«ماككابي» كومانداسىنىڭ باس باپكەرى يوردي كرويف ەۋروپا ليگاسى 4-تۋرىنىڭ اياسىندا «استاناعا» قارسى ويىن جايلى پىكىر ءبىلدىردى.
– ءبىر جىل بۇرىن كومانداعا جاڭا ويىنشىلار جەتىسپەيدى دەپ ايتقان ەدىڭىز. بۇگىن «استاناعا» ەسە جىبەردىڭىزدەر...
– بۇگىن كوماندام مىنەزدى ەكەنىن كورسەتتى. قارسىلاستارىمىزعا كوپ سوققى جاسادىق. ويىننىڭ باسىم بولىگىندە دوپقا يەلىك ەتتىك. الاڭدا جەڭىسكە لايىق ءبىر عانا كوماندا بولدى. ول – «ماككابي». بىراق بىزگە ساتتىلىك جەتىسپەدى. بۇل – فۋتبول. ناتيجەسىن وزدەرىڭىز دە كورىپ وتىرسىزدار قالاي اياقتالعانىن.
– ءتورت تۋردان كەيىن «ماككابي» ەۋروپا ليگاسىنىڭ توپتىق كەزەڭنەن شىعۋ مۇمكىندىگىنەن ايىرىلدى. بۇل تۋرالى ءوز پىكىرىڭىزدى ءبىلدىرىپ وتسەڭىز.
– ەگەر الداعى ۋاقىتتا ءدال بۇگىنگىدەي دەڭگەيدە ويناساق ۇلكەن جەتىستىكتەرگە جەتەمىز دەپ ويلايمىن. ويىنشىلارىما قويار ەشقانداي كىنام جوق. ولار وزدەرىن 200%-عا سالدى. تەك ساتتىلىك ءبىزدىڭ جاقتا بولمادى.
– «ماككابيدىڭ» بۇگىنگى ويىنىن ەڭ جوعارى دەڭگەيى دەپ ەسەپتەۋگە بولا ما؟
– ەڭ ءبىرىنشى, بىزدە جاراقات الىپ, ماتچقا قاتىسا الماعان ويىنشىلاردىڭ كوپ بولعانىن ەستەن شىعارمايىق. وسىنىڭ سالدارىنان بۇكىل اۋىرتپالىق نەگىزگى ويىنشىلارعا ءتۇستى. ولار ءوز ۇلتتىق قۇرامالارىنىڭ ويىنشىلارى. بىراق ءبارى فيزيكالىق تۇرعىدا دايىن ەمەس ەدى. جاراقات العان ويىنشىلار ەمدەلگەننەن كەيىن ءبىز دە جوعارى دەڭگەيدە ونەر كورسەتىپ, شابۋىلداۋشى كوماندالاردىڭ قاتارىنا قوسىلامىز. جالپى ايتقاندا بۇگىن شاكىرتتەرىم جاقسى ويىن كورسەتتى. كەيىنىرەك ماتچتى قايتا كورىپ, تالداۋ جۇرگىزەتىن بولامىن. ال بۇگىن جاقسى ويىن كورسەتكەنىمىزدى تاعى ءبىر مارتە ايتا كەتەيىن.
«استانانى», اسىرەسە باس باپكەرى ستانيمير ستويلوۆتى جەڭىسىمەن قۇتتىقتاعىم كەلەدى. ول وتە جاقسى ادام. قازاقستاندىق ۇجىم بۇدان دا بيىكتەرگە كوتەرىلەدى دەپ ۇمىتتەنەمىن. ال ءوزىمىز «سلاۆيانى» جەڭىپ, «استانانىڭ» توپتىق كەزەڭنەن شىعۋىنا كومەكتەسۋ ءۇشىن بارىمىزدى سالامىز.
– ويىنشىلارىڭىزعا دەگەن كوزقاراسىڭىزدى وزگەرتىپ, قاتال باپكەر بولۋ تۋرالى ويلاندىڭىز با؟ ءسىز ىلعي دا ءوز شاكىرتتەرىڭىزدى قورعاپ جۇرەسىز.
– ءتورت ايدا 26 ويىن وتكىزگەنىمىزدى دە ءتۇسىنۋ كەرەك. بۇعان تاعى جاراقات العان ويىنشىلاردى قوسىڭىز. كوماندانىڭ شارشاعانىن وسىدان-اق بىلۋگە بولادى. وسىعان قاراماستان ءبىز جاقسى ويىن كورسەتىپ ءجۇرمىز. سوڭعى ەكى ويىندا سەگىز گول سوقتىق. بۇگىنگى ويىندا بار مۇمكىندىگىمىزدى ءتيىمدى پايدالانعاندا 3:0 ەسەبىمەن جەڭىسكە جەتەر مە ەدىك؟! بىراق بۇل – فۋتبول. «استانا» ءوزىن جاقسى قىرىنان كورسەتتى.
– «ماككابي» ەندى بار كوڭىلىن ىشكى بىرىنشىلىككە بولە مە؟ كومانداعا جاڭادان ويىنشىلار قوسىلا ما؟
– ءدال سولاي. ال ترانسفەرلىك جاعىنا كەلەر بولساق, الدا ءالى ەكى اي ۋاقىتىمىز بار. ازىرگە ول تۋرالى ەشنارسە ايتا المايمىن.
– «استانا» بۇگىن بەس قورعاۋشىمەن ونەر كورسەتتى. بۇل سىزدەرگە توسىن جاعداي بولدى ما؟ ەكى ويىندا دا گول سوعا المادىڭىزدار. وسىعان قاراپ قازاقستان فۋتبولى يزرايلدىكىنەن جوعارى دەپ ايتۋعا بولا ما؟
– ۇلتتىق قۇرامالاردىڭ دەڭگەيىن كلۋبتىق ويىندارعا قاراپ انىقتاۋعا بولمايدى. بىراق يزرايل فۋتبولى ناشار دەپ ايتا المايمىن. ءيا, «استانا» «ماككابيدى» ەكى كەزدەسۋدە دە جەڭدى. دەگەنمەن ستاتيستيكاعا ءمان بەرەتىن بولساق بۇگىن الاڭدا ءبىر عانا كوماندانىڭ بولعانىن بايقاۋعا بولادى. بۇل جەردە ۇلتتىق قۇرامالاردى سالىستىرۋ ورىنسىز دەپ بىلەمىن. مىسالى, وتكەن جىلى ءبىز الماتىنىڭ «قايراتىن» جەڭگەن بولاتىنبىز. وسى تۇستا بيىل «قايرات» چەمپيون اتانادى دەپ ويلايمىن. ال يزرايل ۇلتتىق قۇراماسى قازاقستاننان مىقتى دەپ ەسەپتەيمىن.
– الاڭنىڭ ساپاسىزدىعى سىزدەرگە قيىندىق تۋدىرمادى ما؟
– نەگىزى ستاديونىمىزدا الاڭنىڭ ساپاسى جوعارى بولاتىن. بىراق ويىننىڭ ناتيجەسىنە بۇل سەبەپ بولدى دەپ ويلامايمىن. ءبىز نەگىزىنەن شابۋىلداۋمەن, دوپقا كوبىرەك يەلىك ەتۋمەن بولدىق. ال «استانا» جالعىز عانا مۇمكىندىگىن ءتيىمدى پايدالانا ءبىلدى.
الماس ماناپ, «ەگەمەن قازاقستان» – نەتانيادان (يزرايل)