اقش-تىڭ كاليفورنيا شتاتىندا ورمان ءورتى باسىلار ەمەس. ءورت سوندىرۋشىلەر ءتىلسىز جاۋدى ءبىر اپتاعا جۋىق ۋاقىت اۋىزدىقتاي الماي كەلەدى.
جەرگىلىكتى بيلىكتىڭ حابارلاۋىنشا ءورتتىڭ جىلدام تارالۋىنا ىلعالدىلىقتىڭ تومەندىگى, قاتتى جەل تىكەلەي اسەر ەتىپ وتىر. قازىرگى ۋاقىتتا شتاتتا تابيعات اپاتىنا دايىندىقتىڭ جوعارعى دەڭگەيى ەنگىزىلدى.
ءتىلسىز جاۋعا قارسى كۇرەسكە 5700 ءورت ءسوندىرۋشى جۇمىلدىرىلدى. «توماس» وشاعى ونىڭ ىشىندەگى ەڭ ءىرىسى ەسەپتەلىپ وتىر. ول جولىندا كەزدەسكەن 430 ءۇيدى جالماپ وتكەن. اپاتتى ايماقتان 200 مىڭنان استام كوشىرىلگەن. ءۇش ءورت ءسوندىرۋشى جاراقات الدى. سونداي-اق, كولىك ىشىنەن دەر كەزىندە شىعا الماي قالعان ءبىر ايەلدىڭ مۇردەسى تابىلدى. بۇدان بولەك جۇزدەگەن عيمارات جارامسىز بولىپ قالدى.
سپۋتنيكتىك فوتوسۋرەتتەردە «توماستىڭ» تىنىق مۇحيتىنىڭ جاعالاۋىنا دەيىن سوزىلعانى كورىنەدى. اقش پرەزيدەنتى دونالد ترامپ كاليفورنيا شتاتىندا توتەنشە جاعداي ەنگىزۋ تۋرالى فەدەرالدى جارلىق شىعاردى.
ءتىلسىز جاۋ كاليفورنياداعى اۋىل شارۋاشىلىعىنا ۇلكەن زالالىن تيگىزدى دەگەن قاۋىپ بار. قازىردىڭ وزىندە اۆوكادو پلانتاتسيالارىنىڭ ايتارلىقتاي بولىگىن جويدى. بۇل سالا شتات ەكونوميكاسىنا ميلليونداعان پايدا كەلتىرىپ وتىر.
كاليفورنياعا قاراستى لوس-اندجەلەس قالاسى ۇلكەن شىعىنعا باتىپ وتىر. داۋلەتتى بەل-ەير قالاسىندا ءبىراز ۇيلەر وتقا وراندى. دەگەنمەن, وتكەن سەنبى كۇنى ءورت سوندىرۋشىلەر بىرنەشە وشاقتى سوندىرە الدى.