وبلىس اكىمى قۇمار اقساقالوۆتىڭ قاتىسۋىمەن العاش رەت ۇيىمداستىرىلعان «اشىق ەسىك كۇنى» قابىلداۋىنا 115 ادام كەلىپ, ولاردىڭ 35-ءى ايماق باسشىسىنا جەكە وتىنىشتەرىن جەتكىزدى.
«100 ناقتى قادام» ۇلت جوسپارىندا كاسىبي مەملەكەتتىك اپپارات قۇرۋدىڭ جولدارى ناقتى اتاپ كورسەتىلگەن. ولاردىڭ ىشىندە «اشىق ۇكىمەتتى» ەنگىزۋ, مەملەكەتتىك ورگاندار باسشىلارىنىڭ حالىق الدىندا ەسەپ بەرۋلەرىن تاجىريبەگە ەنگىزۋ, ازاماتتاردىڭ شەشىم قابىلداۋ ۇدەرىسىنە قاتىسۋ مۇمكىندىگىن كەڭەيتۋگە باسىمدىق بەرىلگەن. پەتروپاۆل قالاسى مەن بارلىق اۋدانداردا ۇيىمداستىرىلعان «اشىق ەسىك كۇنى» ءوز دەڭگەيىندە ءوتىپ, تولعاقتى پروبلەمالار مەن شەتىن ماسەلەلەر بىرلەسىپ تالقىلاندى. وبلىس تۇرعىندارى تاراپىنان جەر تەلىمدەرىن الۋ, ساپالى اۋىز سۋ جەتكىزۋ, اۋىلداردا كاسىپكەرلىكتى دامىتۋ, تۇرعىن ءۇي-كوممۋنالدىق شارۋاشىلىق جايى كوبىرەك قوزعالدى.
اكىمنىڭ قابىلداۋىنا كەلگەندەردىڭ ءبىرى ءۋاليحان يبراەۆ مۇگەدەكتەر ءۇشىن جىلجىمالى مونشا ويلاپ تاپقانىن, جوبا ەكسپو-2017 مامانداندىرىلعان حالىقارالىق كورمە شەڭبەرىندە وتكەن بايقاۋدا جوعارى باعالانعانىن, ەندى قارجىلىق قولداۋ قاجەتتىگىن جەتكىزدى. ايماق باسشىسى قۇمار اقساقالوۆ جەكە كاسىبىن اشقىسى كەلگەن وعان كومەك كورسەتىلەتىنىن, قولداۋ جاسالاتىنىن ايتىپ, وزىق يدەيا اۆتورىن قۋانتىپ تاستادى. الەۆتينا ونيششەنكونىڭ ايتپاعى قۇرىلىس جۇمىستارىنداعى بەي-بەرەكەتسىزدىك ەكەن. كوپشىلىكتىڭ دەمالىس ورنىنا, بالالاردىڭ ويىن الاڭىنا اينالعان شاعىن باق اۋماعى جەكە كاسىپكەردىڭ يەلىگىنە ءوتىپ كەتكەن. ءوڭىر جەتەكشىسى ماسەلەنىڭ انىق-قانىعىنا كوز جەتكىزۋ ءۇشىن تۇرعىندارمەن ارنايى كەزدەسەتىنىن قاداپ ايتتى.
ارىز ايتا كەلگەندەردىڭ ءبىرى بولات ەسپانوۆتى باسپانا جايى الاڭداتادى ەكەن. ول «بەرەكە» شاعىن اۋدانىندا جەر ءۇي سالعانىن, ول اۋماققا مەكتەپ قۇرىلىسى جۇرگىزىلەتىندىكتەن ونى بۇزۋ جونىندە قالالىق اكىمدىك شەشىمى شىققانىنا شاعىمداندى. «بەنزوستروي» اۋماعىندا كوپ قاباتتى ۇيلەر, باسقا دا مادەني, الەۋمەتتىك نىساندار تۇرعىزىلىپ, اسەم قالاشىق بوي كوتەرىپ كەلەدى. ال ءسىزدىڭ ماسەلەڭىزگە كەلسەك, ەش الاڭداماۋعا بولادى. سىرىلعان ۇيلەردىڭ يەلەرىنە وتەماقى تولەنەدى نەمەسە پاتەر بەرىلەدى, دەدى قۇمار ىرگەباي ۇلى.
– حالىق پەن بيلىكتى جاقىنداستىراتىن جۇزبە-ءجۇز كەزدەسۋلەر جۇمىستىڭ تيىمدىلىگىن ارتتىرىپ, تىكەلەي بايلانىستى قامتاماسىز ەتەدى. قوزعالعان ماسەلەلەردىڭ بىردە-بىرەۋى اياقسىز قالمايدى. بىرقاتارى قولما-قول شەشىمىن تاپتى. اكىمشىلىك كەدەرگىلەر مەن بيۋروكراتتىق كورىنىستەردى مۇمكىندىگىنشە ازايتاتىن مۇناداي قوعامدىق قابىلداۋ توقسان سايىن وتكىزىلەتىن بولادى, – دەدى ق.اقساقالوۆ باق وكىلدەرىنە بەرگەن سۇحباتىندا.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
سۋرەتتى تۇسىرگەن
تالعات تانىباەۆ