لەبياجى اۋدانى ىشكى ساياسات ءبولىمىنىڭ حابارلاۋىنشا, «جۇمىسپەن قامتۋدىڭ جول كارتاسى-2020» باعدارلاماسى اياسىندا اۋدان ورتالىعى اققۋلىدا سالىنعان 24 پاتەرلى تۇرعىن ءۇي قۇرىلىسىنا وبلىستىق بيۋدجەتتەن 32 ميلليون تەڭگە قاراجات ءبولىنىپتى.
جەرگىلىكتى مەردىگەر فيرما تۇرعىن ءۇي قۇرىلىسىن كوپكە سوزعان جوق. قارا سۋىققا قالدىرماي, اينالاسى ءۇش-ءتورت ايدىڭ ىشىندە سالىپ ءبىتىردى. اۋدان اكىمدىگىنىڭ شەشىمىمەن, جاڭا ۇيدەگى پاتەرلەر ءبىرىنشى كەزەكتە «ديپلوممەن – اۋىلعا!» باعدارلاماسى بويىنشا اۋدانعا كەلگەن جاس ماماندارعا بەرىلدى. ولار اۋداندىق اۋرۋحاناعا بيىلعى جىلى كەلگەن سەمەي مەديتسينالىق اكادەمياسىنىڭ تۇلەگى, اكۋشەر-گينەكولوگ ءمادينا ايتقۇلوۆا, حيرۋرگ ساعادي مەن ونىڭ جۇبايى اكۋشەر-گينەكولوگ ەركەجان اكىمبەكوۆتەردىڭ وتباسى, حيرۋرگ ايدوس نۇربەكوۆ پەن ونكولوگ-دارىگەر ۇلجان تولەباەۆانىڭ وتباسى. بايان-ولگەي ايماعىندا دۇنيەگە كەلگەن ليزا مۇرات كەنتاۋداعى ۋنيۆەرسيتەتتىڭ مەديتسينا فاكۋلتەتىن ءبىتىرىپ, قازىر تەراپەۆت دارىگەر بولىپ قىزمەت ەتۋدە. دارىگەرلەرمەن بىرگە اققۋلىداعى «ونەر» مەكتەبىنە قىزمەتكە كەلگەن مانشۇك قادىسوۆاعا, اۋداندىق بالالار ءۇيىنىڭ تاربيەلەنۋشىسى يۋري سۋرگۋتانوۆقا دا ءبىر بولمەلى پاتەر بەرىلدى. جاڭا پاتەرلەر ورتالىق جىلۋ جۇيەسىنە قوسىلعان. جاستار ءۇشىن بارلىق جاعداي جاسالىپتى.
سونىمەن بىرگە «ديپلوممەن – اۋىلعا!» باعدارلاماسى اياسىندا وتكەن جىلى اۋرۋحاناعا قىزمەت ەتۋگە كەلگەن جاس مامان دارىگەرلەر قۋات اۋلاباەۆ, اقبوتا مەدەشوۆا, دەنيس ۆينوگوروۆ, ايدوس نۇربەكوۆ, جاندوس نۇربەكوۆ, باقىتجان كاراپچين اۋدان اكىمىنىڭ ديپلومى مەن 500 مىڭ تەڭگەلىك سەرتيفيكاتتارعا يە بولدى. ىشكى ساياسات ءبولىمىنىڭ حابارىنشا, جاس ماماندارعا بەرىلگەن 3 ميلليون تەڭگە جەرگىلىكتى اكىمدىك تاراپىنان بولىنگەن.
جالپى, وڭىردە بيىلعى جىلى «ديپلوممەن – اۋىلعا!» باعدارلاماسى اياسىندا 151 جاس مامان اۋىلدارعا بارادى دەپ جوسپارلانعان-دى. ماماندارعا الەۋمەتتىك قولداۋ كورسەتۋ شارالارىن ىسكە اسىرۋ بويىنشا بيۋدجەتتەن 513,9 ميلليون تەڭگە ءبولۋ دە قاراستىرىلدى. فاريدا بىقاي, «ەگەمەن قازاقستان»
پاۆلودار وبلىسى, لەبياجى اۋدانى
سۋرەتتى تۇسىرگەن اراي بوتاباەۆا