بۇگىن استانادا ەلباسى نۇرسۇلتان نازارباەۆتىڭ «تاۋەلسىزدىك ءداۋىرى» اتتى كىتابىنىڭ تۇساۋكەسەر ءراسىمى ءوتتى.
سالتاناتتى ءىس-شارادا قازاقستان رەسپۋبليكاسىنىڭ پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى سانات كوشكىمباەۆ ءسوز ويلەپ, كىتاپ تۋرالى پىكىر ءبىلدىردى. «كىتاپ وتە قىزىقتى ءارى جاندى ستيلدە جازىلعان. پرەزيدەنت جازعانداي, سىرتقى ساياسات ىشكى ساياسات بەينەسىنىڭ جالعاسى. نۇرسۇلتان نازارباەۆ ۇستانىپ وتىرعان ىشكى ساياسات - قازاقستاندىق كوپۆەكتورلى ديپلوماتيانىڭ جارقىن مودەلى. كىتاپتا بۇل تەرميندى ءجيى كەزدەستىرۋگە بولادى. مەنىڭ ويىمشا, مەملەكەتىمىزدە بولعان جاڭعىرتۋ كەزەڭدەرىنىڭ ۇشەۋى دە ىشكى ساياسي جەتىستىكتەرىمەن ۇيلەسىپ وتىرعانى تەگىننەن-تەگىن ەمەس», - دەدى ول. سانات كوشكىنباەۆتىڭ ايتۋىنشا, كىتاپتا مەملەكەتتىڭ ىشكى ساياساتىنىڭ جارقىن جەتىستىكتەرى, ىشكى ساياسي جانە ىشكى ەكونوميكالىق وزگەرىستەردىڭ قالاي جۇزەگە اسىرىلعانى باياندالعان. سونىمەن قاتار ايماقتىق قاۋىپسىزدىك ماسەلەسى دە كەڭىنەن تالدانعان.
سانات كوشكىنباەۆ ءوز سوزىندە ىشكى ساياسي جەتىستىكتەر كەيدە مەملەكەتتەگى وزگەرىستەردىڭ يمپۋلسىنە, كەيبىر سالالاردا دامۋ درايۆەرىنە اينالعانىن اتاپ ءوتتى. ونىڭ ايتۋىنشا, قازاقستاننىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا, يسلام ىنتىماقتاستىق ۇيىمىنا توراعالىق ەتكەنى دە ەلىمىزدىڭ ساياسي تارحىندا ەرەكشە اتاپ وتەتىن كەزەڭگە اينالعان.
«قازاقستان حالىقارالىق ارەنادا كوپتەگەن مەملەكەتتەرمەن ەكىجاقتى جانە كوپجاقتى ديپلوماتيالىق قارىم-قاتىناس ورناتقان. سونىمەن قاتار قازاقستانىنڭ باعىت-باعداردىڭ ءبىرى رەتىندە ازياداعى ءوزارا ىقپالداستىق جانە سەنىم شارالارى جونىندەگى كەڭەس (اوسشك) بولعانى تەگىن ەمەس. سونىمەن قاتار پرەزيدەنت نۇرسۇلتان نازارباەۆتىڭ ورتالىق ازياداعى ينتەگراتسيالىق باستامالارى دا مەملەكەتتى العا جەتەلەر تاعى ءبىر ارتىقشىلىققا اينالدى. 1993 جىلى تاشكەنتتە وتكەن سامميتتەن بەرى پرەزيدەنتىمىزدىڭ ۇسىنىسىمەن قازاقستان مەن بىزگە كورشىلەس مەملەكەتتەر «ورتالىق ازيا» ايماقتارى اتالا باستادى. ارينە, بۇل باستاما كەڭەس وداعى كەزىندە دە ايتىلعان. بىراق ءبىر مەملەكەت قولداسا, ەكىنشىسى قولداماي, ول جۇزەگە اسىرىلماعان ەدى. ال قازاقستان وسى ۋاقىتقا دەيىن ورتالىق ازياداعى ەلدەرمەن قارىم-قاتىناس جاساۋدىڭ ينتەگراتسيالىق مودەلىن ۇستانىپ كەلەدى. ارينە, قيىندىقتار از بولعان جوق. بىراق, 26 جىلدىڭ ىشىندە وسىناۋ ينتەگراتسيالىق ستراتەگيا ءوزىنىڭ ومىرشەڭدىگىن دالەلدەپ بەردى», - دەي كەلە سانات كوشكىنباەۆ پرەزيدەنتتىڭ كىتابىندا وسى جانە باسقا دا ماسەلەلەردىڭ ايتىلعانىن اتاپ ءوتتى.
گۇلنۇر قۋانىشبەكقىزى,
"ەگەمەن قازاقستان"