ەرلىكپەن قازا تاپقان تالعات قوزىباەۆتىڭ ەسىمى مەكتەپكە بەرىلدى

جاقىندا ونوماستيكالىق كوميسسيانىڭ شەشىمىمەن سىرداريا اۋدانى و.مالىباەۆ اۋىلىنداعى №131 ورتا مەكتەبىنە پوليتسيا لەيتەنانتى تالعات ەسەنتاي ۇلى قوزىباەۆتىڭ ەسىمى بەرىلدى. ال 2007 جىلى مەكتەپ اۋلاسىندا ەسكەرتكىش ورناتىلعان بولاتىن. ونىڭ اۆتورى – ەلىمىزگە بەلگىلى ءمۇسىنشى جاركەن ىسماعۇلوۆ.

ءبارى كەشەگى كۇنگىدەي ەسىمدە. 2003 جىلعى ناۋرىز ايىنىڭ 8-ىنەن 9-ىنا قاراعان ءتۇنى, ساعات 03-تە تالعات جالداپ تۇراتىن پاتەرىنە دەمالۋعا كەلگەندە, اۋىل ازاماتى اۋىلداسىنىڭ ءوزىن ۇرىپ, دەنە جاراقاتىن سالعاندىعى تۋرالى ارىزدانادى. جابىرلەنۋشىدەن قىزمەت بولمەسىندە تۇسىنىك الىپ وتىرعاندا ارىزىن قايتىپ الۋدى تالاپ ەتكەن قارۋلى قىلمىسكەر جابىرلەنۋشىنى اتۋعا ارەكەتتەنگەندە وعان قارسى ۇمتىلىپ, ونىڭ قارۋىن تارتىپ الماق بولادى. وعان وق ءتيىپ قۇلاعاندا, قىلمىسكەر مىلتىقتى قايتا وقتاپ, قاشپاققا ارەكەتتەنەدى ءارى جابىرلەنۋشىنى ەكىنشى رەت اتپاققا وقتالادى. ال تالعات جابىرلەنۋشىنى دەنەسىمەن قورعاپ, مىلتىقتى تارتىپ الماقشى بولعاندا, وعان ەكىنشى رەت وق تيەدى. كەيىن ساراپتاما قورىتىندىسى كورسەتكەندەي, تالعاتتىڭ ولىمىنە ونىڭ بەتىنە تيگەن, بەت سۇيەكتەرىن قاتتى زاقىمداعان ەكىنشى وق سەبەپ بولىپتى. 

سوڭعى جىلدارى تالعاتتى ەسكە الۋعا ارنال­عان ءىس-شارالار وتكىزىلىپ كەلەدى. سونىڭ ەڭ باس­تىسى – تارتوعاي اۋىلىنا كىرەبەرىستەگى ۇزىن كو­شەلەردىڭ بىرىنە ونىڭ ەسىمى بەرىلگەنى. 

تالعات قوزىباەۆقا ارنالعان تاعى ءبىر ۇلكەن ءىس-شارا – اتا-اناسى ەسەنتاي اعا مەن شىنار اپايعا ەل­باسى ن.نازارباەۆتىڭ جارلىعىمەن  ءىى دارەجەلى «ايبىن» وردەنىنىڭ تاپ­سىرىلۋى. بۇل شارا اۋەلى وبلىستىق ىشكى ىس­تەر باسقارماسىنىڭ ۇلكەن زالىندا باستالدى. ەسەن­تاي اعاعا ناگرادانى سول كەزدەگى وبلىس اكىمى س.نۇرعيساەۆ سالتاناتتى جاعدايدا تاپسىردى. ال تال­عاتتى ەسكە الۋ شاراسى سىرداريا اۋدانىنىڭ مالىباەۆ اتىنداعى اۋىلدا تەرەڭوزەك كەنتى اكىمشىلىگىنىڭ باستاۋىمەن وتكىزىلدى. جاڭادان سالىنعان مەكتەپ الدىنا ورناتىلعان تالعاتتىڭ ەسكەرتكىشىن سول كەزدەگى وبلىس اكىمى م.قۇل-مۇحاممەد اشقان ەدى. 

حۇسايىن قورازباەۆ,  قىزىلوردا وبلىستىق ىشكى ىستەر دەپارتامەنتى زاڭ ءبولىمىنىڭ باسشىسى