وڭتۇستىك قازاقستان وبلىستىق ءماسليحاتىنىڭ كەزەكتى ون سەگىزىنشى سەسسياسىندا 2018 جىلعى وبلىستىق بيۋدجەتتىڭ جالپى كولەمى 447,7 ملرد. تەڭگە بولىپ بەكىتىلدى.
وبلىستىق بيۋدجەت تۋرالى بايانداعان ەكونوميكا جانە بيۋدجەتتى جوسپارلاۋ باسقارماسىنىڭ باسشىسى ارمان ءسابيتوۆ وبلىس بيۋدجەت قارجىسى كىرىس كوزدەرىن ۇلعايتۋ ءۇشىن باسىمدى سالا رەتىندە ونەركاسىپ, كاسىپكەرلىك, اۋىل شارۋاشىلىعىن دامىتۋعا جانە الەۋمەتتىك ماسەلەلەردى شەشۋگە باعىتتالىپ وتىرعاندىعىن ايتتى. ماسەلەن, ءبىلىم بەرۋ سالاسىنا جالپى 42,9 ملرد. تەڭگە قاراستىرىلسا, دەنساۋلىق ساقتاۋ سالاسىنا 19,5 ملرد. تەڭگە, حالىقتى الەۋمەتتىك قولداۋ سالاسىنا 6,9 ملرد. تەڭگە باعىتتالىپ وتىر. سونىمەن بىرگە, مادەنيەت جانە سپورت سالالارىنا 17,9 ملرد. تەڭگە بولىنسە, تۇرعىنداردى تازا اۋىز سۋمەن قامتۋ ماقساتىندا 33 جوبانى ىسكە اسىرۋ ءۇشىن 6,0 ملرد. تەڭگە قاراستىرىلعان. وسىنىڭ ناتيجەسىندە 16 جوبا ىسكە قوسىلىپ, 13 ەلدى مەكەن اۋىز سۋمەن قامتىلىپ, جالپى قامتىلعان ەلدى مەكەندەر سانى 636-عا جەتەدى دەپ كۇتىلۋدە.
سونىمەن قاتار, باسقارما باسشىسى تۇرعىن ءۇي سالاسى بويىنشا 77 نىساننىڭ قۇرىلىسىنا 25,6 ملرد. تەڭگە باعىتتالىپ, جالپى الاڭى 208,6 مىڭ شارشى مەتردى قۇرايتىن 3 434 پاتەرلى 72 ءۇي پايدالانۋعا بەرىلەتىنىن اتاپ ءوتتى.
باقتيار تايجان, «ەگەمەن قازاقستان»