جۋىردا رەسەيدىڭ سانكت-پەتەربۋرگ قالاسىندا VI حالىقارالىق مادەني فورۋم ءوتتى. جيىنعا تمد, ەۋروپا, ازيا, لاتىن امەريكاسى مەن افريكا ەلدەرىنەن حالىقارالىق ۇيىمداردىڭ, ءىرى مادەنيەت مەكەمەلەرىنىڭ باسشىلارى, كورنەكتى قوعام قايراتكەرلەرى, مادەنيەت سالاسىنىڭ وكىلدەرى قاتىستى. اۋقىمدى جيىندا ەلىمىز «قوناق دارەجەسىندەگى ەل» رەتىندە ەرميتاجدىڭ باس شتابى الاڭىندا ءباسپاسوز ءماسليحاتىن وتكىزدى.
وعان مادەنيەت جانە سپورت ءمينيسترى ارىستانبەك مۇحامەدي ۇلى, «استانا-ميۋزيكل» تەاترىنىڭ ديرەكتورى اسحات ماەميروۆ, «قاسيەتتى قازاقستان» عىلىمي-زەرتتەۋ ورتالىعىنىڭ ديرەكتورى بەرىك ابدىعالي ۇلى جانە ناتاليا ساتس اتىنداعى رەسپۋبليكالىق بالالار مەن جاسوسپىرىمدەر ورىس تەاترىنىڭ ديرەكتورى نادەجدا گوروبەتس قاتىسىپ, فورۋم قوناقتارىن قوعامدىق سانانى جاڭعىرتۋعا قاتىستى ەلدەگى بىرقاتار جوبالارمەن تانىستىردى.
ەلىمىزدىڭ كيەلى جەرلەرىنىڭ جول كارتاسىن قۇرۋعا باعىتتالعان «قاسيەتتى قازاقستان» جوباسىمەن وسى اتتاس عىلىمي-زەرتتەۋ ورتالىعىنىڭ ديرەكتورى بەرىك ابدىعالي ۇلى تانىستىردى. «بۇگىنگى تاڭدا ءبىز مىڭعا جۋىق نىساندى انىقتادىق. ءبىز تەك كيەلى, قاسيەتتى جەرلەردى عانا انىقتاپ قويماي, سوعان بايلانىستى تۋىنداعان اڭىزداردى دا جينايمىز, ينتەراكتيۆتى كارتالار جاسايمىز. مۇنىڭ ءبارى تۋريستەردى تارتۋ, بۇكىل الەمگە ءبىزدىڭ مۇرامىزعا قىزىعۋشىلىق تۋدىرۋ ءۇشىن جاسالادى», دەدى ول.
ال قازاقستان تەاترلارىنىڭ دامۋ دەڭگەيىن نادەجدا گوروبەتس باياندادى. «ەلىمىزدىڭ تەاترلارىندا بارلىق رەپەرتۋارلار قارجىلاندىرىلادى. مۇندا ءار ۇلت ءوزىنىڭ ونەرىن ناسيحاتتاۋعا مۇمكىندىك الىپ وتىر», دەدى ول.
ەلىمىزدىڭ اتىنان سانكت-پەتەربۋرگكە بارعان دەلەگاتسيا VI حالىقارالىق مادەني فورۋمعا ءوز باعدارلامالارىن ۇسىندى. مىسالى, 16 قاراشا كۇنى ميحايلوۆ تەاترىنىڭ ساحناسىندا «استانا بالەت» پەن «قازاقكونتسەرت» ۇجىمدارى بىرىگىپ گالا-كونتسەرت وتكىزدى. « ۇلى دالا مۇراسى» اتتى حورەوگرافيالىق مينياتيۋرالار مەن ۇلتتىق ناقىشتاعى بالەت فراگمەنتتەرى كورسەتىلدى. «ماحاببات. جوعالتۋ. قورقىنىش» بالەتى, ەديت پياف, شارل ديۋمون, جاك برەلدىڭ مۋزىكالىق اۋەنى تانىستىرىلدى. سونداي-اق مەرەكەلىك كەشتە ەتنو-فولكلورلىق «نوماد» ءانسامبلى ەلىمىزدىڭ ۇلتتىق ءداستۇرلى مادەنيەتىن تانىستىردى.
ال «مانەج» ورتالىق كورمە زالىندا «قازاقفيلم» كينوستۋدياسى ەرلان نۇرمۇحامبەتوۆتىڭ «جاڭعاق تال» تۋىندىسىن ۇسىندى. وعان اۋىلدا ءومىر ءسۇرىپ جاتقان قاراپايىم ادامداردىڭ تاعدىرلارى وزەك بولعان. رەجيسسەردىڭ اۋىل تىرشىلىگىن ءازىل-قالجىڭمەن ورنەكتەگەن بۇل كينوكارتيناسى وڭتۇستىك كورەياداعى 20-شى پۋسان حالىقارالىق كينوفەستيۆالىنىڭ «جاڭا اعىم» سەكتسياسى بويىنشا باس جۇلدەگە يە بولعانىن, سونداي-اق بىلتىر فرانتسيادا وتكەن XXII حالىقارالىق ازيا كينوفەستيۆالىندە ەكى بىردەي جۇلدەگە لايىق دەپ تانىلعانىن ايتا كەتسەك تە ارتىق بولماس.
سانكت-پەتەربۋرگتە وتكەن فورۋم بارىسىندا قازاقستان مەن رەسەيدىڭ مادەني ىنتىماقتاستىق سالاسىنداعى قارىم-قاتىناسىنىڭ بەكەم ەكەنى بايقالدى. ونەر ادامدارى اراسىنداعى تانىستىق, جاڭا جوبالاردى بىرىگىپ جاساۋ سىندى قارىم-قاتىناستار ونەرگە سەرپىن بەرەتىنى انىق. بۇل ورايدا «28 پانفيلوۆشىلار» ءفيلمىن تۇسىرۋدەگى ىنتىماقتاستىققا بايلانىستى ەلىمىزدىڭ مادەنيەت جانە سپورت ءمينيسترىنىڭ رەسەيلىك ارىپتەسى ۆلاديمير مەدينسكيگە العىسىن ءبىلدىرۋى دە وسى فورۋم شەڭبەرىندە جۇزەگە استى. جالپى مۇنداي دەڭگەيدەگى فورۋمداردىڭ بىرلەسكەن جاڭا جوبالاردى جۇزەگە اسىرۋدىڭ تاپتىرماس مۇمكىندىك الاڭى ەكەنى دە انىق.
ايگۇل سەيىل, «ەگەمەن قازاقستان»