كاتونقاراعايداعى دوستىق ءۇيى قونىس تويىن تويلادى

تالاي جىلدان بەرى سيقى كەتىپ تۇرعان بۇرىنعى بالالار مەن جاسوسپىرىمدەر سپورت مەكتەبىنىڭ عيماراتى بيىل جازدا كۇردەلى جوندەۋدەن وتكىزىلىپ, اينالاسى, ءىشى-سىرتى ادام تانىماستاي وزگەرتىلىپ دوستىق ءۇيىنىڭ يگىلىگىنە بەرىلدى. نىساننىڭ سىرتى سايدينگپەن قاپتالىپ, شاتىرى جاڭالانسا, تاتۋلىق مەكەنىنىڭ اۋلاسىنا تەمىر قورشاۋلار قويىلىپ, دەمالاتىن ورىندار ازىرلەنىپ, شامدار ورناتىلىپ, شىرشا كوشەتتەرى وتىرعىزىلىپتى. «حابا-جوبا» جشس مەردىگەرلىك ۇيىمىنىڭ كۇشىمەن جۇرگىزىلگەن جوندەۋ جۇمىستارىنا جەرگىلىكتى بيۋدجەتتەن 36 ملن. تەڭگە قارجى ءبولىنىپتى. اتالعان مەكەمە باسشىسى, جاس كاسىپكەر ماحامبەت كەشىلباەۆ نىساندى قالپىنا كەلتىرۋ ىسىنە ۇلكەن جاۋاپكەرشىلىكپەن قاراعاندىقتارىن ايتادى. جاڭا عيماراتقا كوشىپ, كوڭىلدەرى جايلانعان دوستىق ۇيىندە ەندى بۇرىنعىداي ءتورت ەمەس, جەتى ەتنومادەني بىرلەستىك بىرلەسە جۇمىس ىستەيتىن بولادى. قازاق, ورىس, تاتار, نەمىس مادەني ورتالىقتارىنىڭ قاتارىنا ۋكراين, بەلورۋس, وزبەك مادەني ۇجىمدارى قوسىلىپتى. ارداگەرلەر كەڭەسىنە دە جايلى عيماراتتان ارنايى بولمە بەرىلىپتى.

«كوپۇلتتى ەلىمىزدەگى تاتۋلىق پەن بىرلىكتىڭ ءبىر بەلگىسى وسى «دوستىق ۇيلەرى» دەپ بىلەمىن. ءبىزدىڭ اۋدانىمىزدا دوستىق ءۇيى وتكەن جىلى 1-ءشى مامىردا اشىلعان ەدى. جاڭا عيمارات ەتنوسارالىق بەيبىتشىلىك پەن كەلىسىمدى ودان ءارى نىعايتىپ, اۋداننىڭ ونەرى مەن مادەنيەتىن ناسيحاتتاۋعا تىڭ سەرپىن بەرەدى دەپ ويلايمىن. ەندى اۋداننىڭ ەتنومادەني ورتالىقتارىنىڭ زاماناۋي جانە كوپفۋنكتسيونالدى مادەني ورتالىعى بار. مۇندا تۇرعىندار ءوز تىلدەرىن ۇيرەنىپ, وزگەلەرگە ءوز سالت-داستۇرلەرى جايىندا ماعلۇمات بەرە الادى», - دەدى كاتونقاراعاي اۋدانىنىڭ اكىمى احمەتقالي نۇرعوجين جاڭا عيماراتتىڭ اشىلۋ سالتاناتىندا سويلەگەن سوزىندە.

«ادامداردىڭ قارىم-قاتىناسىنداعى ۇلتارالىق دوستىق پەن سىيلاستىقتى نىعايتا ءتۇسۋ ءۇشىن كوپتەگەن جۇمىستار اتقارۋ قاجەت. دوستىق ۇيلەرى وسى ماقساتتا قۇرىلۋدا. جەرلەستەرىمە ساتتىلىك تىلەي وتىرىپ, اتالمىش مەكەمەگە بالالارىن ەرتىپ اكەلىپ, ولارعا ءبىزدىڭ قانداي كوپۇلتتى ەلدە, ءبىر شاڭىراق استىندا ءارتۇرلى ۇلتتار مەن ءدىن وكىلدەرىنىڭ تاتۋ-ءتاتتى ءومىر ءسۇرىپ جاتقاندىعىن ناسيحاتتاسا ەكەن دەيمىن», - دەيدى نەمىس ەتنومادەني ورتالىعىنىڭ باسشىسى سۆەتلانا كوزۋب.

ازامات قاسىم, «ەگەمەن قازاقستان»

شىعىس قازاقستان وبلىسى,

كاتونقاراعاي اۋدانى