ەڭبەك جانە حالىقتى الەۋمەتتىك قورعاۋ مينيسترلىگىنىڭ جۇمىسىن تسيفرلاندىرۋدا بىرقاتار جەتىستىك بار. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا قر اقپارات جانە كوممۋنيكاتسيالار ءمينيسترى داۋرەن اباەۆ ايتتى, دەپ حابارلايدى قازاقپارات.
«بۇگىنگى كۇنى مەملەكەت باسشىسىنىڭ تاپسىرماسىنا ساي «تسيفرلىق قازاقستان» مەملەكەتتىك باعدارلاماسى جان-جاقتى ازىرلەنىپ جاتقانى بەلگىلى. ەكونوميكانىڭ باسەكەگە قابىلەتتىلىگىن ارتتىرۋعا باعىتتالعان وسى ىرگەلى باستامانىڭ اياسىندا الدىمىزدا كوپتەگەن مىندەتتەر تۇر. وسى ورايدا ەڭبەك جانە حالىقتى الەۋمەتتىك قورعاۋ مينيسترلىگىنە ارحيتەكتۋرا ازىرلەۋ بارىسىندا مينيسترلىكتەگى نەگىزگى ماسەلەلەر ايقىندالىپ, اۆتوماتتاندىرۋعا جول اشاتىن ستراتەگيالىق ماڭىزدى باعىتتار ناقتىلاندى», - دەدى ول.
سونىمەن قاتار داۋرەن اباەۆ ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيە مەن اقپاراتتىق كوممۋنيكاتسيالىق ينفراقۇرىلىمنىڭ نەگىزگى جاعدايى ساراپتالىپ, ولاردى وڭتايلاندىرۋ مەن دامىتۋ بويىنشا ماڭىزدى ۇسىنىستار بەرىلگەنىن باسا ايتتى.
«مينيسترلىك جۇمىسىندا بۇل باعىتتا بىرقاتار جەتىستىك بار ەكەنىن اتاپ ايتۋ كەرەك. ول: قايتالاتىن اقپاراتتىق جۇيەلەردى بىرىكتىرۋ, ولارعا ارنالعان شىعىنداردى وڭتايلاندىرۋ ماسەلەلەرى. سونداي-اق مينيسترلىكتىڭ جەرگىلىكتى اتقارۋشى ورگاندارمەن اقپاراتتىق ءىس-قيمىلىندا قوسارلانعان شارالاردىڭ جوق ەكەندىگىن اتاپ ايتقان ءجون. وسى تۇرعىدا ماقساتتى جوبالاردىڭ ارحيتەكتۋراسى مەن جول كارتاسى ازىرلەندى. سونىڭ ىشىندە ماڭىزدىسى - ەلەكتروندى ەڭبەك بيرجاسىن دامىتۋ, الەۋمەتتىك مارتەبەلەر مەن الەۋمەتتىك كومەكتى ەسەپكە الۋدىڭ بىرىڭعاي جۇيەسى, قىزمەتكەرلەردىڭ ءپروفيلىن جۇرگىزۋ جانە ەڭبەك شارتتارىن ەسەپكە الۋ جۇيەسىن قۇرۋ, پرواكتيۆتى الەۋمەتتىك قىزمەتتەر كورسەتۋ ءۇشىن ومىرشەڭ جاعدايلار جۇيەسىن ەسەپكە الۋ. وسى ارحيتەكتۋرانىڭ جوباسى ساراپشىلىق كەڭەسكە تانىستىرىلىپ, كەلىسىلدى»,- دەدى مينيستر.
ايتا كەتەيىك, بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا الەۋمەتتىك-ەڭبەك سالاسىن تسيفرلاندىرۋ جايىندا بايانداما جاساعان بولاتىن.