ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ بىرنەشە دەپۋتاتى شىعىس قازاقستان, سەمەي وڭىرىندە بولىپ, جەرگىلىكتى تۇرعىندارمەن كەزدەسۋلەر وتكىزگەن ەدىك. سول ساپاردا كوز كورگەن, كوڭىلگە تۇيگەن بىرقاتار ماسەلەلەر جونىندە وي بولىسپەكپىن.
سەمەي – ەڭ الدىمەن ۇلى ابايدىڭ ەلى. تاۋەلسىزدىكتىڭ 1995 جىلى اباي جىلى دەپ جاريالانىپ, دانىشپاننىڭ 150 جىلدىعى الەمدىك دەڭگەيدە اتالىپ ءوتتى. سودان بەرى دە ءبىراز ۋاقىت ءوتىپتى. 2020 جىلى ابايدىڭ تۋعانىنا 175 جىل تولادى. وسى ۇلىق مەرەكەنى ءوز مانىندە اتاپ وتۋگە دايىندىقتى بۇگىنگى كۇننەن باستاعان ءجون. جانە ول ەلىمىز كولەمىندە ءوتىپ جاتاتىن ءتۇرلى مادەني-رۋحاني شارالاردان تاقىرىبى, مازمۇنى, ءتىپتى كولەمى جونىنەن دە مۇلدە بولەك, تىڭ تۇرپاتتى جاعدايدا ۇيىمداستىرىلسا دەگەن تىلەگىمىز بار.
وسى ماقساتپەن پرەمەر-ءمينيستردىڭ ورىنباسارى ە.دوساەۆقا ساۋال جولداپ, تومەندەگى ۇسىنىستاردى جاسادىق:
بىرىنشىدەن, سەمەي قالاسىنان اباي ەلىنە, قاراۋىلعا, جيدەبايعا باراتىن جولدىڭ ساپاسى سىن كوتەرمەيدى. سوندىقتان 181 شاقىرىمدىق سەمەي – قاراۋىل جولىن كۇردەلى جوندەپ قانا قويماي, ونىڭ «اباي جولى» ەكەندىگىن ايعاقتايتىنداي فورما, مازمۇن بەرىلسە, ارنايى ەسكەرتكىش بەلگىلەر ورناتىلسا ەكەن;
ەكىنشىدەن, قاراۋىل, جيدەباي سىندى قازاقستاننىڭ تاريحي-مادەني مۇراسى مەن الەۋمەتتىك-ساياسي ومىرىندەگى ماڭىزدى ورىن الاتىن قاسيەتتى ورىندار – بۇگىندە ۇلتتىق بىرلىك پەن جاڭعىرۋ نىشانى رەتىندەگى نىساندار. «قازاقستاننىڭ جالپىۇلتتىق قاسيەتتى جەرلەرىن» بەلگىلەۋ ماقساتىندا قۇرىلعان عىلىمي-ساراپتامالىق كەڭەس ەلىمىزدىڭ قاسيەتتى جەرلەرىن انىقتاۋ, عىلىمي تىزىمدەۋ مەن جۇيەلەۋ بارىسىندا اباي ەلىن ەرەكشە ەسكەرسىن;
ۇشىنشىدەن, جىل سايىن وتكىزىلەتىن رەسپۋبليكالىق «اباي وقۋلارى» بايقاۋىنىڭ اياسىن كەڭەيتۋ جانە اباي شىعارماشىلىعىن ناسيحاتتاۋ ارقىلى ۇرپاقتىڭ قازاق مادەنيەتىنە, ءتىلى مەن ادەبيەتىنە دەگەن ىقىلاسىن ارتتىرۋ, قازاقستاندىق رۋحاني بىرلىكتى قۋاتتاۋ, وتانسۇيگىشتىك سەزىمدى ارتتىرۋ ماقساتىن كوزدەۋ كەرەك;
تورتىنشىدەن, «رۋحاني جاڭعىرۋ» باعدارلاماسى اياسىندا جاسالاتىن «قازاقستاننىڭ كيەلى جەرلەرىنىڭ كارتاسى» ۇلى اباي ەلىنەن باستالىپ, ودان اقمەشىتتەگى التىن شوقىعا, تارازدان تەرەكتىگە, ساۋراننان سارايشىققا, قارابۋرادان قاراحانعا, وقشى اتادان ويسىلقاراعا جانە ۇلاعاتتى ۇلىتاۋعا ۇلاسسىن دەگەن تىلەگىمىز بار. وسى ساۋالداعى ۇسىنىستاردى قولداپ بىرنەشە ارىپتەستەرىم قولدارىن قويدى.
نۇرلان دۋلاتبەكوۆ,
ءماجىلىس دەپۋتاتى