گااگاداعى بۇۇ سوتى بوسنيا سەربتەرىنىڭ بۇرىنعى كومانديرى گەنەرال راتكو ءملاديچتى ومىرلىككە باس بوستاندىعىنان ايىردى. وعان ەلدە ەتنوستىق تازالاۋ جۇرگىزىپ, گەنوتسيد جانە اسكەري قىلمىس جاسادى دەپ ايىپ تاعىلدى.
بۇۇ-نىڭ بۇرىنعى يۋگوسلاۆيا جونىندەگى حالىقارالىق سوتى ر.ءملاديچتى سرەبرەنيتسادا اتىلعان 8000 مۇسىلماننىڭ جانە ساراەۆونى 43 اي قورشاۋعا العاندا قازا تاپقان 10 مىڭ ازاماتتىڭ ولىمىنە كىنالى دەپ تاپتى. رەيتەر اگەنتتىگى تاراتقان اقپاراتقا ساي, سوت شەشىمىن ەستىگەن ر.ملاديچ ىزادان جارىلىپ كەتەردەي بولىپ, «مۇنىڭ ءبارى وتىرىك, سەندەر وتىرىكشىسىڭدەر» دەپ ايقاي سالعان. ونىڭ جاقتاستارى سوت شەشىمىنە نارازىلىق ءبىلدىرىپ, ۇكىمدى قايتا قاراۋعا ارىز تۇسىرەتىنىن مالىمدەدى.
رەيتەر اگەنتتىگى سرەبرەنيتساداعى قىرعىندى ەكىنشى دۇنيەجۇزىلىك سوعىستان كەيىنگى ەۋروپادا بولعان ەڭ قاتىگەز وقيعاعا بالادى. گەنەرال ىسىنە تورەلىك ەتكەن سۋديا الفونس ورە دە سوت ۇكىمىن وقىعاندا ر.ءملاديچتىڭ ارەكەتىن ادامزاتقا جاسالعان ەڭ اۋىر قاستاندىق ەكەنىن اتاپ وتكەن-ءدى.
«بوسنيا قاساپشىسى» اتىمەن تانىمال ر.ملاديچپەن بىرگە بوسنيا-سەرب ۇلتشىلدارىنىڭ بۇرىنعى كوسەمى جانە ەتنوستىق تازالاۋدىڭ شەبەرى رادوۆان كارادجيچ جانە ولاردىڭ باسشىسى ءارى سەربيا پرەزيدەنتى بولعان سلوبودان ميلوشەۆيچ تە سوتتالۋشىلاردىڭ ىشىندە بار», دەيدى رەيتەر اگەنتتىگى.
سوت شەشىمىن بۇرىنعى يۋگوسلاۆيادان ءبولىنىپ شىققان مەملەكەتتەر باسشىلارى قولداپ وتىر. سەربيا پرەزيدەنتى الەكساندر ۆۋچيچ گەنوتسيد كەزىندە قازا تاپقان بوزداقتارعا سەربتەردىڭ قۇرمەتپەن قارايتىنىن مالىمدەدى.
بەس جىلعا سوزىلعان سوتتىڭ اقىرعى نۇكتەسى قويىلدى. رەيتەر اگەنتتىگىنىڭ مالىمەتىنشە, بۇرىنعى يۋگوسلاۆيا جونىندەگى حالىقارالىق سوت وسىمەن ءوز جۇمىسىن اياقتاماق. بۇۇ تاراپىنان 1993 جىلى قۇرىلعان سوت بالقان تۇبەگىندەگى 83 اسكەري قىلمىسقا قاتىستى شەشىم شىعارعان بولاتىن.
شولۋدى ازىرلەگەن اباي اسانكەلدى ۇلى, «ەگەمەن قازاقستان»