قىزىلوردا وبلىسىنىڭ اكىمى قىرىمبەك كوشەرباەۆ وبلىستىق ءماسليحاتتىڭ كەزەكتى XVII سەسسياسىندا ايماق تۇرعىندارىن قولجەتىمدى تۇرعىن ۇيمەن قامتاماسىز ەتۋ باعدارلاماسى ازىرلەنگەنىن مالىمدەدى.
"وردا" تۇرعىن-ءۇي قۇرىلىسىنىڭ جول كارتاسى 3 جىلعا ەسەپتەلگەن. بۇل قۇجاتتىڭ نەگىزگى ماقساتى - وبلىس تۇرعىندارىن قولجەتىمدى باسپانامەن قامتاماسىز ەتۋ. اسىرەسە, الەۋمەتتىك قولداۋدى قاجەت ەتەتىن تۇرعىندارعا ارنالادى", - دەپ اتاپ ءوتتى وبلىس اكىمى ق. كوشەرباەۆ.
ايتا كەتۋ كەرەك, 2017 جىلدىڭ 10 ايىندا وبلىس تۇرعىندارىنىڭ ءوز قارجىسىمەن باسپانا تۇرعىزۋى 18 پايىزعا وسكەن.
سونداي-اق, ايماق باسشىسى وبلىستىڭ الەۋمەتتىك-ەكونوميكالىق دامۋىنا دا توقتالدى. وسى جىلى ءوڭىر ەكونوميكاسىنىڭ نەگىزگى سالالارىندا ءوسىم بايقالادى. تەك مۇناي ءوندىرىسىنىڭ تومەندەۋى سالدارىنان ونەركاسىپ كولەمى ازايعان. دەگەنمەن, قىزىلوردا وبلىسى نەگىزگى سالالار بويىنشا رەسپۋبليكادا الدىڭعى قاتاردا. سوڭعى 4 جىلدا شيكىزاتتىق ەمەس ونەركاسىپ سەكتورىندا ءوندىرىس كولەمى 28 پايىزعا ءوستى, ال رەسپۋبليكادا - 6,4 پايىز.
بيىل وبلىس ەكونوميكاسىنىڭ 10 ايىندا 165 ملرد. تەڭگەنىڭ ينۆەستيتسياسى نەگىزىندە 500 مىڭ شارشى مەتر تۇرعىن ءۇي پايدالانۋعا بەرىلدى. اتاپ ايتقاندا, جىل باسىندا تەك بيۋدجەت قارجىسى ەسەبىنەن 28 كوپقاباتتى تۇرعىن ءۇي سالىنىپ, 1560 پاتەردە قونىس تويى تويلاندى. بۇگىندە اپاتتى جاعدايداعى ۇيلەر ماسەلەسى تولىعىمەن شەشىلدى. سونىمەن قاتار, جەكە تۇرعىن ءۇي قۇرىلىسى ءۇشىن 20600 جەر تەلىمىنىڭ ينجەنەرلىك ينفراقۇرىلىمدارى تارتىلدى.
وبلىستا شاعىن جانە ورتا بيزنەس سۋبەكتىلەرىنىڭ سانى 7 پايىزعا ءوستى, ال كاسىپورىنداردا جۇمىسپەن قامتىلعاندار 4 مىڭ ادامعا جەتتى. جىل باسىنان بەرى وبلىستا 12 مىڭ جاڭا جۇمىس ورنى اشىلدى.
كەڭەستى قورىتىندىلاي كەلە, وبلىس اكىمى قىرىمبەك كوشەرباەۆ "وبلىستىڭ بارلىق جەتىستىكتەرى مەملەكەت باسشىسى نۇرسۇلتان نازارباەۆتىڭ سىندارلى ساياساتى مەن تاۋەلسىز قازاقستاننىڭ تۇراقتىلىعى ارقاسىندا جەتتىك", - دەپ اتاپ ءوتتى.