ءحىىى ۇلتتىق دەلفي ويىندارىنىڭ بيىلعى ەستافەتاسىن قىزىلجار ءوڭىرى قابىلداپ, اشىلۋ سالتاناتى پوگودين اتىنداعى ورىس دراما تەاترىندا «ونەرىم – رۋحاني قازىنام» دەگەن اتپەن ءوتتى. ونى ۇلتتىق دەلفيلىك كوميتەت ۇيىمداستىرىپ, وبلىستىق اكىمدىك جان-جاقتى قولداۋ كورسەتتى.
حالىقارالىق دەلفي كوميتەتىنىڭ ديرەكتورى ۆلاديمير پونياۆين ەجەلگى گرەك جەرىنەن باستاۋ العان قوزعالىس قازاقستاندا دا كەڭ قانات جايعانىن, حالىقارالىق مارتەبە العالى اۋقىمى كەڭەيىپ, ساپالىق مازمۇنى ارتقانىن تىلگە تيەك ەتتى. ۇلتتىق دەلفي كورپوراتيۆتىك قورىنىڭ جەتەكشىسى, جوبا ۇيلەستىرۋشىسى قۇرالاي تۇسىپەكوۆا سايىسقا وبلىستار مەن الماتى جانە استانا قالالارىنان 600-گە جۋىق قاتىسۋشىنىڭ تارتىلعانىن, فورتەپيانو, ۇلتتىق اسپاپتار, تەاتر, حالىق, اكادەميالىق, ەسترادالىق اندەر ورىنداۋ, فوتوسۋرەت, تەلەجۋرناليستيكا, كيىم ديزاينى, دەكوراتيۆتى-قولدانبالى ونەر سەكىلدى 18 اتالىم بويىنشا باسەكەگە تۇسەتىنىن العا تارتتى. دودانىڭ ەرەكشەلىگى سول, ەستۋ قابىلەتى ناشار بالالار ءۇشىن «حورەوگرافيا» جانە «يشارامەن ءان ايتۋ» اتالىمدارى ەنگىزىلىپ, قاتىسۋعا 100-گە تارتا ۇمىتكەر ءوتىنىش بىلدىرگەن. بۇدان تىسقارى «قولاربامەن بيلەۋ» اتالىمىنىڭ تۇساۋى كەسىلمەك.
تەاتر الدىنداعى الاڭدا دەلفي ويىندارىنىڭ تۋى كوتەرىلىپ, الاۋى جاعىلىپ, ءانۇرانى شىرقالدى. كورەرمەندەر «جەڭىستەرگە بىرگە!» اتتى پاراليمپيادالىق باستامالار شەڭبەرىندە وتكىزىلگەن «قولاربادا بيلەۋ» اتالىمىنىڭ جەڭىمپازدارى ەرلان نۇرماعانبەتوۆ پەن ساندۋعاش اقانوۆانىڭ جۇپتىق بيىنە, بەلگىلى انشىلەر ءالي وقاپوۆتىڭ, الىشەر كارىموۆتىڭ اۋەلەتە شىرقاعان اندەرىنە دۋىلداتا قول سوقتى.
ءار ايماقتان سايدىڭ تاسىنداي ىرىكتەلىپ كەلگەن ورەندەر 10-15 جانە 16-21 جاس ارالىعى بويىنشا ەكى توپقا ءبولىنىپ, 12 مادەني ورىندا جارىس كورىگىن قىزدىردى. مادەنيەت پەن ونەردىڭ برەندىنە اينالعان جاستار بايقاۋى كونە كلاسسيكادان باستاپ قازىرگى ونەرگە دەيىن بىرىكتىرىپ, شىنايى شەبەرلىك پەن شالقار شابىت قاتار ءورىلىپ جاتتى.
جاس تالانتتار مەن دارىنداردىڭ بىرنەشە كۇنگە سوزىلعان شىعارماشىلىق بايقاۋىندا جالپىكوماندالىق ەسەپتە سولتۇستىك قازاقستان وبلىسى قورجىنعا 9 التىن, 11 كۇمىس, 6 قولا سالىپ, ءبىرىنشى ورىنعا يە بولدى. ەكىنشى, ءۇشىنشى ورىنداردى استانا قالاسى مەن اقمولا وبلىسى ءبولىستى.
جەكەلەگەن اتالىمدار بويىنشا ءدىلناز تاشمۇحامەد («حالىق اندەرى», قىزىلوردا وبلىسى), بەكزات پىرىلەپەسوۆ («دومبىرا», وڭتۇستىك قازاقستان وبلىسى), رىستىگۇل كوشەروۆا («بەينەلەۋ ونەرى», سولتۇستىك قازاقستان وبلىسى), مەرەي ىنتىموۆ («كيىم ديزاينى», استانا) توپ جاردى. سول سياقتى «تەلەجۋرناليستيكادان» نۇرسۇلتان ابباز پەن قالدىباي ەلەۋوۆ (وڭتۇستىك قازاقستان وبلىسى), «قوبىزدان» گ ۇلىم اتوشەۆا (باتىس قازاقستان وبلىسى), «يشارامەن ءان ايتۋدان» ەلميرا بالتىقوۆا (الماتى وبلىسى), «حورەوگرافيادان» «Sensitive» بي توبى (پەتروپاۆل قالاسى) جەڭىمپاز دەپ تانىلدى.
جەڭىمپازدار مەن جۇلدەگەرلەرگە ارنايى سەرتيفيكاتتار, سىي-سياپاتتار تاپسىرىلىپ, ماراپات سوڭى گالا-كونتسەرتكە جالعاستى.
ونەر, مادەني شىعارماشىلىق بايقاۋىنىڭ ەڭ ۇزدىكتەرى حالىقارالىق دەلفي ويىندارىنا جولداما الدى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى