ورال قالاسىندا اشىلعان بۇل ورتالىقتىڭ ادەتتەگى حالىققا قىزمەت كورسەتۋ ورىندارىنان وزگەشەلىگى كوپ. مۇندا شاعىن جانە ورتا بيزنەس وكىلدەرىنە كەشەندى قىزمەت كورسەتەتىن ارنايى كەڭسە جۇمىس ىستەيدى. بۇل جەردە كاسىپكەرلىك نىسانىن اشۋ, ءىسىن جۇرگىزۋگە قاتىسى بار بارلىق مەكەمە ء«بىر تەرەزە» قاعيداسىمەن شوعىرلانعان. ياعني جەكە كاسىپكەر وسى ورتالىققا كەلىپ, بۇكىل شارۋاسىن شەشىپ كەتەدى.
بۇل جوبا قازاقستان رەسپۋبليكاسى پرەزيدەنتىنىڭ «100 ناقتى قادام» ۇلتتىق جوسپارىندا بەلگىلەنگەن تاپسىرمالاردى ورىنداۋ جولىندا جۇزەگە اسىپ وتىر.
«جاپپاي كاسىپكەرلىكتى قولداۋ تەتىكتەرىن ودان ءارى جەتىلدىرۋ كەرەك. قازاقستاننىڭ ءار ءوڭىرى جاپپاي كاسىپكەرلىكتى, سونىڭ ىشىندە وتباسىلىق كاسىپكەرلىكتى دامىتۋ باعىتىندا كەشەندى شارالار ۇسىنۋعا ءتيىس... مەملەكەتتىك قىزمەتتەر كورسەتۋ ۇدەرىسى مەيلىنشە وڭتايلاندىرىلۋعا ءتيىس. قۇجاتتاردىڭ مەرزىمى مەن تىزبەسىن قىسقارتىپ, قايتالاناتىن راسىمدەردى جويۋ كەرەك. بۇل ورايدا ادامنىڭ ءوزىنىڭ بارۋىن قاجەتسىنبەيتىن تولىق ەلەكتروندىق فورماتقا كوشىرۋ كەرەك» دەگەن بولاتىن ەلباسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا.
- ەلباسىنىڭ تسيفرلاندىرۋ تۋرالى تاپسىرماسىنا سايكەس اشىلىپ وتىرعان «Smart ورال» ورتالىعى قىزمەت كورسەتۋ ساپاسىن جەتىلدىرۋدى كوزدەيدى. مۇندا قاراپايىم حالىق پەن كاسىپكەرلەرگە دە قىزمەت كورسەتۋ ورتالىعى, سونىڭ ىشىندە «اتامەكەن» ۇلتتىق كاسىپكەرلەر پالاتاسى, «قازاقينۆەست» ۇك, جەرگىلىكتى اتقارۋشى ورگاندار مەن باسقا دا سالالاردىڭ وكىلدەرى وتىراتىن بولادى. سونداي-اق قۇقىقتىق قىزمەت كورسەتۋدىڭ دە قولجەتىمدى ءارى جەدەل بولۋىن قامتاماسىز ەتۋ ءۇشىن پروكۋراتۋرا قىزمەتكەرلەرى دە كومەك كورسەتەدى. ءبىر عانا مىسال ايتا كەتەيىن, بۇرىن كاسىپكەر جەر تەلىمىنە رۇقسات قاعازىن الۋ ءۇشىن 14 مەكەمەگە بارىپ, ارقايسىسىنا 5 كۇن جۇمسايتىن بولسا, الداعى جىلدان باستاپ وسى قىزمەتتەردىڭ ءبارىن ەلەكتروندى تۇردە بەس-اق كۇننىڭ ىشىندە الا الادى, - دەدى ورتالىقتىڭ اشىلۋ سالتاناتىنا قاتىسقان باتىس قازاقستان وبلىسىنىڭ اكىمى التاي كولگىنوۆ.
بۇل ورتالىققا كەلگەن تۇرعىندارعا قىزمەت كورسەتۋ 15-20 مينۋتتان اسپايدى دەيدى ماماندار. ەلەكتروندى كەزەك, كۇتۋ زالى قامتاماسىز ەتىلگەن. كورسەتىلەتىن قىزمەت ءتۇرى دە كوبەيىپ, 618-دەن 641-گە جەتىپتى.
«Smart ورال» ورتالىعىندا باتىس قازاقستان وبلىسى پروكۋراتۋراسىنىڭ «ازاماتتاردى قابىلداۋ ورتالىعى» دا بۇگىننەن باستاپ جۇمىس ىستەي باستادى. مۇندا ازاماتتاردى قابىلداۋ, پروكۋراتۋرا ورگاندارىنىڭ قۇزىرەتىنە جاتاتىن قۇقىقتىق سۇراقتار بويىنشا كەڭەس بەرۋ, جەكە جانە زاڭدى تۇلعالاردىڭ وتىنىشتەرىن قابىلداۋ, وبلىس, اۋدان پروكۋراتۋراسىنىڭ باسشىلارىنا قابىلداۋعا جازىلۋ, ارىز-شاعىمداردى قاراۋ ناتيجەسى بويىنشا مالىمەت جانە جاۋاپتاردىڭ كوشىرمەسىن بەرۋ, پروكۋراتۋرا عيماراتىنا كىرۋگە رۇقسات بەرۋ جانە كەلۋشىلەردى قارسىلاپ الۋ قىزمەتتەرى ۇسىنىلادى.
اتالمىش ورتالىقتا وبلىس پروكۋراتۋراسىنىڭ سالالىق قىزمەتتەرىنىڭ كەزەكشى پروكۋرورلارى, وبلىس پروكۋرورىنىڭ وتىنىشتەردى قاراۋ جانە ءىس جۇرگىزۋ بويىنشا اعا كومەكشىسى, كەڭەسشى-كونسۋلتانتتار جانە باسقا دا ماماندار قىزمەت كورسەتەدى.
باتىس قازاقستان وبلىستىق كاسىپكەرلەر پالاتاسى ورتالىعى ديرەتورىنىڭ ورىنباسارى مارات نۇرعۋاتوۆتىڭ ايتۋىنشا, كاسىپكەرلىك پەن پروكۋراتۋرا ورگاندارىنىڭ قاتار وتىرۋى كاسىپكەرلىكتى دامىتۋعا وڭ ىقپال ەتىپ, زاڭ بۇزۋشىلىق پەن قاتەلىكتىڭ الدىن الۋى ءتيىس. ال ورال قالاسىنىڭ اكىمى مۇرات مۇقاەۆ 2018 جىلى ورال قالاسىنىڭ كوپشىلىك جينالاتىن ورىندارىندا قوعامدىق WI-FI ىسكە قوسىلاتىنىن, بولاشاقتا تۇرعىندار بارلىق كوممۋنالدىق تولەمدەردى ءبىر نۇكتەدەن تولەۋ مۇمكىندىگى جاسالاتىنىن مالىمدەدى.
قازبەك قۇتتىمۇرات ۇلى, «ەگەمەن قازاقستان»