نيۋ-يوركتەگى قازاقى ناقىشتار

بيىل قازاق سۋرەتشىسىنىڭ جولى بولىپ تۇر. كاميلا مۇحيتتىڭ ار جاعىنا باستاعان وسى ساپارىندا «Fine Art Studio», «New York Realism», «Art Nomads» سياقتى بىر­نەشە كورمەگە قاتارىنان قاتى­سىپ, جىلدار بويى جيناعان شى­عارماشىلىق قورجىنىنداعى جۇ­مىستارىن كورسەتۋگە مۇمكىندىك الدى.

– ارىپتەستەرىم حالىقارالىق كورمەدە ۇلتتىق ناقىشتاعى سۋرەت­تەرىمدى جاقسى باعالاپ, قو­شەمەت كورسەتكەنىنە مەرەيىم تاسىدى. ەڭبەگىم جانعانداي بولدى. ءوزىم دە قازاقتىڭ ءداستۇرى مەن مادەنيەتىن بەينەلەۋ ونە­رىنىڭ تىلىمەن ناسيحاتتاي ال­عا­نىما قۋاندىم. ەندى ماعان كە­لەسى جىلى وتەتىن «Artexspo New York-2018» حالىقارالىق سۋرەتشىلەر كورمەسىنە شاقىرتۋ بەردى, – دەيدى سۋرەتشىلەر اكادە­ميا­سىنىڭ كوررەسپوندەنت-مۇشەسى, مادەنيەت قايراتكەرى كاميلا جاپالوۆا.

– امەريكا قۇراما شتاتتارى­نان العان اسەرىم تاماشا! مۇحيت­تىڭ ارعى بەتىنە اسىپ, قازاق ما­دە­نيەتىن سۋرەت ونەرى ارقىلى تا­نىتۋعا قوسقان ۇلەسىم ماعان كا­دىمگىدەي شابىت سىيلادى. ءوزىم ءۇشىن دە, قازاق ەلى ءۇشىن دە قۋاندىم. ۇلتتىق ناقىشتاعى جى­بەك ماتاعا سالىنعان سۋرەتتەرىم امە­ريكالىقتاردىڭ ۇلكەن قىزى­عۋ­شىلىعىن تۋعىزىپ, اپارعان بار­لىق جۇمىستارىم تۇگەل دەر­لىك ساتىلىپ كەتتى.

بۇل ەلدىڭ ونەر­گە, تالانتقا دەگەن قۇرمەتى جوعارى ەكەن. كورمەگە ورتالىق ازيا ەلدەرىنەن ون شاقتى سۋرەتشى قاتىستى. سۋرەتشىلەردىڭ باسىم بولىگى ەۋروپا ەلدەرىنەن بولدى. كورمەنىڭ اشىلۋ سالتاناتىندا ءوزىم قولدان ءپىشىپ, تىككەن ۇلتتىق كيىمىمىزدى كيىپ ءجۇردىم. بۇل كورمەگە اعىلىپ كەلىپ جاتقان شەتەلدىكتەرگە وتە ۇنادى. تاڭدانىستارى مەن ريزاشىلىقتارىن جاسىرمادى, – دەدى ول ويىن تۇيىندەپ.

وسى ساپاردا كاميلانىڭ سۋرەت­شى رەتىندەگى تاعى ءبىر ۇلى ار­مانى ىسكە استى. بالا كۇنى­نەن كوكسەپ كەلە جاتقان ايگىلى مۋ­زەيلەردى ارالاپ, تورتكۇل دۇ­نيە­گە اتى تاراعان قىلقالام شە­بەر­لەرىنىڭ شەدەۆرلەرىن تاماشالاعان.

سۋرەتشىنىڭ وسىنداي ءىرى شەت­ەلدىك كورمەگە «بولاشاققا باعدار: رۋحاني جاڭعىرۋ» باع­دار­لاماسىنىڭ اياسىندا قاتىسۋعا قارجىلىق قولداۋ كورسەتكەن اتىراۋ وبلىسىنىڭ اكىمى نۇرلان نوعاەۆقا العىسى شەكسىز.

كاميلا – باتيك تەحنيكاسى ارقىلى قايتالانباس تۋىندىلار جاساعان قازاق سۋرەتشىسى. ونىڭ قولىنان شىققان جاۋھارلار تاماشا قوناقۇيلەردىڭ تورىندە, ونەردى باعالايتىن كوللەكتسيونەرلەردىڭ ۇيىندە تۇر.

ايناش ەسالي,

«ەگەمەن قازاقستان»

الماتى