ماڭعىستاۋ وبلىسىنىڭ اكىمى ەرالى توعجانوۆ جول اپاتىنان قازا بولعاندار مەن زارداپ شەككەندەردىڭ وتباسىلارىنا 20 ميلليون تەڭگەنى ءبولۋ كەرەكتىگىن تاپسىردى, دەپ حابارلايدى ماڭعىستاۋ وبلىسى اكىمىنىڭ ءباسپاسوز قىزمەتى egemen.kz تىلشىسىنە.
اتاپ ايتساق, اپاتتا قازا بولعانداردىڭ وتباسىلارىنا 1 ملن.تەڭگە, اۋىر حالدە جاتقان 9 ادامعا 500 مىڭ تەڭگە بەرىلەدى. تاعى جاپا شەككەن 18 ادامعا 300 مىڭ تەڭگە بولىنبەك.
سونىمەن بىرگە, بۇگىن ايماق باسشىسىنىڭ توراعالىعىمەن وتكەن اپپاراتتىق جيىندا وبلىستاعى بارلىق مەملەكەتتىك ورگانداردىڭ 1 كۇندىك جالاقىسىن جول اپاتىندا زارداپ شەككەندەردىڭ وتباسىلارىنا اۋدارۋ تۋرالى شەشىم قابىلداندى.
جاڭاوزەن قالاسىنداعى اكىمدىك جانىنان 15 ادامنان تۇراتىن كوميسسيا قۇرىلدى. كوميسسيا مۇشەلەرى جول اپاتىنان كوز جۇمعان جانە جارالانعان وتباسىلارعا كومەك كورسەتۋمەن اينالىسپاق. سونداي-اق, ماتەريالدىق كومەك كورسەتۋ ءۇشىن قايىرىمدىلىق قورى قۇرىلدى. كوميسسيا مەن قايىرىمدىلىق قورىنىڭ جۇمىس بارىسىن وبلىس اكىمى ەرالى توعجانوۆ تىكەلەي قاداعالايتىن بولادى.
ەستەرىڭىزگە سالا كەتەيىك, 25 قاراشا كۇنى جاڭاوزەن ماڭىنداعى تەڭگە ەلدى-مەكەنىندە تەپلوۆوز بەن «گازەل» كولىگى سوقتىعىستى. اپات سالدارىنان 36 ادام زارداپ شەكتى. 9 ادام قايتىس بولىپ, 27 ادام جاراقات العان بولاتىن.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى