اقش-تىڭ فەدەرالدىق جانە مەملەكەتتىك قۇقىق قورعاۋ وگاندارى تەحاس شتاتىنداعى سازەرلەند-سپرينگس قالاسىنداعى باپيستىك شىركەۋدە 26 ادامدى ولتىرگەن كۇدىكتىنىڭ بۇرىن اقش اسكەري-اۋە كۇشتەرىندە جۇمىس ىستەگەن دەۆين كەللي ەكەنىن راستادى.
26 جاستاعى كەللي 2010-2014 جىلدار ارالىعىندا نيۋ-مەكسيكوداعى Holloman اۋە بازاسىنىڭ ماتەريالدى-تەحنيكالىق قامتۋ بولىمىندە جۇمىس ىستەگەن, دەپ حابارلادى اسكەري-اۋە كۇشتەرىنىڭ ءباسپاسوز حاتشىسى ەنن ستەفانەك.
ول تەحاس شتاتىنىڭ نيۋ-براۋنفەلس قالاسىندا تۇرعان. كەللي بالاسى مەن ايەلىنە شابۋىل جاساعانى ءۇشىن 20 ايعا قاماۋعا الىنىپ, اسكەري ستاتۋسىنان ايىرىلعان. فەدەرالدىق تەرگەۋ بيۋروسى كۇدىكتىنىڭ ءۇيىن ءتىنتىپ, الەۋمەتتىك جەلىدەگى پاراقشالارىن تەكسەرىپ جاتىر. كەلليدىڭ Facebook الەۋمەتتىك جەلىسىندەگى پاراقشاسىندا AR-15 تاپانشاسىنىڭ سۋرەتى تۇر.
تەحاستىڭ قوعامدىق قاۋىپسىزدىك دەپارتامەنتىنىڭ ديرەكتورى فريمەن مارتين كۇدىكتىنىڭ قارا كيىمدە بولعانىن, بالليستيكالىق جيلەت كيگەنىن ايتتى.
ەستەرىڭىزگە سالا كەتسەك, امەريكانىڭ تەحاس شتاتىنداعى سان-انتونيو قالاسىنىڭ ماڭىنداعى باپتيستىك شىركەۋلەردىڭ بىرىندە قارۋلى ەر ادام وق جاۋدىرىپ, كەمىندە 26 ادام قايتىس بولدى. ونداعان ادام جاراقات الىپ, اۋرۋحاناعا جەتكىزىلدى.
دايىنداعان گۇلنۇر قۋانىشبەكقىزى,
"ەگەمەن قازاقستان"