وڭتۇستىك قازاقستان وبلىسى اعىمداعى جىلدىڭ 10 ايىندا سالىق ءتۇسىمى بويىنشا مەملەكەتتىك بيۋدجەت جوسپارىن 103 پايىزعا ورىندادى.
بەلگىلەنگەن جوسپار 245 ملرد. تەڭگە بولسا, بيۋدجەتكە ناقتى 251 ملرد. تەڭگە وندىرىلگەن. بۇگىن بۇل تۋرالى وقو وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق مەملەكەتتىك كىرىستەر دەپارتامەنتىنىڭ باسشىسى التىنسارى ۇمبەتاليەۆ مالىمدەدى.
دەپارتامەنت باسشىسىنىڭ ايتۋىنشا, مەملەكەتتىك بيۋدجەت تۇسىمدەرىنىڭ ءوسۋ قارقىنى 2016 جىلدىڭ وسى كەزەڭىمەن سالىستىرعاندا ەداۋىر ارتىپ كەلەدى.
«رەسپۋبليكالىق بيۋدجەتكە مەجەلەنگەن جوسپار 151 ملرد. تەڭگە بولسا, ول 101 پايىزعا ورىندالىپ, 152 ملرد. تەڭگەنى قۇرادى. ال, جەرگىلىكتى بيۋدجەت بويىنشا, 94 ملرد. تەڭگە جوسپارلانسا, ناقتى 99 ملرد. تەڭگە ءوندىرىلدى. ناتيجەسىندە جوسپار 106 پايىزعا ورىندالىپ, جەرگىلىكتى بيۋدجەت قورجىنىنا ارتىعىمەن 5 ملرد. تەڭگەنىڭ قارجىسى ءتۇستى», - دەدى التىنسارى دۇيسەنبەك ۇلى.
سونىمەن قاتار, قازىرگى تاڭدا وڭتۇستىك قازاقستان وبلىسىندا 216 مىڭنان استام شاعىن جانە ورتا بيزنەس وكىلدەرى جۇمىس اتقارىپ كەلەدى. وسى سۋبەكتىلەردەن اعىمداعى جىلدىڭ 10 ايىندا مەملەكەتتىك بيۋدجەتكە 104,6 ملرد. تەڭگە كولەمىندە سالىق تۇسكەن.
ەلباسى تاپسىرماسىنا وراي, وبلىستىق مەملەكەتتىك كىرىستەر دەپارتامەنتى تاراپىنان سالىقتىق تەكسەرۋلەر سانى 2017 جىلى بىلتىرعى جىلدىڭ وسى كەزەڭىمەن سالىستىرعاندا 57 پايىزعا كەمىگەن. سونداي-اق, اعىمداعى جىلدىڭ 10 ايىندا كەدەندىك تولەمدەر مەن سالىقتار بويىنشا جوسپار 100 پايىزعا ورىندالىپ, 51 ملرد. تەڭگەنى قۇراپ وتىر.
بۇدان بولەك, وبلىستىڭ سىرتقى تاۋار اينالىمى اعىمداعى جىلدىڭ وسى كەزەڭىندە 1 ملرد. 438 ملن. اقش دوللارىن قۇرادى. ونىڭ ىشىندە تاۋار ەكسپورتى 5 پايىزعا, ال تاۋار يمپورتى 36 پايىزعا كوبەيگەن.