ءبىز جاقىندا گازەت بەتىندە «الماتى جاستارى باسپانالى بولا ما؟» دەپ ساۋال تاستاي وتىرىپ, قالاداعى تۇرعىن ۇيمەن قامتۋ جاعدايىنا توقتالعان بولاتىنبىز. ايتىپ اۋىز جيعانشا, ارنايى باعدارلاما بويىنشا جاس الماتىلىقتارعا جاڭا پاتەرلەردىڭ كىلتتەرى تاپسىرىلدى.
جاس وتباسىلاردى باسپانامەن قامتۋ ماقساتىندا «الماتى جاستارى» باعدارلاماسى باستالعانىن تىلگە تيەك ەتكەنبىز. قوعام تاراپىنان قىزۋ قولداۋ تاپقان باعدارلامانى جۇزەگە اسىرۋعا جەرگىلىكتى بيۋدجەتتەن 1 ملرد. تەڭگە بولىنگەن ەكەن. ناتيجەسىندە, ەڭ قىسقا مەرزىم ىشىندە «الماتى جاستارى» جوباسىنىڭ قاتىسۋشىلارى ءۇيلى بولىپ جاتىر. الماتى اكىمدىگى مەن «تۇرعىنۇيجيناقبانكى» بىرىگىپ قولعا العان «الماتى جاستارى» باعدارلاماسى 35 جاسقا دەيىنگى جاس الماتىلىقتاردى قامتىپ وتىر. العاشقى جارناسىز-اق بەرىلەتىن نەسيە ەڭ تومەنگى پايىز بويىنشا ەسەپتەلەدى.
تاۋەلسىزدىك كۇنى قارساڭىندا وسى باعدارلاما بويىنشا كىلتتەر مەن تۇرعىن ءۇي سەرتيفيكاتتارى تابىس ەتىلدى. تۇرعىندارىنىڭ قۋانىشىن بولىسكەن قالا اكىمى باۋىرجان بايبەك:
– تۇرعىن ۇيمەن قامتاماسىز ەتۋ – بۇل جاستارعا قاتىستى ماڭىزدى ماسەلەنىڭ ءبىرى, ولاردىڭ جۇمىسقا ورنالاسۋى, ءبىلىم الۋى ۇنەمى ءجىتى نازاردا, سوندىقتان «الماتى جاستارى» باعدارلاماسىنىڭ اياسىندا جىل سوڭىنا دەيىن 100 الماتىلىق جاس وتباسى جەكە پاتەرلەرىنىڭ كىلتتەرىن الادى. جاستار باعدارلاماسى بويىنشا بەرىلگەن زاەمعا الماتىدان العاشقى ءۇيدى ساتىپ الۋعا بولادى, ال اقشا قالادا قالادى. ياعني, وسى اقشادان قۇرىلىسشىلارعا جالاقى تولەنەدى, كاسىپورىندارعا تاپسىرىس بەرىلەدى, قۇرىلىس كومپانيالارى قالا بيۋدجەتىنە سالىق تولەيدى, – دەدى.
سونداي-اق, «نۇرلى جەر» باعدارلاماسى بويىنشا سالىنعان 6 مىڭ پاتەر دە يەسىن تاپتى. جالپى, جىل قورىتىندىسى بويىنشا الماتىدا كەزەكتە تۇرعان ءاربىر ءتورتىنشى وتباسى جاڭا ۇيگە يە بولادى.
قالماحانبەت مۇقامەتقالي, «ەگەمەن قازاقستان»