قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا تۇتىنۋشىلاردىڭ قۇقىقتارىن قورعاۋ ماسەلەلەرى قارالدى.
قابىلدانىپ جاتقان شارالار تۋرالى ۇلتتىق ەكونوميكا ءمينيسترى تيمۋر سۇلەيمەنوۆ پەن دەنساۋلىق ساقتاۋ ءمينيسترى ەلجان ءبىرتانوۆ باياندادى.
مەملەكەتتىك جانە جەرگىلىكتى اتقارۋشى ورگاندار ۇسىنعان اقپاراتقا سايكەس, 2017 جىلدىڭ ءبىرىنشى جارتىجىلدىعىندا 19 مىڭنان استام تۇتىنۋشىلىق وتىنىشتەر قارالدى. وتىنىشتەرگە سايكەس 287 اكىمشىلىك ءىس قوزعالعان.
«كەلىپ تۇسكەن وتىنىشتەردى تالداۋ ناتيجەسى قازاقستاندىق تۇتىنۋشىلاردىڭ ءوز قۇقىقتارىن بىلمەيتىنىن جانە قاشان ءارى كىممەن بايلانىسۋعا بولاتىنى تۋرالى جەتكىلىكسىز حاباردار ەكەنىن كورسەتەدى», — دەپ حابارلادى تيمۋر سۇلەيمەنوۆ.
ۇلتتىق ەكونوميكا ءمينيسترى ەلەكتروندى ساۋدانىڭ سەرپىندى دامىپ كەلە جاتقان سالالارىندا تۇتىنۋشىلاردىڭ قۇقىقتارىن قورعاۋدىڭ وتە تومەنگى دەڭگەيى بايقالاتىنىن اتاپ ءوتتى.
«ەلەكتروندىق ساۋدا سالاسىندا تاۋارلاردى ەلەكتروندىق ساتۋمەن اينالىساتىن سۋبەكتىلەردى تىركەۋ تەتىگىن ەنگىزۋدى جانە تۇتىنۋشىلاردىڭ قۇقىقتارىن جۇيەلى تۇردە بۇزاتىن سايتتارعا سوت شەشىمىمەن تىيىم سالۋدى ۇسىنامىز», — دەدى مينيستر تيمۋر سۇلەيمەنوۆ.
ۇلتتىق تۇتىنۋشىلار ليگاسىنىڭ ۇسىنىسى بويىنشا تۇتىنۋشىلاردىڭ قۇقىقتارىن قورعاۋ جونىندەگى ۇيلەستىرۋ كەڭەسى قۇرىلدى. ۇلتتىق ەكونوميكا مينيسترلىگى تۇتىنۋشىلاردىڭ قۇقىقتارىن قورعاۋ زاڭناماسىنىڭ ساقتالۋىن باقىلاۋدى جۇزەگە اسىرۋ ءۇشىن ۋاكىلەتتى ورگانعا قۇزىرەت بەرۋدى ۇسىنادى.
قر دەنساۋلىق ساقتاۋ ءمينيسترى ەلجان ءبىرتانوۆ ونىمدەردى قاۋىپسىزدىك تالاپتارىمەن قامتاماسىز ەتۋ بويىنشا قابىلدانعان شارالار تۋرالى بايانداي وتىرىپ, مينيسترلىك حالىقتىڭ سانيتارلىق-ەپيدەميولوگيالىق سالاۋاتتىلىعى, گيگيەنالىق نورماتيۆتەر جانە تەحنيكالىق رەگلامەنتتەر سالاسىندا نورماتيۆتىك-قۇقىقتىق اكتىلەردىڭ تالاپتارىن بۇزۋدى انىقتاۋعا جانە ونىڭ الدىن الۋعا باعىتتالعان باقىلاۋ جۇمىستارىن جۇرگىزىپ جاتقانىن اتاپ ءوتتى.
«كامەرالىق باقىلاۋ اياسىندا 52 مىڭنان استام تاۋار پوزيتسياسى شارتتى شىعارىلدى دەپ اكەلىنگەن سىرتقى ەكونوميكالىق قىزمەتتىڭ 50 جوسىقسىز قاتىسۋشىسى انىقتالدى, ال دەكلاراتسيالانعان جانە سەرتيفيكاتالعانى بار بولعانى – 146. وسى سەق-كە قاتىسۋشىلار اكىمشىلىك جاۋاپكەرشىلككە تارتىلدى, ماتەريالدار سوتقا بەرىلدى», — دەدى مينيستر ەلجان ءبىرتانوۆ.
سالىستىرمالى تالداۋ ەلىمىزدىڭ ىشكى نارىعىندا ايلانىستاعى بارلىق سايكەس كەلمەيتىن ونىمدەردىڭ نەعۇرلىم ۇلكەن پايىزى يمپورت ونىمدەرىنىڭ ۇلەسىنە تيەسىلى ەكەنىن كورسەتتى — 67,3%, وتاندىق وندىرۋشىلەر ءونىمى — 32,7%-دى قۇرادى.
ماسەلەنى قاراۋ قورىتىندىسى بويىنشا قر پرەمەر-ءمينيسترى ۇلتتىق ەكونوميكا مينيسترلىگىنە تۇتىنۋشىلاردىڭ قۇقىقتارىن قورعاۋ تۋرالى زاڭنامانىڭ ساقتالۋىن باقىلاۋ تەتىگىن قايتا قاراۋدى تاپسىردى — «باقىلاۋشىلاردى تەكسەرۋ» قاعيداسىن جويۋ كەرەك.
باقىتجان ساعىنتاەۆ تۇتىنۋشىلاردىڭ قۇقىقتارى ولاردىڭ جەتكىلىكسىز اقپاراتتانۋى سەبەبىنەن بۇزىلاتىنىن اتاپ ءوتتى. وسىعان وراي, دەنساۋلىق ساقتاۋ مينيسترلىگىنە حالىقتىڭ ادام ءومىرى مەن دەنساۋلىعىنا قويىلاتىن قاۋىپسىزدىك تالاپتارىنا ساي كەلمەيتىن ونىمدەر تۋرالى حاباردار بولۋىن قامتاماسىز ەتۋ تاپسىرىلدى.