اپتا سوڭىندا الماتىدا ورتالىق ازيانىڭ ەۋرازيا قورى جانە تالدىقورعان قۇقىق قورعاۋ ورتالىعى ەۋروپالىق وداقتىڭ قولداۋىمەن جۇزەگە اسىرىپ وتىرعان «قازاقستانداعى وسال توپتارعا زاڭگەرلىك كومەك كورسەتۋ جۇيەسىن جەتىلدىرۋ» جوباسى بويىنشا جۇرگىزىلگەن زەرتتەۋ ناتيجەلەرىنە ارنالعان ءباسپاسوز ءماسليحاتىن وتكىزدى.
زەرتتەۋ الەۋمەتتىك وسال توپتاردىڭ ء(ومىرى اۋىر ايەلدەر, كامەلەتكە تولماعاندار, بالالار ۇيلەرىنىڭ تۇلەكتەرى, جازاعا كەسىلگەندەر) كەپىلدەندىرىلگەن مەملەكەتتىك زاڭگەرلىك كومەككە قول جەتىمدىلىگىنە كەدەرگىلەردى انىقتاۋ مەن ساراپتاۋ ماقساتىندا قازاقستاننىڭ 7 وبلىسىندا جۇرگىزىلدى: الماتى, باتىس قازاقستان, جامبىل, قاراعاندى, پاۆلودار, وڭتۇستىك قازاقستان جانە شىعىس قازاقستان وبلىستارى.
زەرتتەۋ ناتيجەلەرىنە سۇيەنسەك, ايەلدەردىڭ 65 پايىزى كۇيەۋىنىڭ تاراپىنان الىمجەتتىكە ۇشىراپ, تاياق جەپ وتىرعان. سۇرالعان بالالار ءۇيى تۇلەكتەرىنىڭ جارتىسىنان استامى (55%) باسپانا, زەينەتاقى, جاردەماقى الۋ جانە مۇراگەرلىككە ەنۋ ماسەلەلەرى بويىنشا تەگىن قۇقىقتىق كومەككە مۇقتاجدىقتارىن اتاپ وتكەن. زەرتتەۋ جازاعا كەسىلگەندەردىڭ باسىم كوپشىلىگى (62%) باس بوستاندىعىنان ايىرۋ ورىندارىندا ءتۇرلى قۇقىقتىق ماسەلەلەردىڭ شەشىلۋىنە ءزارۋ ەكەندىگىن انىقتاپ وتىر.
«بىلىكتى زاڭگەرلىك كومەك الۋ قۇقىعى – نەگىزگى ءارى كۇردەلى ماسەلە. بىلىكتى زاڭگەرلىك كومەكتىڭ بارلىق ازاماتتىق توپتارعا, اسىرەسە, السىزدەرگە قولجەتىمدى بولۋى ماڭىزدى. وسال توپتارمەن جۇمىس جاساپ كەلە جاتقان جىلدار ىشىندە مەن مكزك قازىرگى جۇيەسىنىڭ جەتىلمەگەندىگىنە ءجيى تاپ بولۋدامىن. بىزگە وسال توپتاعى ادامداردىڭ سوت ادىلدىگىنە قول جەتىمدىلىگىنە كەلتىرىلەتىن كەدەرگىلەردى زەرتتەۋ جانە ولاردىڭ قانشالىقتى كومەككە ءزارۋ ەكەندىكتەرىن ءتۇسىنۋ ماڭىزدى بولدى», – دەيدى "تالدىقورعاندىق قۇقىق قورعاۋ ورتالىعى" قق ديرەكتورى ۆيكتور تەن.
جوبانىڭ نەگىزگى ماقساتى وسال توپتاردىڭ قۇقىقتارىن قورعاۋدىڭ تاجىريبەسى مەن تەتىكتەرىن جەتىلدىرۋ, سونىڭ ىشىندە ولاردىڭ قىلمىستىق جانە ازاماتتىق ادىلەتتىلىككە تارتىلعان جاعدايلاردا مەملەكەتپەن كەپىلدەندىرىلگەن زاڭگەرلىك كومەكتىڭ (مكزك) ساپاسى مەن قولجەتىمدىلىگىن جاقسارتۋ بولىپ تابىلادى.
ايناش ەسالي,
«ەگەمەن قازاقستان».
الماتى