وڭتۇستىك قازاقستان وبلىسىنداعى اۋدان, قالالاردىڭ دامۋى بۇكىل وبلىس بويىنشا ءبىر كونتسەپتسيا ارقىلى دامۋ كەرەك. جالپى وڭتۇستىك قازاقستان وبلىسى - رەسپۋبليكاداعى ورتا عاسىرلىق قالالاردىڭ بولۋى جاعىنان, كولەمى جاعىنان, جالعىز ايماق بولىپ تابىلادى. بۇل تۋرالى وبلىس اكىمى جانسەيىت تۇيمەباەۆ وڭتۇستىك قازاقستان وبلىسى قالا قۇرىلىسى كەڭەسىنىڭ وتىرىسىندا ايتتى, دەپ حابارلايدى egeme.kz وقو اكىمدىگىنىڭ ءباسپاسوز قىزمەتىنە سىلتەمە جاساپ.
الداعى جىلدارى وڭتۇستىك قازاقستان وبلىسىنىڭ تاريحى قايتا جاڭعىرماق. «رۋxاني جاڭعىرۋ» باعىتىنا سايكەس ءتۋريزمدى دامىتۋ جانە تاريxتى تانىتۋ ماقساتىندا وڭىردە, وتكەن عاسىرلاردى سيپاتتايتىن ورىنداردى قايتا جاڭعىرتۋ جۇمىستارى جۇرگىزىلەدى. مەملەكەت باسشىسىنىڭ رۋحاني جاڭعىرۋ ماقالاسىنان كەيىن, ءوزىمىزدىڭ تاريحىمىزعا قۇرمەتپەن قارايتىن كەز كەلگەنىن ايتقان ايماق باسشىسى بۇگىنگى باسقوسۋدىڭ ماقساتى دا وسى ەكەنىن جەتكىزدى.
«وڭتۇستىك قازاقستان وبلىسى - ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى بويىنشا جانە ارحيتەكتۋرالىق شەشىم مەن جالپى تۋريزمدەردى كوبەيتۋ, تارتۋ كونتسەپتسياسى بويىنشا وڭتۇستىكتىڭ ءوزىنىڭ بەت-بەينەسى بولۋى قاجەت. ول قالاي بولۋ كەرەك؟ ءار جەردە ءار ءتۇرلى بولماۋى كەرەك. ياعني, وڭتۇستىك وڭىرىنە كەلگەندە سول ورتا عاسىرلىق قازاق دالاسىنىڭ, قازاق ارحيتەكتۋراسىنىڭ, قازاق ۇيلەرىنىڭ جانە تۇرمىسى مەن ءومىرىنىڭ ءيىسى شىعىپ تۇرۋى ءتيىس. بۇل جاعىنان بىزدە ەسكەرتكىشتەر جەتكىلىكتى. ەندى, ءبارىمىز بىرلەسە سول دۇنيەلەردىڭ تاريحي قالپىن بۇزباي رەتكە كەلتىرۋ جۇمىستارىنا جۇمىلا كىرىسۋىمىز كەرەك», - دەدى وبلىس اكىمى ج.تۇيمەباەۆ.
قازاقستان رەسپۋبليكاسى ساۋلەتشىلەر وداعىنىڭ مۇشەلەرى مەن قوعامدىق پىكىر كەڭەسشىلەرى جانە بەلگىلى ساۋلەتشىلەردىڭ باسى قوسىلعان كەڭەس مۇشەلەرىنىڭ جيىنىندا «ەسكى قالاشىق» مادەني ورتالىعىنداعى «اربات» جوباسى, «ورداباسى» مەموريالدىق تاريحي-مادەني كەشەنىن اباتتاندىرۋ مەن ءۇش ءبيدىڭ ەسكەرتكىشى, «فلاگشتوك» جوباسى, «قازىعۇرت - كەمە قالعان» تاريحي - مادەني كەشەنىنىڭ جوباسى سىندى 8 ارحيتەكتۋرالىق جوبا قارالدى.
ماجىلىستە كەڭەس مۇشەلەرى ساۋلەتشىلەردىڭ ۇسىنعان ورداباسى تاۋىندا ورناتىلاتىن ءۇش ءبيدىڭ ەسكەرتكىشىنىڭ ماكەتىن, تۋريستەر كەلىپ تاماشالايتىنداي اباتتاندىرۋ جۇمىستارى بويىنشا جوباسىن جانە شىمكەنتتەگى ەسكى قالا ورنىنىڭ اۋماعىندا ارحەولوگيالىق پارك-مۋزەيى, اشىق اسپان استىنداعى مۋزەي قۇرۋ جوباسىن, سونىمەن بىرگە قازىعۇرت تاۋىن تاريحي-مادەني ورتالىققا اينالدىرۋ باعىتىنداعى جوبالارى مەن ماكەتىن قىزۋ تالقىلاپ, ءوز ۇسىنىستارىن ءبىلدىردى.
سونىمەن قوسا, ساۋلەتشىلەر شىمكەنت قالاسى – 2020 جىلى تاۋەلسىز مەملەكەتتەر دوستاستىعىنىڭ مادەني ورتالىعى دەگەن اتاققا يە بولعانىن, سول جىلى قالانىڭ 2000 جىلدىق تاريحى اتالىپ وتىلەتىن بولادى. سونىمەن قاتار, شىمكەنت «جىبەك جولى» نوميناتسياسى بويىنشا الەمدىك مادەني مۇرا تىزىمىنە دە ۇسىنىلىپ وتىرعانىن ايتىپ, ەسكى قالانىڭ قۇندىلىقتارىن ساقتاي وتىرىپ, تاريحىمىزدى كورسەتە ءبىلۋىمىز كەرەك دەپ ءوز سوزدەرىن تۇيىندەدى.
ايتا كەتەيىك, ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا «قاسيەتتى قازاقستان» رەسپۋبليكالىق ورتالىعىنا وبلىستان 104 نىسان ۇسىنىلدى. قازىرگى تاڭدا رەسپۋبليكا بويىنشا 100 نىسان ىرىكتەلىپ الىنسا, ونىڭ ىشىنە وڭتۇستىك قازاقستان وبلىسىنان 23 نىسان ەنىپ وتىر. قالعان 81 تاريحي-مادەني ەسكەرتكىش جەرگىلىكتى ماڭىزى بار قاسيەتتى, كيەلى جەرلەردىڭ تىزىمىنە ەنگىزىلگەن.