بەسقاراعاي اۋداندىق ءماسليحاتى دەپۋتاتتارىنىڭ كەلىسىمىمەن ايماق باسشىسى دانيال احمەتوۆتىڭ وكىمىمەن بەسقاراعاي اۋدانى اكىمى قىزمەتىنە داۋلەت باتىرباەۆ تاعايىندالدى. ول بۇعان دەيىن ۇلان اۋدانىن باسقارعان بولاتىن.
جاڭا باسشىنى اۋدان اكتيۆىنە وبلىس اكىمىنىڭ ءبىرىنشى ورىنباسارى نۇرىمبەت ساقتاعانوۆ تانىستىردى.
داۋلەت باتىرباەۆ 1976 جىلى 7 شىلدەدە سەمەي قالاسىندا دۇنيەگە كەلگەن. 1998 جىلى سەمەي مەملەكەتتىك ۋنيۆەرسيتەتىن «بۋحگالتەرلىك ەسەپكە مامانداندىرىلعان ەكونوميست», 2001 جىلى ءنوۆوسىبىر گۋمانيتارلىق ينستيتۋتىن «قۇقىقتانۋ» ماماندىقتارى بويىنشا تامامداعان.
ەڭبەك جولىن 1998 جىلى سەمەي قالاسىندا ءنوۆوسىبىر گۋمانيتارلىق ينستيتۋتىندا ادىسكەر بولىپ باستادى. بىرنەشە جىل «ازيا» فيرما» جشس-ىندە بروكەر, ديرەكتور, سونىمەن قاتار, جەكە كاسىپكەر بولىپ ەڭبەك ەتتى. 2009 جىلى مەملەكەتتىك قىزمەتكە كەلىپ, وسكەمەن قالالىق كاسىپكەرلىك, اۋىلشارۋاشىلىعى جانە ۆەتەريناريا بولىمىندە باس مامان, 2010 جىلى وبلىس ورتالىعىنىڭ مەنوۆنوە اۋىلدىق وكرۋگى اكىمىنىڭ ورىنباسارى بولدى. كەيىن ءبىر جىل وبلىستىق جولاۋشىلار كولىگى جانە اۆتوموبيل جولدارى باسقارماسىندا ءبولىم باسشىسى قىزمەتىنە اۋىستى. 2012 جىلى ۇلان اۋدانى ساۋلەت, قالا قۇرىلىسى جانە قۇرىلىس ءبولىمنىڭ باسشىسى, سول جىلدىڭ شىلدە ايىندا ۇلان اۋدانى اكىمىنىڭ ورىنباسارى قىزمەتىنە اۋىستىرىلدى. بۇل لاۋازىمدا 4 جىل بويى ەڭبەك ەتتى. 2016 جىلى قاڭتاردا ۇلان اۋدانى اكىمى بولىپ تاعايىندالدى.
ازامات قاسىم,
«ەگەمەن قازاقستان»
شىعىس قازاقستان وبلىسى