قازاقستاندا وقۋشىلارعا ارنالعان «كوشباسشى جولى» تۋرى باستالدى

تۋرلارعا الماتى, اقمولا, جامبىل, قاراعاندى, پاۆلودار جانە وڭتۇستىك قازاقستان وبلىسىنىڭ 13 جانە 17 جاس ارالىعىنداعى 480 ۇزدىك وقۋشىلارى قاتىسادى.

وسىلايشا, 30 قازان مەن 4 قاراشا ارالىعىندا اقمولا, قاراعاندى جانە پاۆلودار وبلىستارىنىڭ وقۋشىلارى استاناعا كەلسە, الماتى, جامبىل, جانە وڭتۇستىك قازاقستان وبلىسىنىڭ ۇزدىك بالالارى الماتى مەن ۇشقوڭىرعا بارادى.

استانادا وقۋشىلارعا قازاقستان رەسپۋبليكاسى تۇڭعىش پرەزيدەنتى – ەلباسىنىڭ مۇراجايى, قورى مەن كىتاپحاناسى, بەيبىتشىلىك پەن كەلىسىم سارايى, «استانا - بايتەرەك» مونۋمەنتى جانە نازارباەۆ ۋنيۆەرسيتەتى كورسەتىلەدى.

الماتىلىق تۋردىڭ باعدارلاماسى الماتى وبلىسىنداعى ەلباسى وقىعان قاراساي باتىر اتىنداعى مەكتەپ, قازاقستان رەسپۋبليكاسى تۇڭعىش پرەزيدەنتىنىڭ ءۇي-مۇراجايى, «باتىر بابالار» مەموريالدى كەشەنى, سونداي-اق الماتى قالاسىنداعى ورتالىق مەملەكەتتىك مۇراجاي, 28 پانفيلوۆشىلاردىڭ ساياباعى سياقتى وبەكتىلەرگە بارۋ جوسپارلانعان.

قر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ كەڭەسشىسى ءاليا قايشاروۆا: «وسىنداي تۋرلاردى وتكىزۋ مەكتەپ وقۋشىلارىنىڭ وي-ءورىسىن كەڭەيتىپ, قىزىعۋشىلىعىن ارتتىرادى, ءارى بالالاردى جاقسى وقىپ, بەلسەندى بولۋعا قوسىمشا ىنتالاندىراتىن بولادى», - دەپ اتاپ ءوتتى.

«نازارباەۆ ورتالىعىندا» وقۋشىلاردىڭ ءبىرىنشى توبىمەن كەزدەسۋ بارىسىندا «Kazakh Tourism» ۇلتتىق كومپانياسى» اكتسيونەرلىك قوعامىنىڭ باسقارما توراعاسىنىڭ ورىنباسارى قايرات سادۆاقاسوۆ وسىنداي تۋرلاردىڭ بالالار مەن جاسوسپىرىمدەر ءتۋريزمىن جانداندىرۋعا, سونداي-اق ەلىمىزدىڭ جاس ۇرپاعىن پاتريوتتىق تاربيەلەۋىنە زور اسەر ەتەتىنىن اتاپ ءوتتى: «بالالار مەن جاسوسپىرىمدەر تۋرلارى جاس ۇرپاقتىڭ پاتريوتتىق رۋحىن قالىپتاستىرۋدا ماڭىزدى ءرول اتقارا وتىرىپ, ەلدىمىزدەگى ىشكى ءتۋريزمدى دامىتۋعا اسەر ەتەدى».

سونداي-اق, ق.سادۆاقاسوۆ ەكسپو-2017 كورمەسى كەزىندە ەلىمىزدىڭ وڭىرلەرىنەن 185 مىڭ مەكتەپ وقۋشىلارى ءۇشىن 700-دەن استام تۋر ۇيىمداستىرىلعانىن ەسكە سالىپ ءوتتى.