جاڭا جىل جاقىنداپ كەلەدى. جاقىنداعان سايىن ءبىر كۇندىك قىزىق ءۇشىن ءجۇز جىلدىق شىرشالاردى زاڭسىز قيىپ, ساتۋشىلار قاتارىنىڭ كوبەيە تۇسەتىنى دە بەلگىلى. وسى رەتتە ءوڭىردىڭ ورمان شارۋاشىلىعى قىزمەتكەرلەرى ايماقتاعى شىرشالاردى, ونىڭ ىشىندە جاس وسكىندەردى ءوز باقىلاۋلارىنا الدى.
قازىر تارحان ورمانشىلىعىنداعى ستاتسيونارلىق بەكەتتە قۇقىق قورعاۋ ورگاندارىمەن بىرلەسە وتىرىپ تاۋلىك بويى كەزەكشىلىك قويىلعان.
بۇدان بولەك جاس وسكىندەردىڭ زاڭسىز كەسىلۋىنە جول بەرمەۋ ءۇشىن ارنايى 5 ءموبيلدى توپ قۇرىلعان. «بيىل 1 اقپانىنان باستاپ قىلقان جاپىراقتى اعاشتاردى قيۋعا تىيىم سالىنعاندىقتان جاڭاجىلدىق شىرشالاردى دايىنداۋ كولەمى ەداۋىر ازايدى. شىرشالار تەك مادەني-بۇقارالىق شارالارعا وبلىستىق تابيعي رەسۋرستار باسقارماسىنىڭ رۇقساتىمەن زاڭ اياسىندا بەرىلەدى», دەيدى وسكەمەن ورمان شارۋاشىلىعىنىڭ ورماندى قورعاۋ جانە ساقتاۋ جونىندەگى ينجەنەرى نۇرلان ساتتىباەۆ.
جاڭاجىلدىق شىرشالاردى تاسىمالداۋشىلاردا ءتيىستى قۇجاتتارىنىڭ بولۋى دا قاتاڭ باقىلاۋعا الىنعان. ورماندى زاڭسىز وتاۋشىلارعا قولدانىلار جازا كۇشەيتىلگەن. ماسەلەن, زاڭسىز اعاش كەسۋشىلەرگە – 300, ال ۇيىنە شىرشا ورناتۋعا ءۇيىر جاندارعا 15 ايلىق ەسەپتىك كورسەتكىشكە دەيىن ايىپپۇل قاراستىرىلعان.
ازامات قاسىم, «ەگەمەن قازاقستان»
شىعىس قازاقستان وبلىسى