اقپارات جانە كوممۋنيكاتسيالار ءمينيسترى داۋرەن اباەۆ «قازاقستاننىڭ 100 جاڭا ەسىمى» جوباسى بويىنشا الداعى ۋاقىتتا قانداي جۇمىستار جوسپارلانىپ وتىرعانىن اتادى, دەپ حابارلايدى «قازاقپارات».
«شىنىندا دا, ولار تانىمال بولا باستادى. زاماناۋي تەحنولوگيالار زامانىندا جاڭالىقتار لەگى تەز ۇمىتىلىپ كەتۋى مۇمكىن. سوندىقتان, «قازاقستاننىڭ 100 جاڭا ەسىمى» بويىنشا ءبىز ارنايى جول كارتاسىن ازىرلەدىك. كەلەسى جىلى ءساتىن سالسا ۇزدىك جۇزدىككە ەنگەن ادامدارعا ارنالعان 100 تەلەنوۆەللا جارىققا شىعار دەپ ۇمىتتەنەمىن. ءبىز بۇل تۋرالى ءالى دە تولىعىراق ايتامىز. مۇمكىن بۇل ارنايى روليكتەر رەتىندە شىعادى. ولار باعدارلاماعا قاتىسادى», - دەدى داۋرەن اباەۆ اقپارات جانە كوممۋنيكاتسيالار مينيسترلىگىنىڭ قوعامدىق كەڭەسىنىڭ كەزەكتى وتىرىسىندا.
ءمينيستردىڭ ايتۋىنشا, ۇزدىك جۇزدىكپەن بىرگە, جالپى جوباعا قاتىسقان 2100 ادام ۇمىت قالمايدى.
«قولىمىزدان كەلسە, بۇل ادامدار جاستاردىڭ الدىندا ءسوز سويلەپ, اشىق ساباق وتكىزسە دەگەن ويىمىز بار. تولىق جوبا بار. ءبىز بۇل جوبانى جايدان-جاي قالدىرمايمىز. مەن ءبىر قۇپيانىڭ بەتىن اشايىن. ءبىز ۇستەل باسىندا وتىرعاندا پرەزيدەنت جالپى تىزىمگە قانشا ادامنىڭ تىركەلگەنىن سۇرادى. مەن 2100 ادام ەكەنىن اتادىم. ول سول كەزدە 2100 ادامنىڭ بارلىعىن ۇلگى ەتۋدى سۇرادى», - دەدى داۋرەن اباەۆ.
ول سونىمەن بىرگە, جۇمىس جاڭا فورماتتا جالعاساتىنىن تىلگە تيەك ەتتى.
داۋرەن اباەۆتىڭايتۋىنشا, بۇل بۇكىل مينيسترلىكتەردىڭ, قحا-نىڭ بىرلەسە اتقاراتىن جۇمىسى. «ەڭ باستى جەتىستىك - بۇكىل ازاماتتىق قوعامنىڭ قولداۋ ءبىلدىرۋى», دەدى.