كەزىندە المانىڭ اپورت سورتىن ءوسىرىپ, وڭدەۋمەن اينالىسقان تۇلكىباس اۋدانىنىڭ باعباندارى بۇل ءىستى قايتا قولعا الىپ وتىر. ەندى ولار تۇلكىباستىڭ برەندى بولاتىن الما باۋ شارۋاشىلىعىن دامىتۋ ماقساتىنداعى جۇمىستاردى شيراتۋدا.
ماسەلەن, اۋداندا سوڭعى 3 جىلدا شارۋالاردىڭ الما ەگۋگە دەگەن قىزىعۋشىلىقتارى ارتقان, ياعني, ولار بوس جاتقان 814 گا جەرگە الما باۋ ەگىپ, مەملەكەتتەن بەرىلەتىن سۋبسيدياعا قول جەتكىزگەن. ال, بيىل ولار 355 گا جەرگە الما باۋ وتىرعىزىدى. ونىڭ ىشىندە 122 گەكتارى قارقىندى باۋ.
تۇلكىباستىق شارۋالار كۇزگى تەرىم جۇمىستارىن ۋاقتىلى جۇرگىزىپ, باۋ-باقشالاردان 24 مىڭ توننادان استام الما جينادى. جينالعان المالاردىڭ باسىم كوپشىلىگى ارنايى قويمالاردا ساقتالسا, قالعانى ەلىمىزدىڭ وزگە ايماقتارىندا ساتىلىمعا شىعارىلۋدا. اسىرەسە اۋدانداعى ەڭ ءىرى «كوكتال» جانە «كەن-تاۋ» شارۋاشىلىقتارى 5970 توننا الما جيناعان.
جالپى تۇلكىباس اۋدانى تاۋلى ايماقتا ورنالاسقان. اۋا رايى قوڭىر سالقىن, الما-باۋ جەمىس اعاشتارىن وسىرۋگە وتە قولايلى ايماق بولىپ ەسەپتەلەدى. بۇگىنگى تاڭدا اۋدانداعى بارلىق جەمىس اعاشتارىنىڭ كولەمى 3115 گەكتاردى قۇراپ وتىر. 2020 جىلعا دەيىن اۋدان كولەمىندە الما باۋ كولەمى 3600 گەكتارعا جەتكىزىپ, ونىڭ ىشىندە اۋداندا قارقىندى باۋلاردى ءوسىرۋ دامىتىلىپ, ءونىم كولەمىن ۇلعايتۋ جوسپارلانۋدا.