پارلامەنت سەناتى حالىقارالىق قاتىناستار, قورعانىس جانە قاۋىپسىزدىك كوميتەتىنىڭ مۇشەلەرى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ىسكە اسىرۋ ماسەلەلەرىن تالقىلادى.
كوميتەت حاتشىسى دارحان كالەتاەۆ وتىرىستى اشا كەلىپ, بۇل زاڭ مەملەكەت باسشىسىنىڭ تاپسىرماسى بويىنشا قىسقا مەرزىمدە ازىرلەنىپ, قابىلدانعانىن اتاپ ءوتتى. «ەلىمىز قاۋىپسىزدىگىنىڭ زاڭنامالىق نەگىزدەرىن نىعايتۋ پارلامەنت جۇمىسىنىڭ نەگىزگى باعىتتارىنىڭ ءبىرى بولىپ تابىلادى. وسى سالاداعى زاڭنامالىق نەگىزدەردى جەتىلدىرۋ بۇل زۇلماتپەن ناتيجەلى كۇرەستىڭ كەپىلى بولا المايتىنىن ءتۇسىنۋ اسا ماڭىزدى. زاڭنامالىق نەگىزدەردى جەتىلدىرۋمەن قاتار ءتيىستى مەملەكەتتىك ورگاندار مەن ۇكىمەتتىك ەمەس ۇيىمداردىڭ, جۇرتشىلىقتىڭ, ازاماتتىق قوعامنىڭ اراسىنداعى ءوزارا ءىس-قيمىلدى كۇشەيتۋ ماسەلەلەرىنىڭ ماڭىزى زور», - دەپ اتاپ ءوتتى ول.
سەناتورلار زاڭ ەرەجەلەرىنىڭ ءتيىمدى ورىندالۋىنا, قويىلعان مىندەتتى شەشۋدەگى مەملەكەتتىك ورگانداردى ۇيلەستىرۋگە, ءدىني ەكسترەميزم مەن تەرروريزمدى ەسكەرتۋ جانە جولىن كەسۋ جونىندەگى ۇيىمداستىرۋ جانە ءىس جۇزىندەگى شارالاردى قابىلداۋعا قاتىستى بىرقاتار ساۋالدار قويدى.
ۇلتتىق قاۋىپسىزدىك كوميتەتىنىڭ ورىنباسارى نۇرعالي بىلىسبەكوۆ بايانداما جاسادى. ول ەلىمىزدە تۇراقتىلىق قامتاماسىز ەتىلگەنى, تەرروريستىك جانە ەكسترەميستىك وقيعالارعا جول بەرىلمەگەنى, 2017 جىلى تەرروريستىك سيپاتتاعى 11 زورلىقشىل وقيعانىڭ الدىن الىنعانى تۋرالى حاباردار ەتتى.
ىشكى ىستەر مينيسترلىگى ەكسترەميزمگە قارسى ءىس-قيمىل جونىندەگى دەپارتامەنت باستىعى اتىعاي ارىستانوۆ مينيسترلىك ەكسترەميزمگە جانە تەرروريزمگە قارسى ءىس-قيمىل جونىندەگى قوسىمشا جۇيەلى شارالاردىڭ كەشەندى جوسپارىن قابىلداعانىن ايتتى. «قويىلعان مىندەتتى شەشۋ اياسىندا 2016 جىلعى جەلتوقساندا ىشكى ىستەر ورگاندارىنا تەرگەۋگە جاتقىزىلعان تەرروريستىك قىلمىستاردىڭ جولىن كەسۋ جونىندەگى تاجىريبە قالىپتاستى. بيىل ەكسترەميزم جانە تەرروريزم كورىنىستەرىنە بايلانىستى 322 دەرەككە, ونىڭ ىشىندە تەرروريزمدى ناسيحاتتاۋ جونىندەگى 27 قۇقىق بۇزۋشىلىققا سوتقا دەيىنگى تەرگەۋ جۇرگىزىلدى. سونداي-اق قىلمىس جانە راديكالدىق ورتانىڭ وكىلدەرىنىڭ ورىستەۋىنە جول بەرمەۋ جونىندەگى نىسانالى شارالار جۇزەگە اسىرىلىپ كەلەدى. بيىل پايداكۇنەمدىك-زورلىقشىل قىلمىستارعا ماماندانعان جانە تەرىس اعىمداردى جاقتاۋشىلاردان تۇراتىن 22 قىلمىستىق توپ توپ ۇستالدى», - دەدى ا.ارىستانوۆ. ول بۇلدىرگىش اعىمداردى جاقتاۋشىلاردىڭ قۇقىققا قارسى ىستەرىنىڭ الدىن الۋ جانە جولىن كەسۋ جونىندەگى جۇمىستارعا جەرگىلىكتى پوليتسيامەن قوسا بارلىق ىشكى ىستەر بولىمشەلەرى تارتىلعانىن اتاپ ءوتتى.
سەناتورلار ن.نۇرسيپاتوۆ, س.جاقسىبەكوۆ, ت.مۇساباەۆ, ت.مۇقاشەۆ وسى سالانى جەتىلدىرۋ جونىندەگى ءوز ەسكەرتپەلەرى مەن ۇسىنىستارىن ايتتى. اتاپ ايتقاندا, ءدىني تەرروريزم مەن ەكسترەميزمگە قارسى ءىس-قيمىلعا, «قازاقستان كيبەر قالقانى» جۇيەسىن ىسكە اسىرۋعا, قارۋ-جاراق دۇكەندەرىنىڭ قىزمەتىنە قاتىستى ماسەلەلەر ايتىلدى.
دەپۋتاتتار ءوز ۇسىنىستارىن ءتيىستى مەملەكەتتىك ورگاندارعا جىبەرەتىن بولدى.