«قايرات» تورتتىك فينالدان تىس قالدى

«قايرات» ۋەفا كۋبوگىنىڭ ەليتالىق كەزەڭىندەگى ويىندارىن يسپانيانىڭ توررەحون-دە-اردوس قالاسىندا وتكىزدى. العاشقى تۋردا الماتىنىڭ كومانداسى رۋمىنيانىڭ «دەۆا» كلۋبىن 5:2 ەسەبىمەن جەڭىپ, ىرىكتەۋدى جەڭىسپەن باستادى. گولداردى «قايرات» ساپىنان لەو مەن حوسسەين تايەبي ەكى-ەكى گولدان سوقسا, قاقپاشى يگيتا ءبىر دوپتى ءوز ەنشىسىنە جازعان ەدى.

ەكىنشى تۋردا «قايرات» پورتۋگاليانىڭ «براگا/ااۋم» كومانداسىمەن كۇش سىناسىپ, 4:1 ەسەبىمەن ەش قيىندىقسىز جەڭىسكە جەتتى. بۇل ويىندا تاينان دۋبل اۆتورى اتانسا, مارينيۋ ءوز قاقپاسىنا گول سوعىپ الدى. ال «قايراتتىڭ» ءتورتىنشى گولىن قاقپاشى يگيتا سالدى.

سونداي-اق, يسپانيانىڭ 21 دۇركىن چەمپيونى «ينتەر-موۆيستار» كومانداسى «براگا/ااۋم» (پورتۋگاليا) مەن «دەۆا» (رۋمىنيا) كلۋبتارىن اسا قيىندىقسىز ۇتتى. ءسويتىپ, «قايرات» پەن «ينتەر-موۆيستار» توپتاعى ءبىرىنشى ورىندى يەلەنۋ ءۇشىن ءوزارا كەزدەسۋدە ساراپقا سالۋ كەرەك بولدى. ءوز ەلدەرىنىڭ ەڭ ۇزدىك كوماندالارى ءبىر جىلدىڭ ىشىندە وسىمەن ەكىنشى رەت كەزدەستى. اتالعان ەكى ۇجىمنىڭ العاشقى تەكەتىرەسى بيىل الماتىدا وتكەن تورتتىك فينالدىڭ جارتىلاي فينالىندا بولعان. سول كەزدە يسپانيا ۇجىمى 3:2 ەسەبىمەن باسىم تۇسكەن-ءدى. اراعا جەتى اي سالىپ ەكى كوماندانىڭ جولى تورتتىك فينالعا جولداما بەرۋشى سوڭعى ىرىكتەۋدە ءتۇيىستى. ەكىنشى كەزدەسۋدە دە «ينتەر-موۆيستار» كومانداسى «قايراتى» تاعى دا قاپىدا قالدىردى. بۇل جولعى ەسەپ – 5:3. تورتتىك فينالدىڭ ەكى دۇركىن جەڭىمپازى «قايرات» 2016/17 ماۋسىمدا «ينتەرگە» جىبەرگەن ەسەسىن قايتارۋعا تىرىسقانىمەن, پيرەنەي تۇبەگىنەن كەلگەن كوماندا بيىل دا ءوزىنىڭ مىقتى ەكەنىن دالەلدەدى.

ەندى ويىنعا از-كەم توقتالىپ وتسەك. تارتىسقا تولى, فينالعا بەرگىسىز وتكەن ماتچتا «ينتەر» گول سوقسا, «قايرات» بىردەن جاۋاپ قاتىپ, دوپ دوداسىنىڭ كوركىن كەلتىردى. ءبىرىنشى تايمدا تەڭ ەسەپ 3:3 ناتيجەسىمەن اياقتالدى. ەكىنشى تايمنىڭ ورتا تۇسىنا قاراي ويىندا شيەلىنىستى, داۋلى جاعداي كوبەيە ءتۇستى. اۋەلى «قايرات» كلۋبىنىڭ پرەزيدەنتى قايرات ورازبەكوۆ پەن باس باپكەرى كاكاۋ الاڭنان قۋىلدى. ارادا از ۋاقىت وتكەن سوڭ قاقپاشى يگيتا ءتارتىپ بۇزىپ, ەكىنشى سارى قاعازىن الدى. ءسويتىپ, ول دا ويىندى الاڭ سىرتىنان تاماشالاۋعا ءماجبۇر بولدى.

سان جاعىنان باسىمدىققا يە بولعان «ينتەر» كوپ سوزباي, ءتورتىنشى گولىن سوقتى. ويىن سوڭىنا قاراي الاڭ يەلەرى ەكى رەت 10 مەترلىك ايىپ سوققىسىن ورىنداۋعا مۇمكىندىك الدى. العاشقىسى قاقپادان قيىس كەتسە, ەكىنشىسىندە گادەيا پارمەندى سوققىسىمەن دۋدۋدى قاپى قالدىردى. وسى گولدان سوڭ «قايرات» ءبىردى-ەكىلى شابۋىل جاساپ كورگەنىمەن, ءبارى ناتيجەسىز اياقتالدى. ال ماتچتىڭ اياقتالۋىنا 22 سەكۋند قالعاندا, الماتىلىق ۇجىم جەڭىلگەندەرىن مويىنداپ, دوپ تەبۋدى قويدى. سەبەبى, قالعان ۋاقىتتا ءۇش گول سوعۋ مۇمكىن ەمەس بولاتىن.

