بۇگىن ۇلتتىق ۇلاننىڭ 5573 اسكەري بولىمىندە «ۇلتتىق ۇلان - ناعىز ەرلەر ءۇشىن!» ۇرانىمەن اسكەرگە شاقىرىلۋشىلار كۇنى ءوتتى. بۇل تۋرالى ۇلتتىق ۇلان ءباسپاسوز قىزمەتى حابارلادى.
بۇل شارانى كوكتەمگى, كۇزگى شاقىرىلىم كەزدەرىندە تۇراقتى تۇردە وتكىزۋ - ءداستۇرلى ۇردىسكە اينالدى. شارا بارىسىندا 5573 اسكەري ءبولىمىنىڭ باسشىلىعى مەن استانا قالاسى قورعانىس ىستەر جونىندەگى دەپارتامەنتى كۇزگى شاقىرىلىم بويىنشا 50 ازاماتتى سالتاناتتى تۇردە شىعارىپ سالدى. استانا قالاسى جانە اقمولا وبلىسىنان شاقىرىلىپ وتىرعان بولاشاق ساربازدار ۇلتتىق ۇلاننىڭ الماتى قالاسىندا ورنالاسقان 5571 اسكەري بولىمىندە وتان الدىنداعى مىندەتتەرىن وتەيتىن بولادى.
شاقىرىلۋىشالار عانا ەمەس, ولاردىڭ اتا-انا, تۋعان-تۋىستارى, مەكتەپ وقۋشىلارى قاتىسقان جيىندا وسكەلەڭ ۇرپاقتى پاتريوتتىق رۋحتا تاربيەلەۋ باعىتىندا كەشەندى جۇمىستار ۇيىمداستىرىلدى. وقۋشىلار مەن قوناقتارعا, بولاشاق وتان قورعاۋشىلارعا اسكەري قىزمەتشىلەردىڭ جاۋىنگەرلىك دايىندىعى, تۇرمىس-تىرشىلىگى, اسكەردىڭ قارۋ-جاراق جانە تەحنيكاسى تانىستىرىلدى. سونىمەن قاتار, قوناقتارعا مەرزىمدى اسكەري قىزمەتشىلەردىڭ اتقاراتىن نەگىزگى مىندەتتەرىن باياندايتىن فيلم كورسەتىلدى, قۇرمەت قاراۋىل روتاسىنىڭ قابىلەت-ونەرى پاش ەتىلدى.
اسكەري ءبولىمنىڭ مادەني ورتالىعىندا ساربازدار «ەلىمنىڭ ساقشىلارى», «ساربازدار», «انا» جانە «قالا كۇزەتىندە» سىندى اندەر شىرقاپ, كوپشىلىك نازارىنا كونتسەرتتىك باعدارلاما ۇسىندى.
استانا قالاسى قورعانىس ىستەرى جونىندەگى دەپارتامەنتى باستىعىنىڭ ورىنباسارى پودپولكوۆنيك عاني ارتىقوۆ قازاقستان رەسپۋبليكاسى قارۋلى كۇشتەرىندە قىزمەت ەتۋ – ءار ازاماتتىڭ مىندەتى, ال وتان قورعاۋ – قاستەرلى بورىش ەكەنىن ايتتى. ول سونداي-اق, وسىنداي دەنى ساۋ, جاۋاپتى پەرزەنت تاربيەلەگەنى ءۇشىن اتا-انالارعا العىس ءبىلدىرىپ, بولاشاق ساربازدارعا قيىندىعى مول اسكەري قىزمەتتە تابىس, ابىروي, ساتتىلىك تىلەدى.
شاقىرىلۋشىلار كۇنىن وتكىزۋدەگى باستى ماقسات – جاس ۇرپاقتى پاتريوتتىق رۋحتا تاربيەلەۋدى, ۇلتتىق ۇلان قاتارىنداعى اسكەري قىزمەتتى اشىق كورسەتۋدى, قۇقىقتىق ءتارتىپ اسكەرىنىڭ قوعام الدىنداعى بەدەلىن ارتتىرۋ بولاتىن.
- مەن استانا قالاسىنان اسكەرگە كەتكەلى وتىرمىن, كەۋدەمدى ماقتانىش سەزىمى كەرنەپ تۇر. نەگە دەسەڭىز, مەن ءسال كۇندە ۇلاندىق اتانىپ, ەلىمدى عانا ەمەس, ءوز تەگىمنىڭ دە ابىرويىن قورعاماقپىن. اسكەري ادام ءار ىستە جاۋاپتى, قىراعى ءارى ءتوزىمدى بولا ءبىلۋ كەرەك دەپ ەسەپتەيمىن. سوندىقتان دا, ءوز قۇربىلارىما ابىرويلى قىزمەت ەتۋىن تىلەيمىن. الدىمىزدا كۇتىپ تۇرعان ۇلكەن ءومىر مەكتەبى ءبىزدى شىڭداپ, ناعىز ازاماتقا اينالدىرسىن, – دەدى بولاشاق جاۋىنگەر نۇرجان ەرمەنوۆ.
مەكتەپتەن ەندى عانا تۇلەپ ۇشىپ, شاتتىققا بولەنىپ, ۋايىمسىز قىدىرىپ جۇرگەن بوزبالالاردى الدا جاۋاپتى ءومىر, جاڭا جولداستار, ۇلكەن مىندەتتەر كۇتىپ تۇر. ەلىمىزدىڭ ءار تاراپىنان كەلگەن جاڭا دوستارىمەن ءبىر ساپتا ورتاق وتانىمىز – قازاقستان رەسپۋبليكاسىنىڭ تىنىشتىعى مەن قاۋىپسىزدىگىن قامتاماسىز ەتەتىن بولادى.