...«ەشتەڭە ەتپەيدى, ول اقىن عوي». وسى تىركەستەگى «اقىننىڭ» ورنىنا «ينجەنەر», «زووتەحنيك», «پەداگوگ», «فيلوسوف» دەگەن كاسىبي اتاۋلاردى سالىپ وقىپ كورىڭىزشى, سىزگە قايدام, مەنىڭشە جاراسپايتىن سەكىلدى.
...اقىندار جۇرتتىڭ ءبارى قاتەلەسپەۋگە كوشكەن كەزەڭدەردە قاتەلەسىپ جۇرەتىن حالىق. جۇرتتىڭ ءبارى جاڭىلىس باسپاۋعا تىرىساتىن مەزگىلدەردە ءوزى بارىپ وتقا ۇرىنىپ جۇرەتىن ەل. سوندىقتان بولار, ەسكىشە ايتساق «شارق جەرياتىندا» (شىعىس پوەزياسىندا) اقىنداردىڭ ءبارى – دەرلىك وزدەرىن جىندى كوبەلەك – پارۋاناعا تەڭەگەن.
* * *
...قاي كەزدە دە پوەزيانىڭ باستى مىندەتتەرىنىڭ ءبىرى – قوعامدىق ويدىڭ قوزعاۋشى كۇشى بولۋ. سۇم ۇرەي, سۋىق قورقىنىش ادامداردى قاتەلەسپەۋگە ۇيرەتكەن زاماندار ءبىزدىڭ قوعامدا دا بولدى. ول زاماندار اقىنداردى, اقىندار ول زامانداردى تۇسىنە المادى. «پوەتوۆ تيرانى – نە پونيمايۋت, كوگدا پونيمايۋت – توگدا ۋبيۆايۋت». اندرەي ۆوزنەسەنسكيدىڭ وسى ولەڭىن وقىعان سايىن, ەڭ ءبىرىنشى شاكارىم, ماعجان, عۇمار, احمەت ت.ب اقىندار ويعا ورالادى... وسى اتالعان اقىنداردىڭ «قاتەسى» سوندا – ولار حالىقتىڭ جۇرەك وتىن ءوشىرىپ الماۋ ءۇشىن كۇرەستى. ال زامان ءۇشىن جۇرەك وتى بار ادامداردان گورى, ايتقانعا كونىپ, ايداۋعا ءجۇرىپ, ء«لاپپاي, تاقسىرلاپ» تۇراتىن «جانى جوق جاپھارقۇلدار» كەرەك ەدى. ولار ءۇشىن جۇرتتىڭ قۇبىلا قايدا, كۇنشىعىس قايدا ەكەنىن ءبىلۋى ءتيىمسىز ەدى. حال-قادىر, شاما-شارقىنشا ولار وزدەرىنە كەرەكتى جۇرتتى جاساي ءبىلدى. سول جۇرت كەشەگى بوزداقتار ۇستالاتىن تۇستا «ارامىزدان ادامدار الاستاتىلسىن» دەپ كەۋدە ۇرىپ شىقتى, جينالىستاردا اشىلا سايرادى, گازەت-جۋرنالدارعا ماقالا, فەلەتوندار جاريالادى. جانىمەن, جۇرەگىمەن سۇيگەن ءوز ەلى, تۋعان حالقى كەلىپ ءوز ق ۇلىنىن تەپكەندە اقىن تۇردى كوزى جاساۋراپ. نە دەيدى ول؟ كىمگە مۇڭىن وتكىزەدى؟
* * *
...ءار اقىن – وزىنشە ءبىر الەم. وعان وزگەلەردىڭ دەڭگەيىن ولشەم قىلىپ قاراۋعا بولمايدى. س.ەسەنيندى ۆ.ماياكوۆسكي جازعان ساياسي ولەڭدەردى نەگە جازبادىڭ دەپ ەشكىم قارالاعان جوق. سونداي-اق امانحان الىموۆتەن جاپپار ومىربەكوۆ پوەزياسىنداعى ساۋات-بىلىكتى, ساياسي پافوستى تالاپ ەتۋگە بولمايدى...
ەسەنعالي راۋشانوۆ
«اقىنعا كەرەك اقىل كوپ...» ماقالاسىنان
«وركەن» گازەتى, 1990 جىل, 4 تامىز