ويىننان سوڭ, كوماندا كاپيتانى دىنمۇحامەد سۇلەيمەنوۆ بۇل ماتچتا جەڭىلگەندەرىن تولىق مويىندادى. ونىڭ ايتۋىنشا, «ينتەر» كلۋبى «قايراتتى» تورەشىلەردىڭ كومەگىنسىز-اق جەڭۋگە قاۋقارلى بولعان. «ويىن وتە اۋىر ءوتتى. «ينتەر» وتە مىقتى كوماندا, ولار ءبىزدى تورەشىلەردىڭ كومەگىنسىز-اق جەڭەتىن ەدى. تورەشى كلۋب پرەزيدەنتى مەن باس جاتتىقتىرۋشىمىزدى الاڭنان نە ءۇشىن قۋعانىن الىگە دەيىن تۇسىنە الماي ءجۇرمىن. ونىڭ بۇل شەشىمى ويىننىڭ بۇكىل قارقىنىن بۇزدى», دەيدى د.سۇلەيمەنوۆ.

ال «قايراتتىڭ» برازيليالىق لەگيونەرى الەشاندرە سۇلەيمەنوۆتىڭ سوزىمەن كەلىسپەيتىنىن, تورەشى «ينتەرگە» كومەكتەسكەنىن, ءادىل تورەلىك ەتپەي, ويىننىڭ شىرقىن بۇزعانىن ايتادى. «وكىنىشكە قاراي, تورتتىك فينالعا شىعا المادىق. ءبىز جەڭىسكە جەتۋگە بار كۇشىمىزدى سالدىق, بىراق ويىن ءبىز كۇتكەندەي بولمادى. ويىندا گول سوعاتىن بىرنەشە مۇمكىندىكتەرىمىز بولدى. بىراق, الەمنىڭ ەڭ ۇزدىك كومانداسىنا ەسە جىبەرگەنىمىزدى ءتۇسىنۋىمىز كەرەك. بۇل ويىندا تورەشى «ينتەرگە» اشىق جاقتاستى. بىرنەشە كۇماندى شەشىم قابىلدادى. مىسالى, گادەيا اشىق ءتارتىپ بۇزعاندا قىزىل, ەڭ قۇرعاندا سارى قاعاز بەرۋ كەرەك ەدى. بىراق, تورەشى ءۇنسىز قالدى. ال لەو ءدال سونداي ەرەجە بۇزعاندا وعان سارى قاعاز كورسەتتى. ءبىزدى تورتتىك فينالدان «ينتەر» ەمەس, تورەشى شىعارىپ جىبەردى دەسەك دۇرىس شىعار», دەيدى ول.

«ينتەر» – وتە تاجىريبەلى جانە ۇزدىك كوماندالاردىڭ ءبىرى. ەسەپ 3:4 بولعاندا ءبىزدىڭ گول سوعىپ, جەڭىسكە جەتەتىن بىرنەشە مۇمكىندىگىمىز بولدى. بىراق, سونى ءتيىمدى پايدالانا المادىق. ءبىرىنشى تايمدا ءبىز وتە كوپ ورەسكەل قاتەلىكتەر جىبەردىك. ءۇش گولدىڭ ەكەۋى قورعانىستىڭ قاتەلىگىنەن قاقپامىزعا ەندى. دەگەنمەن, شاكىرتتەرىم جاقسى ويىن كورسەتتى. تورەشى مەنى الاڭنان نە ءۇشىن قۋعانىن تۇسىنبەيمىن. بارلىعى ويىن جاعدايىندا بولعان ەدى. «ينتەر» جاقسى كوماندا, دەسە دە كورەرمەندەر قازاقستاندا فۋتزال بار ەكەنىن, «قايرات» سەكىلدى مىقتى كلۋب قالىپتاسقانىن ءبىلىپ جۇرەتىن بولدى. كلۋب پرەزيدەنتىنەن جانە جانكۇيەرلەردەن كەشىرىم سۇرايمىن. ەگەر, تورەشى ءوز مىندەتىن دۇرىس اتقارعاندا, ءبىز جەڭىسكە جەتەتىن ەدىك», دەيدى كاكاۋ مىرزا.

وسىلايشا, «قايرات» كلۋبى 11-رەت ۇيىمداستىرىلعان ۋەفا كۋبوگىنىڭ تورتتىك فينالىنا تاريحتا ءتورتىنشى مارتە شىعا المادى. دەگەنمەن, ەل چەمپيوندارى بۇل تۋرنيردە ەكى رەت توپ جارعانىن ايتا كەتەيىك.

كاكاۋدىڭ ايتۋىنشا, ەندى «قايرات» فۋتزالدان ەل چەمپيوناتىنا كوڭىل بولمەك. سونداي-اق, 2018 جىلى سلوۆەنيانىڭ ليۋبليانا قالاسىندا وتەتىن ەۋروپا بىرىنشىلىگىنە دايىندالادى. 30 قاڭتار مەن 10 اقپان ارالىعىندا ءتىن كارى قۇرلىق دوداسىندا قازاقستان قۇراماسى «ۆ» توبىندا رەسەي جانە پولشا فۋتزالشىلارىمەن ءبىر توپتا سىنعا تۇسەدى.

ءالي بيتورە,

«ەگەمەن قازاقستان»