جەلتوقسانىڭ العاشقى جەكسەنبىسىندە الماتىدا «گۇلستان» رەسپۋبليكالىق عىلىمي-تانىمدىق جۋرنالىنىڭ باس رەداكتورى گوزەل قۇلجاباەۆانىڭ مۇرىندىق بولۋىمەن ەرەكشە مەرەكە ءوتتى.
ەلىمىزدە اگروتۋريزمدى دامىتۋعا كۇش سالىپ جۇرگەن جوبا اۆتورى بيىل «اسقاباق» مەرەكەسىنە ەلدى ەكىنشى رەت جيناپ وتىر. جاڭا وتباسىلىق مەيرامعا زيالى قاۋىم وكىلدەرى, وسىمدىكتەردى قورعاۋ سالاسىنىڭ ماماندارى مەن قازاق ۇلتتىق اگرارلىق ۋنيۆەرسيتەتىنىڭ ستۋدەنتتەرى ورتاقتاستى.
كۇز كەلىپ, ەگىن جينالىپ, ەل دامىل تاپقاندا وتكىزۋگە بولاتىن بۇل مەرەكەنىڭ ماقساتى تەك ءىشىپ-جەۋ ەمەس. دەنساۋلىققا پايدالى تاماقتانۋ مادەنيەتىن ناسيحاتتاۋ. ال اسقاباق – ناعىز قازاقتىڭ ەگەتىن داقىلى. كوپ كۇتىم تالعامايدى. ۇزاق ساقتاۋعا بولادى, دەيدى ايدالاعا اعىپ جاتقان ارىقتاردى تۋعان جەرى الماتى وبلىسى, كەربۇلاق اۋدانىنىڭ باسشي, نۇرىم, ارالتوبە اۋىلدارىنا بۇرىپ اكەلىپ, تالاي گەكتار جەردى باققا اينالدىرعان گوزەل اپامىز.
اقيقاتىندا «اسقاباق» مەرەكەسىنىڭ تاعىلىمدىق تۇستارى كوپ بولدى. جاستار ءبىر عانا اسقاباقتان سان ءتۇرلى, ءدامى ءتىل ۇيىرەر ءارى پايدالى اس دايىنداۋعا بولاتىنىن كوزدەرىمەن كوردى. تاربيەلىك ءمانى بار اڭگىمەلەر ايتىلدى.
مەرەكە اياسىندا شاعىن كورمە ۇيىمداستىرىلىپ, «جاسىل بەلدەۋ» اتتى دەرەكتى فيلم كورسەتىلدى. اسقاباقتىڭ پايداسى, جىلىجاي بيزنەسىمەن اينالىسۋدىڭ جاي-جاپسارى جايلى كىشىگىرىم ءدارىس وتكىزىلدى. داستارقانعا قويىلعان ەشكى سۇتىنەن جاسالعان ازىق-ت ۇلىكتەردىڭ ەرەسەن پايداسى تۋرالى اڭگىمەلەر دە كوكەيدەن شىقتى.
گوزەل قۇلجاباەۆانىڭ دەمەۋشىلىگىمەن بۇعان دەيىن دە گۇلستاندىقتار الماتى وبلىسىندا 2011 جىلى 2 گەكتار جەرگە قاراعايلى باق, 7 گەكتار جەرگە كوكتەرەك باعى, 2013 جىلى حالىق ءارتىسى نۇرعالي ءنۇسىپجانوۆتىڭ قۇرمەتىنە 5 گەكتار الما باعى, 2015 جىلى 10 گەكتار اۋماققا «باتىر انالار» ساياباعى, بيىل «اۋەزوۆ باعى» بوي كوتەردى.
ەندىگى جەردە گوزەل قۇلجاباەۆا حانىم تاۋەلسىزدىك مەرەكەسى كۇنىن ايرىقشا اتاپ ءوتۋدىڭ ۇلگىسىن جاساۋعا قۇلشىنىپ وتىر. ول كىسىنىڭ ويىنشا, ەگەمەندىگىمىزدىڭ ەڭ ۇلكەن مەيرامىن بەرەكەلى, ءماندى دە ءساندى ەتىپ وتكىزۋدىڭ ءجۇز ءتۇرلى جولى بار.
ايناش ەسالي,
«ەگەمەن قازاقستان»
الماتى