇرلەۋ جول, كىرە جولداردىڭ ەڭ سوڭعى ۇرپاعى دا وسى – تەمىر جولمەن جارىسىپ جاتقان قارا جول. قانىڭا تارتىپ, قايتا-قايتا اڭساي بەرەتىنىڭ دە سودان بولار-اۋ.
نۇرعالي وراز, «ەگەمەن قازاقستان»