ماڭعىستاۋ وبلىسىندا قر تاۋەلسىزدىك كۇنىنە وراي الەۋمەتتىك ماڭىزى بار بىرنەشە نىسان اشىلدى.
يندۋستريالاندىرۋ كارتاسى اياسىندا ماڭعىستاۋ وبلىسى اكىمدىگى, «قازمۇنايگاز» ۇك جانە «قازترانسگازايماق» اق اراسىنداعى ءۇش جاقتى مەموراندۋمعا سايكەس, شەتپە اۋىلىنا قۋاتتىلىعى ساعاتىنا – 20 000 م3 گاز جەتكىزەتىن «وكارەم – بەينەۋ» ماگيسترالدى گاز قۇبىرىنان شەتپە اۋىلىنا دەيىن 90 شاقىرىم قاشىقتىقتان تارتىلعان گاز قۇبىرى ىسكە قوسىلدى. جوبانىڭ قۇنى 5,7 ملرد تەڭگەنى قۇرايدى.
- سىزدەردى تاۋەلسىزدىك كۇنىمەن قۇتتىقتايمىن! قانشاما قيىن كەزەڭدەر باسىمىزدان ءوتتى. 90 جىلدارى قالاي بولىپ ەدى؟. قازاقستان تاۋەلسىزدىگىن نىعايتا ءبىلدى. ءىرى جوبالاردى جۇزەگە اسىرىپ, الەمدىك ارەنادا ءوز ورنى بار مەملەكەتكە اينالدى. ەلباسىنىڭ ساليقالى ساياساتىنىڭ ارقاسىندا ەلىمىزدىڭ شەكاراسى نىق بەكىدى. تۇراقتىلىق بولعان جەردە الەۋمەتتىك سۇراق تا, ەكونوميكالىق سۇراق تا شەشىلەدى دەپ ويلايمىن. مىنا ۇلكەن جوبانىڭ جۇزەگە اسىرىلۋى دا تاۋەلسىزدىكتىڭ جەمىسى. ماڭعىستاۋ اۋدانى تولىقتاي گازبەن قامتىلدى. ەندى تاعى دا وبلىستىڭ 5 اۋدانىندا جانە جاڭاوزەن قالاسىندا جالپى ۇزىندىعى 1370 شاقىرىمدى قۇرايتىن گاز قۇبىرىن تارتۋ جۇمىستارى جۇرگىزىلىپ جاتىر. جوبانى ىسكە اسىرۋعا 800 ادام جۇمىسقا تارتىلدى. نىسان پايدالانۋعا بەرىلگەن سوڭ 100 ادام تۇراقتى جۇمىسپەن قامتىلادى, - دەدى اۆتوماتتاندىرىلعان گاز تاراتۋ ستانتسياسىن (اگرس) ورناتۋ جۇمىسىنىڭ سالتاناتتى اشىلۋىنا قاتىسقان ايماق باسشىسى ەرالى توعجانوۆ.
مەرەكە قارساڭىندا اۋىل تۇرعىندارىنا تارتۋ رەتىندە ەسىك اشقان تاعى ءبىر نىسان شەتپە سەلوسىنداعى 50 ورىندىق «دارحان» بالاباقشاسى. جەرگىلىكتى كاسىپكەردىڭ ءوز قاراجاتىمەن سالىنعان بوبەكجاي قۇرىلىسىنا 40 ملن. تەڭگە جۇمسالىپتى.
«شاعىن جانە ورتا بيزنەستى دامىتۋ – ءححى عاسىرداعى قازاقستاننىڭ يندۋستريالدى جانە الەۋمەتتىك جاڭعىرۋىنىڭ نەگىزگى قۇرالى» - دەپ ەلباسىمىز اتاپ وتكەندەي, قاي كەزدە دە شاعىن جانە ورتا كاسىپكەرلىكتى دامىتۋ مەملەكەت ساياساتىنىڭ باستى باعىتتارىنىڭ ءبىرى بولىپ قالا بەرمەك. شاعىن جانە ورتا بيزنەستى بەلسەندى قولداۋ باعىتىنداعى جۇمىستار جالعاسىن تاۋىپ, اۋدان تاريحىندا العاش رەت شەتپە اۋىلىنان بۇقتىرىلعان ەت كونسەرۆىسىن شىعاراتىن تسەح زاۋىتى اشىلدى. كاسىپورىن تاۋلىگىنە 700 -1000 دانا مال ەتىنەن بۇقتىرىلعان كونسەرۆى دايىندايدى. شارۋا يەسى «اتامەكەن» ۇكپ ارقىلى 10 ملن تەڭگە شاعىن نەسيە الىپ جانە ءوز قاراجاتى ارقىلى تسەحتى اشىپ وتىر.
- بۇل تسەح تەك وبلىس ەمەس, ەلىمىزدىڭ باسقا اۋماقتارىن دا ساپالى ونىمىمەن قامتاماسىز ەتەتىندىگىنە سەنىم مول. ايىنا 10 مىڭ دانا كونسەرۆى شىعارىپ, 15-20 ادامدى جۇمىسپەن قامتيتىن بۇل تسەحتىڭ بولاشاعى زور بولارى ءسوزسىز. ەندەشە كاسىپورىننىڭ جۇمىسىنا تابىس تىلەپ, بۇدان دا باسقا ونىمدەر شىعارۋىنا, ءوڭىر ەكونوميكاسىنىڭ دامۋىنا ۇلەس قوساتىن كاسىپكەرلىك نىسانى بولۋىنا تىلەكتەسپىن, - دەدى وبلىس اكىمى.
سالتاناتتى راسىمنەن كەيىن ەرالى توعجانوۆ اۋىل اقساقالدارىمەن كەزدەسىپ, وبلىستىڭ الەۋمەتتىك دامۋىن ءسوز ەتتى. ايماقتا جۇزەگە اسىرىلعان ماڭىزدى ستراتەگيالىق جوبالاردى تالقىلاپ, ەكونوميكالىق كورسەتكىشتەردى ايتىپ بەردى. ال, اقساقالدار قاۋىمى ء وز ريزاشىلىقتارىن ءبىلدىرىپ, جىلى لەبىزدەرىن جەتكىزدى.
گۇلايىم شىنتەمىرقىزى, «ەگەمەن قازاقستان»
ماڭعىستاۋ وبلىسى