79 جىل بۇرىن ومىردەن وزعان اتاتۇرىكتى ەسكە الۋ ماقساتىمەن يۋنۋس ەمرە اتىنداعى تۇرىك مادەنيەت ورتالىعى 10 قاراشادا «اتاتۇرىك فوتوكورمەسى» اتتى شارانى تۇركيانىڭ قازاقستانداعى ەلشىلىگىنىڭ قولداۋىمەن ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وتكىزەدى, دەپ حابارلادى ورتالىقتىڭ ءباسپاسوز قىزمەتى.
كورمەگە قويىلاتىن فوتولار اتاتۇرىك ءوزى نەگىزىن قالاپ كەتكەن ۇلكەن ەكى ۇيىمنىڭ ءبىرى «تۇرىك تاريح ۇيىمىنىڭ» ارحيۆىنەن الىندى. استانالىقتار مەن قالا قوناقتارىنا كورمەدە تاريحي ماڭىزى زور 40 فوتو ۇسىنىلادى. وسى فوتولاردىڭ اراسىندا قازاقستاندىقتار بۇرىن –سوڭدى كورمەگەن كوپتەگەن سۋرەتتەر بار.
كورمەنىڭ اشىلۋ سالتاناتىندا تۇركيانىڭ قازاقستانداعى ەلشىسى نەۆزات ۋيانىك مىرزا, پارلامەنتتەن وكىلدەر, يۋنۋس ەمرە اتىنداعى تۇرىك مادەنيەت ورتالىعىنىڭ م.ا الماگۇل يسينا ءسوز سويلەيدى. تانىمال ايتىس اقىنى اسەم جۇماعازينا باۋىرلاس تۇرىك حالقىنىڭ كوسەمىنە ارناعان ولەڭىن دومبىرادا ورىندايدى. يۋنۋس ەمرە ورتالىعىندا تۇرىكشە ۇيرەنۋشىلەر اتاتۇرىك تۋرالى قازاقشا جانە تۇرىكشە ولەڭدەر وقىسا, البينا ابەنوۆا اتاتۇرىكتىڭ قارىنداشپەن سالعان پورترەتىن قۇرمەتتى قوناقتارعا سىيلايدى.