تارازدا جاڭا شاعىن اۋداندار سالىنادى, دەپ ءحابارلايدى وڭىر باسشىسىنىڭ ءباسپاسوز قىزمەتى.
وبلىس اكىمىنىڭ ورىنباسارى عالىمجان ءابدىرايىموۆتىڭ قاتىسۋىمەن وتكەن قالا قۇرىلىسىنا قاتىستى جيىندا سالىناتىن جاڭا اۋداندار ماسەلەسى كوتەرىلدى.
جاڭا 14 جانە 15-ءىنشى شاعىن اۋداندار وبلىس ورتالىعىنا جاڭاشا ساۋلەتتىك كورىك بەرىپ تۇر. 14-ءىنشى شاعىن اۋدان اۆتوۆوكزال اۋدانىندا, ال 15-ءىنشى سۇلەيمەنوۆ كوشەسىنىڭ سوڭىندا ورنالاسادى. «جالپى العاندا, 350-گە جۋىق كوپ قاباتتى تۇرعىن ءۇي قۇرىلىسى جوسپارلانعان. سونداي-اق, مەديتسينالىق, سپورتتىق, ءبىلىم جانە قوعامدىق نىسانداردىڭ قۇرىلىسى جۇزەگە اسىرىلماقشى», - دەلىنگەن حابارلامادا.
ناقتى جوسپارلار جوباسىنا سايكەس, 14 شاعىن اۋدانىنىڭ اۋماعىندا ويىن-ساۋىق ساۋدا ورتالىعى مەن سپورتتىق-ساۋىقتىرۋ كەشەنى, بالاباقشا, جالپى ءبىلىم بەرەتىن مەكتەپ, بالالاردى وڭالتۋ ورتالىعى, ەمحانا, 200 ورىندىق ونكولوگيالىق ديسپانسەر, ەكى دياگنوستيكالىق ورتالىق, قوناق ۇيلەر, كەڭسەلەر مەن مەيرامحانالار, جيھاز جانە قۇرىلىس گيپەرماركەتتەرى, «بارلىعى ۇيگە ارنالعان» دۇكەنى, نەكە سارايى, الاڭدار مەن ساياباقتار, قوعامدىق كولىك ايالداماسى, دەمالۋ مەن سەرۋەندەۋگە ارنالعان جاعاجاي سالىنباقشى.
بۇدان وزگە, بولاشاقتاعى 15-ءىنشى شاعىن اۋدانى ورنىندا تيپتىك جوبالار بويىنشا جەكە تۇرعىن ءۇي قۇرىلىستارى ءۇشىن 922 جەر ۋچاسكەسى بولىنگەن. ءاربىر جەكە تۇرعىن ءۇيدىڭ اۋدانى 125,116 جانە 80 شارشى مەتردى قۇرايدى. قازىردىڭ وزىندە ينجەنەرلىك جەلىلەر مەن كەلەسى جىلى پايدالانۋعا بەرىلەتىن 80 پاتەرلى جەتى تۇرعىن ءۇيدىڭ قۇرىلىسى باستالىپ كەتتى. وتىرىس بارىسىندا 32,7 مىڭ ادامنان تۇراتىن تۇرعىندار ءۇشىن ەكى ءورت ءسوندىرۋ دەپوسىن سالۋ قاراستىرىلعاندىعى ايتىلدى