ەلوردامىزدىڭ 20 جىلدىعىنا وراي استانا قالاسىنىڭ مەملەكەتتىك مۇراعاتىندا «توعىز جولدىڭ تورابىنداعى استانا» اتتى فوتو-دەرەكتى كورمەنىڭ تۇساۋكەسەرى ءوتتى.
كورمەنىڭ ماقساتى – استانانى الماتىدان اقمولاعا كوشىرۋ تاريحى جانە جاڭا ەلوردانىڭ سالىنۋىن كورسەتەتىن قۇجاتتارىمەن قالانىڭ تۇرعىندارى مەن قوناقتارىن تانىستىرۋ. قازاقستاننىڭ جاڭا استاناسى ستاتۋسىن الۋىنا بايلانىستى دامۋدىڭ جاڭا كەزەڭدەرىن بەينەلەيتىن استانا قالاسىنىڭ مەملەكەتتىك مۇراعاتىنىڭ قورلارىنان, ۇلتتىق مۇراعات پەن ورتالىق مەملەكەتتىك مۇراعاتتىڭ قورلارىنان ماڭىزدى قۇجاتتار تۇڭعىش رەت حالىق نازارىنا ۇسىنىلدى. ولاردىڭ ىشىندە: ەلوردانى كوشىرۋ تۋرالى قازاقستان رەسپۋبليكاسىنىڭ جوعارعى كەڭەسىنىڭ قاۋلىسى, اقمولا قالاسىنا كوشىرۋدىڭ سالتاناتتى ءراسىمىن ۇيىمداستىرۋ جانە وتكىزۋ جونىندەگى رەسپۋبليكالىق ۇيىمداستىرۋ كوميتەتى وتىرىسىنىڭ حاتتاماسى, قالانىڭ سالىنۋى تۋرالى ماتەريالدار, قالانىڭ پاسپورتى, «استانا – جاڭا قالا» ارنايى ەكونوميكالىق ايماعىن قۇرۋ تۋرالى تاريحي قۇجاتتار بار.
استانا قالاسىنىڭ تۇڭعىش اكىمى ادىلبەك جاقسىبەكوۆتىڭ جەكە قورىنان الىنعان قۇجاتتار, ناگرادالار, اقمولا قالاسىنا جوعارى جانە ورتالىق ورگانداردىڭ كوشىرىلۋى بويىنشا مەملەكەتتىك كوميسسيانىڭ توراعاسى ف.گاليموۆتىڭ جەكە قورىنان الىنعان بىرەگەي فوتوماتەريالدار – كورمەنىڭ ەڭ ءماندى بۇرىشى بولدى.
مۇراعاتتىق قۇجاتتارعا قوسىمشا رەتىندە استانا قالاسىنىڭ اكىمدىگىنە شەتەل دەلەگاتسيالارىنىڭ اتىنان ءارتۇرلى جىلدارى بەرىلگەن سىيلىقتار مەن كادەسىيلار دا كورمەنىڭ ءسانىن كىرگىزدى. كورمەنىڭ اشىلۋىنا عالىمدار, تاريحشىلار, دەپۋتاتتار مەن مۇراعاتشىلار, عىلىمي قىزمەتكەرلەر قاتىستى. ءماجىلىس دەپۋتاتى باقىتجان ەرتاەۆ: «استانانى كوشىرۋ وڭاي بولعان جوق. وتكەن عاسىردىڭ سوڭىندا قابىلدانعان تاريحي شەشىمگە ءبىراز زيالى قاۋىم وكىلدەرىنىڭ نارازى بولعانى دا ءمالىم. بىراق ەلباسىنىڭ كورەگەن ساياساتى, دانا ءسوزى استانانىڭ كوشۋ ماڭىزدىلىعىنا ءبارىنىڭ كوزىن جەتكىزدى. بۇگىن استانامىز الەمدەگى ماڭىزدى ساياسي-ەكونوميكالىق ايماققا اينالدى. بۇل جيىرما جىلدا عانا جەتكەن جەتىستىك. الداعى ۋاقىتتا ەلوردامىز بۇدان دا بيىك تۇعىرعا كوتەرىلەدى», دەدى قۇتتىقتاۋ سوزىندە.
قازاقستاننىڭ تاريحىندا استانانى اقمولاعا اۋىستىرۋ ءبىزدىڭ مەملەكەتىمىزدىڭ دامۋىندا ەرەكشە وقيعالاردىڭ ءبىرى بولىپ سانالادى. گەوگرافيالىق ورنالاسۋى, ىشكى الەۋەتى, ترانسپورتتىق-كوممۋنيكاتسيالىق جۇيەسى دە ەلىمىزگە قولايلى بولاتىن. وعان قوسا, جاقىن جانە الىس شەتەلدەرمەن حالىقارالىق ىنتىماقتاستىقتى كەڭەيتۋمەن بايلانىستى گەوساياسي ماسەلەلەردى شەشۋ جانە بولاشاقتا مەملەكەتىمىزدىڭ ەكونوميكالىق تۇراقتىلىعىن قامتاماسىز ەتەتىن مەگاپوليستەردىڭ ءبىرى بولىپ قاراستىرىلادى.
ايتا كەتەتىن جايت, كورمە استانا قالاسى مەملەكەتتىك مۇراعاتىنىڭ كورمە زالىندا جەلتوقساننىڭ اياعىنا دەيىن جالعاسادى.
باعاشار تۇرسىنباي ۇلى, «ەگەمەن قازاقستان»