وسكەمەندە «نۇرلى جەر» مەملەكەتتىك باعدارلاماسىنىڭ «جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ» باعىتى بويىنشا سالىنعان ەڭ العاشقى كوپپاتەرلى تۇرعىن ءۇيدى ساتۋ كەلىسىمشارتى جاسالدى. ماڭىزدى قۇجاتقا «قازاقستاننىڭ تۇرعىن ءۇي قۇرىلىس جيناق بانكى» اكتسيونەرلىك قوعامى وبلىستىق فيليالىنىڭ باسشىسى نۇرلان كۇزەمباەۆ پەن «ۆوستوك-كليو» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ۆياچەسلاۆ تارنايكين قول قويدى.
توقسان بەس پاتەرلى, بەس قاباتتى جاڭا ءۇي كۇلەنوۆ ىقشاماۋدانىندا بوي كوتەرگەن «ريۆەرا رەزيدەنس» تۇرعىن ءۇي كەشەنىندە ورنالاسقان. ەرەكشە ساۋلەتىمەن كوز تارتاتىن ءزاۋلىم عيمارات الاڭىندا بىرنەشە سپورت جانە ويىن الاڭدارى, اۆتوتۇراق, سەنىمدى قاۋىپسىزدىك جۇيەسى, ءدارىحانالار مەن ناۋبايحانا, سۋپەرماركەت, بانك بولىمشەلەرى اشىلىپ, كەشەن تۇرعىندارى ءۇشىن بارىنشا قولايلى جاعداي جاسالعان. بۇگىندە اۋماعى 46 شارشى مەتردەن 242 شارشى مەترگە دەيىن بولاتىن ءبىر, ەكى, ءۇش, ءتورت بولمەلى پاتەرلەر ساتىلا باستاپتى.
«جەكە قۇرىلىس سالۋشىلاردى تۇرعىن ءۇي سالۋعا ىنتالاندىرۋ» باعىتىن جۇزەگە اسىرۋعا ءۇش تاراپ قاتىسىپ وتىر. ەكىنشى دەڭگەيدەگى «تسەنتركرەديت بانك» جەكە قۇرىلىس سالۋشى «ۆوستوك-كليو» جاۋاپكەرشىلىگى شەكتەۋلى سەرىكتەستىگىنە جەڭىلدىكپەن نەسيە بەرەدى. ويتكەنى, حالىقتىڭ ءار ساناتىنىڭ تۇرعىن ءۇي ماسەلەسىن كەشەندى شەشۋ ماقساتىندا ەلباسىنىڭ تاپسىرماسىمەن قولعا الىنعان وسى باعدارلامانىڭ اياسىندا مەملەكەت «دامۋ» اق ارقىلى جەكە قۇرىلىس سالۋشىلاردىڭ نەسيەلەرى بويىنشا سىياقى مولشەرلەمەسىنىڭ 7 پايىزىن سۋبسيديالاپ وتىر. مۇنىڭ ءوزى سالىنعان تۇرعىن ءۇيدىڭ شارشى مەترىنىڭ قۇنىن تومەندەتۋگە مۇمكىندىك بەرىپتى. ماسەلەن, اتالعان ءۇيدىڭ نارىقتاعى باعاسى شارشى مەترىنە 200 مىڭ تەڭگە بولسا, ۇسىنىلىپ وتىرعان باسپانانىڭ شارشى مەترى - 175 مىڭ تەڭگە. «قازاقستاننىڭ تۇرعىن ءۇي-قۇرىلىس جيناق بانكى» اكتسيونەرلىك قوعامىنىڭ وبلىستىق فيليالى بۇل پاتەرلەردىڭ 50 پايىزىن ءوز سالىمشىلارىنا ۇسىنادى. تۇرعىن ءۇي راسىمدەۋدە ازاماتتاردىڭ جاسىنا قارامايدى. ءۇي قۇنىنىڭ 30 پايىزىن تولەپ, ءارى قاراي نەسيە تولەۋگە جالاقىسى جەتەتىن بولسا, كەز كەلگەن ازامات باسپانا الا الادى. وڭىرىمىزدە تۇرعىن ءۇي قۇرىلىسى قارقىندى دامىپ كەلەدى. «قازاقستاننىڭ تۇرعىن ءۇي-قۇرىلىس جيناق بانكى» سالىمشىلارىنىڭ سانى 78 مىڭنان استى. بۇگىنگى تاڭدا بانكتەن شوت اشۋعا جەڭىلدىك جاسالىپ, تەگىن جۇرگىزىلىپ جاتىر. شوتقا بەلگىلى مەرزىمگە دەيىن قارجى جيناعان سوڭ سالىمشىلارىمىز يپوتەكا عانا ەمەس, سونىمەن قاتار جەكە ءۇي سالۋىنا, باسپاناسىن جوندەۋ جۇمىستارىنا قاجەتتى نەسيەنى بانكتەن ارزان پايىزبەن الا الادى. بيىل جىل سوڭىنا دەيىن 1142 سالىمشى ءوز باسپانالارىنىڭ كىلتىنە يە بولادى. ال الداعى 2018 جىلى تاعى دا ءبىر مىڭنان استام پاتەر سالىمشىلارعا ۇسىنىلادى»,-دەيدى «قازاقستاننىڭ تۇرعىن ءۇي-قۇرىلىس جيناق بانكى» اكتسيونەرلىك قوعامى وبلىستىق فيليالىنىڭ ديرەكتورى ن.كۇزەمباەۆ.
ازامات قاسىم,
«ەگەمەن قازاقستان»
وسكەمەن