بۇگىنگى كۇنگە دەيىن بالەت, تسيرك, حورەوگرافيا جانە بي ونەرىمەن اينالىساتىن ارتىستەردىڭ زەينەتاقىمەن قامسىزداندىرۋ ماسەلەسى دۇرىس شەشىمىن تاپپاي وتىر. قولدانىستاعى زەينەتاقى زاڭناماسىندا اتالعان ارتىستەردىڭ زەينەتكەرلىككە شىعۋى جالپى تالاپتارعا سايكەس بولىپ كەلەدى, ياعني ەرلەر 63, ال ايەلدەر 58 جاسقا تولعاننان باستاپ زەينەتكە شىعا الادى. ەندى, 2018 جىلعى 1 قاڭتاردان 2027 جىلعا دەيىن ايەلدەردىڭ زەينەتكەرلىك جاسى 63 جاسقا دەيىن بىرتە-بىرتە ۇلعاياتىنى ءمالىم. ارينە, قاجەتتى سوما جيناقتالعان جاعدايدا دەمالىسقا بەكىتىلگەن مەرزىمگە دەيىن شىعۋعا بولادى, الايدا اتالعان ارتىستەردىڭ جالاقىسى جوعارى دەڭگەيدە ەمەستىگى ايدان انىق. ەلىمىزدىڭ ەڭبەك جانە حالىقتى الەۋمەتتىك قورعاۋ مينيسترلىگى ارتىستەردىڭ جەكەلەگەن ساناتتارىنىڭ, سونداي-اق جۇمىستارى بەلگىلى ءبىر تاۋەكەلمەن بايلانىستى باسقا دا ماماندىقتار قىزمەتكەرلەرىنىڭ زەينەتكەرلىككە نەعۇرلىم ەرتەرەك شىعۋ پروبلەماسى جيناقتاۋشى زەينەتاقى جۇيەسىنىڭ شەڭبەرىندە شەشىلەتىنىن اتاپ وتۋدە.
بىراق 20 جىل بويعى ايرىقشا دەنە ەڭبەگى مەن ەرەكشە ءومىر سالتى اتالمىش ونەرپازداردىڭ 40 جاسقا كەلگەندە ءوز مىندەتتەرىن ءتيىستى دەڭگەيدە ورىنداي الماۋىن ء(ارتۇرلى اۋرۋلار, جاراقاتتار, اعزانىڭ توزۋى جانە ت.ب.) جانە بالەت ارتىستەرىنىڭ كاسىبى زياندى ماماندىقتاردىڭ تىزىمىنە قوسىلعانىن ەسكەرە وتىرىپ, وسى اتالعان ونەر يەلەرىن زەينەتاقىمەن قامسىزداندىرۋ ماسەلەسى قايتا قارالىپ, ولاردىڭ زەينەتكەرلىك جاسى تومەندەتىلۋى ءتيىس دەپ ەسەپتەيمىز. وسى ماسەلەنى ايتىپ ءبىز پرەمەر-مينيستر باقىتجان ساعىنتاەۆتىڭ اتىنا دەپۋتاتتىق ساۋال جولدادىق.
1991 جىلدىڭ 17 ماۋسىمىندا قابىلدانعان «قازاقستان رەسپۋبليكاسىندا ازاماتتاردى زەينەتاقىمەن قامسىزداندىرۋ تۋرالى» زاڭىندا بۇل ماسەلە قاراستىرىلعان ەدى. اتالمىش ساناتتاعى قىزمەتكەرلەرگە ول زاڭدا جەڭىلدىكتەر بەرىلگەن. الايدا بۇل نورما 1997 جىلى قابىلدانعان «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭدا الىنىپ تاستالدى جانە بۇگىنگى قولدانىستاعى زاڭعا دا ەنگەن جوق. پارلامەنت دەپۋتاتتارى وسى ماسەلەنى پالاتالار وتىرىستارىندا دا, باسقا الاڭداردا دا بىرنەشە رەت كوتەرگەنىن اتاپ وتكەن ءجون. مەملەكەت باسشىسى «بولاشاققا باعدار: رۋحاني جاڭعىرۋ» اتتى ماقالاسىندا «الەم ءبىزدى قارا التىنمەن نەمەسە سىرتقى ساياساتتاعى ءىرى باستامالارىمىزبەن عانا ەمەس, مادەني جەتىستىكتەرىمىزبەن دە تانۋى كەرەك» دەگەن بولاتىن. دەمەك, الەمدىك ماڭىزى بار مادەني ءىس-شارالارعا, ءتۇرلى سايىستار مەن كونكۋرستارعا قاتىسىپ, ەلىمىزدىڭ داڭقىن شىعارىپ, حالىقارالىق ارەنادا قازاقستاندى دۇنيە جۇزىنە تانىتىپ جۇرگەن وسىنداي ونەرپازدارىمىزعا اۋىر دەنە ەڭبەگىنىڭ جۇكتەمەسىنەن دەنساۋلىعى ەرتە سىر بەرەتىندىكتەن قولداۋ كورسەتىپ, ولاردىڭ زەينەتكەرلىككە شىعۋ جاسىن تومەندەتۋگە بولادى عوي. سوندا جاس اتا-انالاردىڭ بوبەكتەرىن ەرەكشە ونەرگە ەرتە باستان باۋلۋىن دا ىنتالاندىرىپ, ولاردىڭ سانىن ارتتىرعان بولار ەدىك. جالپى, بالەت ونەرىندەگى ەڭبەك قالىپتاعى 18 جاستان ەمەس, الدەقايدا ەرتە, 8-10 جاستان باستالاتىنىن دە ەسكەرۋ كەرەك.
ناريمان تورەعاليەۆ, سەنات دەپۋتاتى